Read ადიშის ოთხთავი 897 წ. – ძველი მონუსკრიპტები 1 კორინთელთა მიმართ 5 Bible Online

1 კორინთელთა მიმართ 5 - ადიშის ოთხთავი 897 წ. – ძველი მონუსკრიპტები bible

1 კორინთელთა მიმართ 5

¹ყოვლად ითქუმის-ვე, რაჲსა თქუენ შორის სიძვაჲ და ეგევითარი სიძვაჲ, რომელ არცა წარმართთა შორის სახელ-ედების, ვითარმცა მამისცოლი ვისმე ცოლად ესუა.

²და თქუენ განლაღებულ ხართ და არა უფროჲსღა იგლოვთ, რაჲთა მოისპოს თქუენ შორის, რომელმან საქმჱ იგი ქმნა.

³ხოლო მე შორს ღათუ ვარ ჴორცითა, არამედ მახლობელ სულითა; და აწვე შემირაცხიეს, ვითარცა მანდა მყოფსა ესევითარისა მისთჳს,რომელმან საქმჱ იგი ქმნა,

⁴სახელითა უფლისა იესუ ქრისტჱსითა, შეკრებასა სულისა ჩემისა და თქუენისასა, ძალითა უფლისა ჩუენისა იესუ ქრისტჱსითა

⁵მიცემად ეგევითარი იგი ეშმაკსა საშჯელად ჴორცთა, რაჲთა სული ცხოვნდეს დღესა მას უფლისა ჩუენისა იესუ ქრისტჱსსა.

⁶არა კეთილი არს სიქადული ეგე თქუენი, ანუ არა უწყით, რამეთუ მცირემან ცომმან ყოველივე შესუარული აღაფუვნის?

⁷განწმიდეთ ძუელი იგი ცომი, რაჲთა იყვნეთ ახალ თბე, ვითარცა-ეგე ხართ უცომო, რამეთუ ზატიკად ჩუენდა დაიკლა ქრისტჱ.

⁸ამიერითგან ვზატიკობდეთ ნუ ცომითა მით ძუელითა, ნუცა ცომითა სიბოროტისაჲთა და უკეთურებისაჲთა, არამედ უცომოჲთა მითსიმართლისაჲთა და ჭეშმარიტებისაჲთა.

⁹მივწერე წიგნსა მაგას: ნუ თანა-აღერევით მეძავთა;

¹⁰და არა ხოლო მეძავთა ამის სოფლისათა, არამედ ნუცა ანგაჰრთა, გინა მტაცებელთა, გინა კერპთ-მსახურთა, უკუე გიღირდა-მეა სოფლითგამოსლვაჲ?

¹¹ხოლო აწ მივწერე თქუენდა: ნუ აღერევით, უკუეთუ ვინმე ძმაჲ სახელ-დებულ იყოს ანუ მეძავ იყოს, ანუ ანგაჰრ, ანუ კერპთ-მსახურ, ანუმაგინებელ, ანუ მომთრვალე, ანუ მტაცებელ; ესევითარისა თანა ნუცაღა შჭამთ.

¹²რაჲ ძეს ჩემი გარეშეთა მათ განკითხვაჲ? ანუ არა შინაგანნი იგი თქუენ განიკითხნეთ?

¹³ხოლო გარეშენი იგი ღმერთმან განიკითხნეს; მოისპეთ უკეთური იგი შორის თქუენსა