Read ადიშის ოთხთავი 897 წ. – ძველი მონუსკრიპტები 2 კორინთელთა მიმართ 1 Bible Online

2 კორინთელთა მიმართ 1 - ადიშის ოთხთავი 897 წ. – ძველი მონუსკრიპტები bible

2 კორინთელთა მიმართ 1

¹პავლე, მოციქული ქრისტე იესუჲსი ნებითა ღმრთისაჲთა, და ტიმოთე ძმაჲ ეკლესიათა ღმრთისათა, რომელნი არიან კორინთეს შინაყოველთა თანა წმიდათა, რომელნი არიან ყოველსა აქაიასა.

²მადლი თქუენდა და მშჳდობაჲ ღმრთისა მიერ მამისა და უფლისა ჩუენისა იესუ ქრისტჱსა.

³კურთხეულ არს ღმერთი და მამაჲ უფლისა ჩუენისა იესუ ქრისტჱსი, მამაჲ მოწყალებათაჲ და ღმერთი ყოვლისა ნუგეშინის-ცემისაჲ,

⁴რომელი ნუგეშინის-მცემს ჩუენ ყოველთა შინა ჭირთა ჩუენთა, რაჲთა შეუძლოთ ჩუენცა ნუგეშინის-ცემად ყოველთა მათჭირვეულთა ნუგეშინის-ცემითა მით, რომლითა ნუგეშინის-ცემულ ვართ ჩუენ ღმრთისა მიერ.

⁵რამეთუ ვითარცა-იგი ჰმატან ვნებანი ქრისტჱსნი ჩუენდა მომართ, ეგრეცა ქრისტჱს მიერ ჰმატან ნუგეშინის-ცემანი ჩუენნი.

⁶უკუეთუ ვიჭირვით, თქუენისათჳს ნუგეშინის-ცემისა და ცხოვრებისა, რომელ-იგი შეიქმნების მოთმინებითა მით ვნებათაჲთა, რომელ-ესეჩუენცა გუევნების. და სასოებაჲ ჩუენი მტკიცე არს თქუენთჳს.

⁷უწყით, რამეთუ ვითარცა-იგი ზიარ ხართ ვნებათა მათ, ეგრეცა ნუგეშინის-ცემასა.

⁸რამეთუ არა მნებავს, ძმანო, ვითარმცა უმეცარ იყვენით ჭირისა მის ჩუენისათჳს, რომელ-იგი შეგუემთხჳა ასიას შინა; რამეთუ გარდარეულადუფროჲს ძალისა დაგჳმძიმდა ვიდრე წარწირვადმდე ჩუენდა ცხოვრებისაცა.

⁹არამედ ჩუენ თჳთ თავით თჳსით განჩინებაჲ იგი სიკუდილისაჲ მოგუეღო, რაჲთა არა ვესვიდეთ თავთა თჳსთა, არამედ ღმერთსა, რომელმან-იგი აღადგინნის მკუდარნი,

¹⁰რომელმან-იგი ესევითარისაგან სიკუდილისა მიჴსნნა ჩუენ და მიჴსნნეს, რომელსა-იგი ვესავთ ჩუენ, ვითარმედ მერმეცა მიჴსნნეს,

¹¹შეწევნითა მით ლოცვათა თქუენთაჲთა ჩუენთჳს, რაჲთა მრავლითა პირითა ჩუენდა მომართ მადლი იგი მრავალთა მიერ მადლისმისაცემელ იყო ჩუენთჳს.

¹²რამეთუ სიქადული ჩუენი ესე არს, წამებაჲ გონებისა ჩუენისაჲ, რამეთუ სიწმიდითა და ჭეშმარიტებითა ღმრთისაჲთა და არა სიბრძნთაჴორციელითა, არამედ მადლითა ღმრთისაჲთა ვიქცეოდეთ სოფელსა შინა, უმეტჱსადღა თქუენდა მიმართ.

¹³არა თუ სხუასა რას, მივსწერთ, არამედ რომელსაცა-იგი იკითხავთ და გიცნობიეს; ხოლო ვესავ, ვითარმედ სრულად გულისხმა-ჰყოთ,

¹⁴ვითარცა-იგი მიცნენით ჩუენ ჟამად-ჟამად, რამეთუ სიქადულნი თქუენნი ვართ, ვითარცა თქუენ -- ჩუენნი, დღესა მას უფლისა იესუჲსა.

¹⁵და ამითვე სასოებითა მინდა პირველად მისლვად თქუენდა, რაჲთა მეორჱ სიხარული გაქუნდეს,

¹⁶და თქუენით წარსვლად მაკედონიად და კუალად მაკედონიაჲთ მოსლვად თქუენდავე და თქუენ მიერ წარგზავნებადჰურიასტანად.

¹⁷ამას რაჲ ვზრახავ, ნუუკუე მცირედ რაჲ-მე მიყოფიეს? ანუ რომელსა-ესე ვზრახავ, ჴორციელად-მე რას ვზრახავ, რაჲთა იყოს ჩემ მიერი იგი ჰჱჰე და არაჲ -- არა.

¹⁸ხოლო სარწმუნო არს ღმერთი, რამეთუ სიტყუაჲ იგი ჩუენი თქუენდა მიმართ არა არს ჰე და არა.

¹⁹რამეთუ ძჱ ღმრთისაჲ, იესუ ქრისტჱ, რომელი ჩუენ მიერ თქუენ შორის იქადაგა ჩემ მიერ, და სილოანჱს მიერ და ტიმოთჱს მიერ, არა იყოიგი ჰე და არა, არამედ ჰჱ იგი მას შინა იქმნა.

²⁰რამეთუ რაოდენი იგი აღთქუმანი ღმრთისანი არიან, მას შინა ჰე იგი არს, და ამენი ღმრთისა სადიდებელად ჩუენ მიერ.

²¹ხოლო რომელმან-იგი განმამტკიცნა ჩუენ თქუენ თანა ქრისტჱს მიმართ და ცხებულ გუყვნა ჩუენ ღმერთმან;

²²რომელმანცა-იგი აღმბეჭდნა ჩუენ და მოსცა წინდი იგი სულისაჲ გულთა ჩუენთა.

²³ხოლო მე მოწამედ ღმერთსა ვხადი სულისა ჩემისა, რამეთუ გერიდებოდე თქუენ და მისთჳს არღარა მოვედ კორინთედ.

²⁴არა თუ უფლებთ რას სარწმუნოებასა მაგას თქუენსა ზედა, არამედ თანა-შემწენი ვართ სიხარულისა თქუენისანი, რამეთუსარწმუნოებითა მტკიცედ სდგათ.