Read ადიშის ოთხთავი 897 წ. – ძველი მონუსკრიპტები 2 კორინთელთა მიმართ 3 Bible Online

2 კორინთელთა მიმართ 3 - ადიშის ოთხთავი 897 წ. – ძველი მონუსკრიპტები bible

2 კორინთელთა მიმართ 3

¹კუალად ვიწყო თავთა თჳსთა წამებად. ნუ გჳჴმს-მე რაჲ, ვითარ-იგი ვიეთმე საწამებელი წიგნი აქუს თქუენდა მიმართ და თქუენგან?

²ხოლო წიგნ ჩუენდა თქუენ ხართ უფლისა მიერ, დაწერილ გულთა ჩუენთა, უწყებულ და აღმოკითხულ ყოველთა მიერ კაცთა.

³შჩანთ, რამეთუ ხართ თქუენ წიგნ სამოციქულო ქრისტჱსა, რომელი იმსახურა ჩუენ მიერ, დაწერილ არა მელნითა, არამედ სულითა ღმრთისაცხოველისაჲთა, არა ფიცართა ქვისათა, არამედ ფიცართა გულისა ჴორციელისათა.

⁴ხოლო სასოებაჲ ესევითარი გუაქუს ქრისტჱს მიერ ღმრთისა მიმართ;

⁵არა თუ თავით თჳსით შემძლებელ ვართ შერაცხად რაჲსმე რეცათუ ჩუენგან, არამედ შეძლებაჲ ჩუენი ღმრთისაგან არს,

⁶რომელმან-იგი შემძლებელ გუყვნა ჩუენ მსახურებად ახლისა შჯულისა, არა თუ წიგნითა, არამედ სულითა, რამეთუ წიგნმანმოაკუდინის, ხოლო სულმან აცხოვნის.

⁷უკუეთუ მსახურებაჲ იგი სიკუდილისაჲ, წიგნითა გამოსახული ფიცართა შინა, იქმნა დიდებულ, ვითარმედ ვერ შემძლებელ იყვნეს თუალთაშედგმად ძენი ისრაჱლისანი პირსა მოსჱსსა დიდებითა მით პირისა მისისაჲთა, რომელი გან-ღა-ქარვებად იყო,

⁸რაოდენ უფროჲს მსახურებაჲ იგი სულისაჲ იყოს დიდებით?

⁹უკუეთუ მსახურებაჲ იგი დაშჯისაჲ დიდებით, რაოდენ უფროჲს აღემატოს მსახურებაჲ იგი სულისაჲ დიდებითა.

¹⁰და რამეთუ არღა დიდებულ არს დიდებადი იგი ამით ჯერითა გარდარეულისა მისთჳს დიდებისა.

¹¹უკუეთუ განქარვებადი იგი დიდებით იყო, რაოდენ უფროჲს, რომელი ჰგიეს დიდებით.

¹²რამეთუ მაქუს ჩუენ ესევითარი სასოებაჲ, მრავალი განცხადებულებაჲ ვიღუაწოთ,

¹³და არა ვითარ-იგი მოსე საფარველი დაიბურის პირსა თჳსსა, რაჲთა არა ჰხედვიდენ ძენი ისრაჱლისანი დასასრულსა მას განქარვებისასა.

¹⁴არამედ დაბრმეს გონებანი მათნი, რამეთუ ვიდრე დღენდელად დღედმდე იგივე საბურველი საკითხავსა მას ძუელისა შჯულისასაჰგიეს აღუძარცუველად, რამეთუ ქრისტჱს მიერ განქარდების.

¹⁵არამედ დღენდელად დღედმდე, რაჟამს აღმოიკითხვების მოსე, საბურველი გულსა მათსა ძეს.

¹⁶ხოლო რაჟამს მოიქცეს უფლისა, მოეძარცოს საბურველი იგი.

¹⁷ხოლო უფალი სულ არს; სადა სული უფლისაჲ, მუნ აზნაურებაჲ არს.

¹⁸ხოლო ჩუენ განცხადებულითა პირითა დიდებასა უფლისასა განვიცდით და მასვე ხატსა მივიცვალებით დიდებითი დიდებად, ვითარცა-იგი უფლისაგან სულად.