Read ადიშის ოთხთავი 897 წ. – ძველი მონუსკრიპტები 1 კორინთელთა მიმართ 8 Bible Online

1 კორინთელთა მიმართ 8 - ადიშის ოთხთავი 897 წ. – ძველი მონუსკრიპტები bible

1 კორინთელთა მიმართ 8

¹ხოლო ნაკერპავთა მათთჳს ვიცით, რამეთუ ყოველთა მეცნიერებაჲ გუაქუს. მეცნიერებამან განალაღის, ხოლო სიყუარულმანაღაშჱნის.

²უკუეთუ ვინმე ჰგონებდეს, ვითარმედ იცის რაჲმე, არღა უცნობიეს, ვითარ-იგი ჯერ-არს ცნობად.

³ხოლო ვის უყუარს ღმერთი, იგი ცნობილ არს მის მიერ.

⁴ხოლო ჭამისათჳს ნაკერპავისა ვიცით, რამეთუ არავინ არს კერპ სოფელსა შინა, და არავინ არს ღმერთ, გარნა მხოლოჲ იგი.

⁵დაღათუ არიან რაჲმე სახელ-დებულ ღმრთად გინა თუ ცათა შინა, გინა თუ ქუეყანასა ზედა, ვითარცა არიან ღმერთნი მრავალ და უფალნიმრავალ,

⁶არამედ ჩუენდა ერთ არს ღმერთი მამაჲ, რომლისაგან არს ყოველი, და ჩუენ -- მისა მიმართ. და ერთი არს უფალი იესუ ქრისტჱ, რომლისათჳსყოველი, და ჩუენ -- მის მიერ.

⁷არამედ არა ყოველთა თანა არს მეცნიერებაჲ; რომელნიმე იჭჳთ ვიდრე აქამომდე კერპთასა მას ვითარცა ნაკერპავსა ჭამენ, და გონებაჲ იგიმათი უძლური შეიგინების.

⁸ხოლო საჭმელმან ჩუენ არა წარგჳდგინნეს ღმერთსა. არა თუ ვჭამოთ, არღა რაჲ გუემატოს.

⁹ხოლო ეკრძალენით, ნუუკუე ჴელმწიფებაჲ ეგე თქუენი დაბრკოლება რაჲმე ექმნეს უძლურთა მათ.

¹⁰უკუეთუ ვინ გიხილოს შენ, რომელსა გაქუს მეცნიერებაჲ, საკერპოსა შინა ინაჴით მჯდომარჱ, არა-მეა გონებაჲ იგი მის უძლურისაჲგანჰჴსნდეს ნაკერპავისა მის ჭამად?

¹¹და წარწყმდეს ძმაჲ იგი უძლური შენითა მით მეცნიერებითა, რომლისათჳს ქრისტჱ მოკუდა.

¹²ესრჱთ სცოდავთ ძმათა მიმართ და ჰგუემთ გონებასა მათსა უძლურსა, ქრისტჱს მიმართ სცოდავთ.

¹³ამისთჳს, უკუეთუ საჭმელი დააბრკოლებს ძმასა ჩემსა, არა ვჭამო ჴორცი უკუნისამდე, რაჲთა არა ძმაჲ იგი ჩემი დავაბრკოლო.