Read ადიშის ოთხთავი 897 წ. – ძველი მონუსკრიპტები გალატელთა მიმართ 1 Bible Online

გალატელთა მიმართ 1 - ადიშის ოთხთავი 897 წ. – ძველი მონუსკრიპტები bible

გალატელთა მიმართ 1

¹პავლე მოციქული არა კაცთაგან, არცა კაცთა მიერ, არამედ იესუ ქრისტჱს მიერ და ღმრთისა მამისა, რომელმან აღადგინა იგი მკუდრეთით,

²და ჩემ თანა ყოველნი ძმანი ეკლესიათა გალატიაჲსათა:

³მადლი თქუენდა და მშჳდობაჲ ღმრთისა მიერ მამისა და უფლისა იესუ ქრისტჱსა,

⁴რომელმან მისცა თავი თჳსი ცოდვათა ჩუენთათჳს, რაჲთა განმარინნეს ჩუენ სოფლისა ამისგან მოწევნულისა ბოროტისა ნებითა ღმრთისა დამამისა ჩუენისაჲთა.

⁵რომლისაჲ არს დიდებაჲ უკუნითი უკუნისამდე. ამენ.

⁶მიკჳრს მე, რამეთუ ესრჱთ ადრე გარდაიქცევით მისგან, რომელმან-იგი გიჩინნა თქუენ მადლითა ქრისტჱსითა, სხუად სახარებად,

⁷რომელ სხუა არარაჲ არს, გარნა არიან ვინმე, რომელნი აღგძრვენ თქუენ და ჰნებავს გარდაქცევად სახარებაჲ იგი ქრისტჱსი.

⁸არამედ დაღათუ ჩუენ, გინა თუ ანგელოზი ზეცით გახარებდეს თქუენ გარეშე მისსა, რომელ-იგი გახარე თქუენ, შეჩუენებულ იყავნ!

⁹ვითარცა-იგი წინაჲსწარ ვთქუ, აწ კუალად მასვე ვიტყჳ: უკუეთუ ვინმე გახარებდეს თქუენ მისა გარეშე, რომელ-იგი ჩუენ გახარეთ,შეჩუენებულ იყავნ!

¹⁰აწ კაცთა-მე ვერწმუნნეთა ანუ ღმერთსა? ანუ ვეძიებთ-მე რას კაცთ-მოთნებასა? უკუეთუმცა კაცთაღა სათნო-ვეყოფოდე, ქრისტჱს მონაჲმცაარა ვიყავ.

¹¹გაუწყებ თქუენ, ძმანო, სახარებასა მას, რომელ-იგი გეხარა თქუენ ჩემ მიერ, რამეთუ არა არს კაცობრივ.

¹²არცაღა მე კაცისაგან მოვიღე იგი გინა თუ ვისწავე, არამედ გამოცხადებითა იესუ ქრისტჱსითა.

¹³რამეთუ გესმინა თქუენ სლვაჲ ჩემი ოდესმე ჰურიაებასა შინა, რამეთუ გარდარეულად ვსდევნიდ ეკლესიათა ღმრთისათა დავტყუენევდი.

¹⁴და წარვემატებოდე ჰურიაებასა შინა უფროჲს მრავალთა ჰასაკის სწორთა ჩემთა ნათესავთა შინა ჩემთა, უმეტჱს მოშურნე ვიყავ მამულთაჩემთათჳს მოძღურებათა.

¹⁵ხოლო რაჟამს სათნო-იყო ღმერთმან, რომელმან გამომირჩია მე მუცლითგან დედისაჲთ და მიწოდა მე მადლითა თჳსითა

¹⁶გამოცხადებად ძჱ მისი ჩემ მიერ, რაჲთა ვახარო იგი წარმართთა შორის, მეყსეულად არა ვაუწყე ჴორცთა და სისხლთა,

¹⁷არცა აღვედ იერუსალჱმდ მათა, რომელნი-იგი იყვნეს უწინარჱს ჩემსა მოციქულნი, არამედ მივედ არაბიად და კუალად მოვიქეც დამასკედ.

¹⁸და მერმე შემდგომად სამისა წლისა აღვედ იერუსალჱმდ ხილვად კეფაჲსა და ვიყავ მის თანა ათხუთმეტ დღე.

¹⁹სხუაჲ მოციქულთაგანი არავინ ვიხილე, გარნა იაკობ, ძმაჲ უფლისაჲ.

²⁰ხოლო რომელსა-ესე მივსწერ თქუენდა, აჰა ესერა წინაშე ღმრთისა, რამეთუ არა ვტყუი.

²¹მერმე კუალად მოვედ ადგილთა მათ ასურეთისათა და კილიკიაჲსათა.

²²და ვიყავ შეუსწავებელ წინაშე პირთა ეკლესიათა ჰურიასტანისათა, რომელნი იყვნეს ქრისტჱს მიმართ;

²³გარნა სმენით ხოლო ესმინა, ვითარმედ რომელ-იგი მაშინ გუდევნიდა ჩუენ, აწ ახარებს სარწმუნოებასა, რომელსა-იგი ოდესმე ტყუენვიდა.

²⁴და ადიდებდეს ჩემთჳს ღმერთსა.