Read ადიშის ოთხთავი 897 წ. – ძველი მონუსკრიპტები 2 კორინთელთა მიმართ 8 Bible Online

2 კორინთელთა მიმართ 8 - ადიშის ოთხთავი 897 წ. – ძველი მონუსკრიპტები bible

2 კორინთელთა მიმართ 8

¹გაუწყებ თქუენ, ძმანო, მადლსა მას ღმრთისასა, რომელ-იგი მოცემულ არს ეკლესიათა მაკედონიაჲსათა,

²რამეთუ მრავალმან მან გამოცდილებამან ჭირისამან და უმეტჱსმან სიხარულმან მათმან და დიდძალმან სიგლახაკემან მათმან გარდაჰმატასიმდიდრესა მას უხუებისა მათისასა;

³რამეთუ მსგავსად ძალისა მათისა, ვეწამები, და უფროჲს ძალისა ნებსით თჳსით.

⁴მრავლითა ვედრებითა მლოცვიდეს ჩუენ მადლსა მას და ზიარებასა მსახურებისასა წმიდათა მიმართ.

⁵და არა ხოლო ვითარ-იგი ვესევდით, არამედ თავნი თჳსნი პირველად მისცნეს უფალსა და მერმე ჩუენ ნებითა ღმრთისაჲთა,

⁶რაჲთა ვევედრებოდით ჩუენ ტიტეს, რაჲთა ვითარცა-იგი იწყო წინაჲსწარ, ეგრეცა აღასრულოს თქუენ ზედა ესეცა მადლი.

⁷არამედ ვითარცა-იგი ყოველსა შინა წარემატებით: სარწმუნოებითა, სიტყჳთა და მეცნიერებითა და ყოვლითა მოსწრაფებითა და ჩუენმიერითა მით თქუენ შორის სიყუარულითა, რაჲთა ამითცა მადლითა აღემატნეთ.

⁸არა თუ ბრძანებით გეტყჳ, არამედ სხუათა მოსწრაფებისათჳს თქუენსა მას სიყუარულსა გულითად გამოვიცდი.

⁹რამეთუ იცით მადლი იგი უფლისა ჩუენისა იესუ ქრისტჱსი, რამეთუ თქუენთჳს დაგლახაკნა მდიდარი იგი, რაჲთა თქუენ მისითა მითსიგლახაკითა განჰმდიდრდეთ.

¹⁰და ამას გაზრახებ, რამეთუ ესე უმჯობჱს არს თქუენდა, რომელთა-ეგე არა ხოლო ყოფად, არამედ ნებადცა წინაჲსწარ იწყეთ შრანდითგან.

¹¹ხოლო აწ ესერა ყოფადცა აღასრულეთ, რაჲთა ვითარცა-იგი გულს-მოდგინებაჲ ნებისათჳს, ეგრეცა აღსრულებაჲ მისგან, რომელ-იგი აქუს.

¹²უკუეთუ გულს-მოდგინებაჲ იგი წინა ძეს, რაჲცა-იგი აქუს, შეწირულ არს, არა რომელ-იგი არა აქუს.

¹³არა რაჲთა სხუათა ლხინი და თქუენ ჭირი, არამედ განსწორებით.

¹⁴ამას ჟამსა თქუენი იგი ნამეტავი მათისა მის ნაკლულევანებისა, რაჲთა მათი იგიცა ნამეტავი იყოს თქუენისა მის ნაკლულევანებისა, რაჲთაიყოს განსწორებით.

¹⁵და ვითარცა წერილ არს: რომელმან ფრიად მოიღო, აღარა ემატა, და რომელმან მცირედ, მას და-არაჲ-აკლდა.

¹⁶ხოლო მადლი ღმერთსა, რომელმან მოსცა იგივე წრაფაჲ გულსა ტიტჱსსა თქუენთჳს.

¹⁷რამეთუ ვედრებაჲ იგი შეიწყნარა და უმოსწრაფჱსრე იქმნა, ნებსით თჳსით განვიდა თქუენდა.

¹⁸და მივავლინეთ მის თანა ძმაჲ, რომლისა-იგი ქებაჲ სახარებასა შინა ყოველთა მიერ ეკლესიათა,

¹⁹არა ხოლო ეგრე, არამედ ჴელის-დადებითცა იკურთხა ეკლესიათაგან თანა-გუნდად ჩუენდა მადლითა მით, რომელი იმსახურებისჩუენ მიერ თავადისა უფლისა სადიდებელად და გულს-მოდგინებისა თქუენისათჳს.

²⁰ვერიდებით ამას, ნუ ვინმე გუგმობდეს ჩუენ სიმტკიცისა ამისთჳს, რომელი იმსახურების ჩუენ მიერ.

²¹რამეთუ წინაჲსწარ განვიზრახავთ კეთილსა, არა ხოლო წინაშე უფლისა, არამედ წინაშე კაცთაცა.

²²და მათ თანა მივავლინეთ ძმაჲ ჩუენი, რომელი გამოვიცადეთ მრავალსა შინა მრავალ-გზის მოსწრაფედ, ხოლო აწ უფროჲსღა მოსწრაფჱსასოებითა მით მრავლითა თქუენდა მიმართ.

²³გინა თუ ტიტჱსთჳს, საქმის ზიარისა ჩემისა და თქუენისა შემწისა, გინა თუ ძმანი ჩუენნი, მოციქულნი ეკლესიათანი, დიდებანი ქრისტჱსნი.

²⁴გამოჩინებაჲ იგი სიყუარულისა თქუენისაჲ და ჩუენისა სიქადულისაჲ თქუენთჳს მათა მიმართ აჩუენეთ წინაშე პირსა ეკლესიათასა.