Read ადიშის ოთხთავი 897 წ. – ძველი მონუსკრიპტები 2 კორინთელთა მიმართ 6 Bible Online

2 კორინთელთა მიმართ 6 - ადიშის ოთხთავი 897 წ. – ძველი მონუსკრიპტები bible

2 კორინთელთა მიმართ 6

¹თანა-შემწენი ვართ თქუენდა და გლოცავთ, ნუ ცუდად მადლი იგი ღმრთისაჲ მიგაქუნ თქუენ.

²რამეთუ იტყჳს: ჟამსა შეწყნარებისასა ვისმინე შენი და დღესა ცხოვრებისასა შეგეწიე შენ. ძმანო, რამეთუ ესერა აწ არს ჟამი იგიშეწყნარებისაჲ, რამეთუ აწ არს დღჱ იგი ცხოვრებისაჲ.

³ნურას ვის ნურაჲთ სცემთ დაბრკოლებასა, რაჲთა არა იგმოს მსახურებაჲ იგი.

⁴არამედ ყოველსა შინა წარუდგინენით თავნი თჳსნი, ვითარცა ღმრთის მსახურთა, მოთმინებითა მრავლითა, ჭირთა შინა დაურვათა, იწროებათა,

⁵ტანჯვათა, პყრობილებათა, შფოთებათა, შურომათა, მღჳძარებითა, მარხვითა,

⁶სიწმიდითა, მეცნიერებითა, სულგრძელებითა, სიტკბოებითა, სულითა წმიდითა, სიყუარულითა შეუორგულებელითა,

⁷სიტყჳთა ჭეშმარიტებისაჲთა, ძალითა ღმრთისაჲთა, საჭურველითა სიმართლისაჲთა მარჯუენისაჲთა და მარცხენისაჲთა,

⁸დიდებითა და გინებითა, გმობითა და ქებითა; ვითარცა მაცთურნი, და ჭეშმარიტნი;

⁹ვითარცა უცნაურნი, და საცნაურნი; ვითარცა მოსიკუდიდნი, და აჰა ესერა ცხოველ ვართ; ვითარცა სწავლადნი, და არა სიკუდიდნი;

¹⁰ვითარცა მწუხარენი, და მარადის გჳხარის; ვითარცა გლახაკნი, და მრავალთა განვამდიდრებთ; ვითარცა არარაჲ გუაქუს, და ყოველივეგუაქუს.

¹¹პირი ჩუენი აღღებულ არს თქუენდა მიმართ, კორინთელნო, და გული ჩუენი გავრცომილ არს.

¹²არა შეიწრებულ ხართ ჩუენ მიერ, არამედ შეიწრებულ ხართ ნაწლევთაგან თქუენთა.

¹³მასვე სასყიდლის კუალად-გებასა ვითარცა შვილთა გეტყჳ: განვრცენით თქუენცა.

¹⁴ნუ ექმნებით თანა-მეუღლე ურწმუნოთა: რაჲ მოყუსება არს სიმართლისა და უშჯულოებისა? ანუ რაჲ ზიარებაჲ არს ნათლისა და ბნელისა?

¹⁵ანუ რაჲ შეტყუება არს ქრისტჱსი ბელიარის თანა? ანუ რაჲ ნაწილი უც მორწმუნესა ურწმუნოსა თანა?

¹⁶ანუ რაჲ სწორება არს ტაძრისა ღმრთისა კერპთა თანა? რამეთუ ჩუენ ტაძარნი ღმრთისანი ვართ ცხოველისანი, ვითარცა თქუა ღმერთმან:დავიმკჳდრო მათ შორის და ვიქცეოდი და ვიყო მე მათა ღმერთ და იგინი იყვნენ ჩემდა ერად.

¹⁷ამისთჳს გამოვედით შორის მათსა და გამოეშოვრენით, იტყჳს უფალი, და არა-წმიდასა მას ნუ შეეხებით, და მე შეგიწყნარნე თქუენ.

¹⁸და ვიყო მე თქუენდა მამა და თქუენ იყვნეთ ჩემდა ძეებ და ასულებ, იტყჳს უფალი ყოვლისა მპყრობელი.