Read ადიშის ოთხთავი 897 წ. – ძველი მონუსკრიპტები 2 კორინთელთა მიმართ 5 Bible Online

2 კორინთელთა მიმართ 5 - ადიშის ოთხთავი 897 წ. – ძველი მონუსკრიპტები bible

2 კორინთელთა მიმართ 5

¹ესე უწყით, უკუეთუ ქუეყანისაჲ ესე სახლი, საყოფელი ჩუენი, დაირღუეს, აღშჱნებული ღმრთისა მიერ მაქუს ჩუენ სახლი ჴელით-უქმნელი საუკუნჱ ცათა შინა.

²და რამეთუ ამას შინა ვკუნესით და საყოფელი იგი ჩუენი ზეცით გამო შემოსად გუსურის;

³გან-ღათუ-ვიძუარცუნეთ, არავე შიშუელნი ვიპოვნეთ.

⁴და რომელნიღა-ესე ვართ საყოფელსა ამას, ვკუნესით და დაგჳმძიმდების, რომელი არა გჳნებს განძარცუვად, არამედ შემოსად, რაჲთადაითქას მოკუდავი იგი ცხოვრებისაგან.

⁵ხოლო რომელი-იგი შეიქმს ჩუენ თანა, ღმერთი არს, რომელმან მომცა ჩუენ წინდი იგი სულისაჲ.

⁶ვიკადრებთ უკუე მარადის და უწყით, რამეთუ შემოვედით ჴორცთა ამათ და განვიდეთ უფლისა მიერ.

⁷სარწმუნოებით ვიქცევით და არა იჭჳთ.

⁸ვიკადრებთ და ჯერ-გჳჩს უფროჲსღა განსლვაჲ ჴორცთაგან და მისლვად უფლისა.

⁹ამისთჳსცა პატივცემულ ვართ, გინა თუ შემოვიდეთ გინა თუ განვიდეთ, სათნომცა ვართ მისა.

¹⁰რამეთუ ჩუენ ყოველნი განცხადებად ვართ წინაშე საყდართა ქრისტჱსთა, რაჲთა მოიღოს კაცად-კაცადმან ჴორცთა მათგან, რაჲცა-იგი ქმნა, გინა თუ კეთილი გინა თუ ბოროტი.

¹¹აწ უკუე ვიცით შიში ღმრთისაჲ, კაცთა ვერწმუნნეთა? ხოლო ღმრთისა წინაშე განცხადებად ვართ; და ვესავთ გონებათა თქუენთაცაგანცხადებასა.

¹²არა კუალად თავთა თჳსთა შეგასწავებთ თქუენ, არამედ მიზეზ-გცემთ თქუენ სიქადულის ჩუენდა მომართ, რაჲთა გაქუნდეს მათა მიმართ,რომელნი-იგი პირსა წინაშე ხოლო იქადიან და არა გულითა.

¹³დაღათუ განუდეგით, -- ღმერთსა, გინა თუ განგაბრძნობთ, -- თქუენ.

¹⁴რამეთუ სიყუარული იგი ქრისტჱსი მაწუევს ჩუენ გამორჩევად მას, რამეთუ: ერთი იგი ყოველთათჳს მოკუდა, და ყოველნი-მე მოწყდენა?

¹⁵და რამეთუ ყოველთათჳს მოკუდა, რაჲთა ცხოველნი იგი არღარა თავით თჳსით ცხოველ იყვნენ, არამედ მისთჳს, რომელ-იგი მათთჳსმოკუდა და აღდგა.

¹⁶ამიერითგან ჩუენ არღარავინ ვიცით ჴორციელად; დაღათუ ვიცოდეთ ქრისტე ჴორციელად, არამედ აწ არღარა ეგრეთ ვიცით.

¹⁷ამიერითგან რაჲ-იგი არს ქრისტჱს მიმართ ახალი დაბადებული; პირველი იგი წარჴდა, და აწ ესერა იქმნა ახალი,

¹⁸ხოლო ყოველივე ღმრთისა მიერ, რომელმან დამიგნა ჩუენ თავისა თჳსისა ქრისტჱს მიერ და მომცა ჩუენ მსახურებაჲ იგი დაგებისაჲ.

¹⁹რამეთუ ღმერთი იყო ქრისტჱს თანა, სოფელი დააგო თავისა თჳსისა და არა შეურაცხნა მათ ცოდვანი მათნი და დადვა ჩუენ თანა სიტყუაჲიგი დაგებისაჲ.

²⁰ქრისტჱსთჳს ვციქუთ, ვითარცა ღმერთი გლოცავს ჩუენ მიერ; გევედრებით ქრისტჱსთჳს: დაეგენით ღმერთსა.

²¹რამეთუ რომელმან-იგი არა იცოდა ცოდვაჲ, ჩუენთჳს ცოდვაჲ ქმნა, რაჲთა ჩუენ ვიქმნნეთ სიმართლჱ ღმრთისაჲ მას შინა.