Read ადიშის ოთხთავი 897 წ. – ძველი მონუსკრიპტები გალატელთა მიმართ 2 Bible Online

გალატელთა მიმართ 2 - ადიშის ოთხთავი 897 წ. – ძველი მონუსკრიპტები bible

გალატელთა მიმართ 2

¹მერმე კუალად მეათოთხმეტესა წელსა აღვედ იერუსალჱმდ ბარნაბაჲს თანა; ჩემ თანა წარვიყვანე ტიტეცა.

²ხოლო აღვედ გამოცხადებით და ვაუწყე მათ სახარებაჲ იგი, რომელსა ვქადაგებდ წარმართთა შორის, ხოლო თჳსაგან მათ, რომელნი-იგისაგონებელ იყვნეს, ნუუკუე ცუდად ვრბიოდე გინა ვრბი.

³არამედ არცაღა ტიტე, რომელი იყო ჩემ თანა, რამეთუ წარმართღა იყო, იიძულა იგი წინადაცუეთად.

⁴შემოსრულთა მათგან ძმათ-მტყუართა, რომელნი შემოვიდეს განმსტურობად აზნაურებასა მას ჩუენსა, რომელი მაქუს ქრისტე იესუჲს მიერ,რაჲთა დაგჳმონნენ ჩუენ,

⁵რომელთაჲ ჟამ ერთცა არა თავს-ვიდევით დამორჩილებად, რაჲთა ჭეშმარიტებაჲ იგი სახარებისაჲ დაადგრეს თქუენ თანა.

⁶ხოლო მათ, რომელნი-იგი ჰგონებდეს, ვითარმედ არიან რაჲმე, რომელნი მყოფელ ოდესმე იყვნეს, არარაჲ უმჯობჱს ჩემდა.ღმერთმან კაცსა არა თუალ-ახუნის. რამეთუ მე, რომელნი-იგი საგონებელ იყვნეს, არარაჲ კუალად მითხრეს.

⁷არამედ წინააღმდგომი, უწყოდეს, რამეთუ რწმუნებულ არს ჩემდა სახარებაჲ იგი წინადაუცუეთილებისაჲ, ვითარცა-იგი პეტრეს --წინადაცუეთისაჲ.

⁸რამეთუ რომელი შეეწია პეტრეს მოციქულებად წინადაცუეთილებისა, შემეწია მეცა წარმართთა მიმართ.

⁹და ვითარცა ცნეს მადლი იგი, რომელი მოცემულ იყო ჩემდა, იაკობ, კეფა და იოვანე, რომელთა ეგონა სუეტად თავი თჳსი, მარჯუენჱმოგუცეს მე და ბარნაბას ზიარებისაჲ, რაჲთა ჩუენ წარმართთა მიმართ და იგინი წინადაცუეთილებისა მიმართ.

¹⁰გარნა რაჲთა გლახაკნი ხოლომცა გუაჴსოვნან, რომელცა-იგი ვისწრაფეთ ყოფად.

¹¹და რაჟამს მოვიდა პეტრე ანტიოქიად, წინაშე პირსა მისსა აღუდეგ, რამეთუ შეკდემულ იყო.

¹²რამეთუ ვიდრე მოსლვადმდე ვიეთამე იაკობისით წარმართთა თანა ჭამდა, ხოლო რაჟამს მოვიდა, იჯმნა და განაშოვრა თავითჳსი, რამეთუ ეშინოდა წინადაცუეთილთა მათგან.

¹³და მის თანა ორგულ იქმნნეს სხუანიცა ჰურიანი, ვიდრემდე ბარნაბაცა მი-ვე-ერჩდა მათსა მას ორგულებასა.

¹⁴არამედ რაჟამს ვიხილე, ვითარმედ არა წარუმართებიეს ჭეშმარიტებისა მიმართ სახარებისა, ვარქუ პეტრეს წინაშე ყოველთა: უკუეთუ შენ,რომელ-ეგე ჰურიაჲ ხარ, წარმართებრ და არა ჰურიაებრ სცხოვნდები, ვითარ წარმართთა აიძულებ ჰურიაებად?

¹⁵ჩუენ ბუნებით ჰურიანი ვართ და არა წარმართთაგანნი ცოდვილნი.

¹⁶და ესე უწყით, რამეთუ არა განმართლდების კაცი საქმეთაგან შჯულისათა, გარნა სარწმუნოებითა იესუ ქრისტჱსითა, და ჩუენ იესუქრისტჱს მიმართ გურწმენა, რაჲთა განვმართლდეთ სარწმუნოებითა იესუ ქრისტჱსითა და არა საქმეთაგან შჯულისათა; რამეთუ საქმეთაგან შჯულისათაარა განმართლდეს ყოველი ჴორციელი.

¹⁷უკუეთუ მით ვეძიებდეთ განმართლებად ქრისტჱს მიმართ, ვიპოვნეთ ჩუენცა ცოდვილ; აწ ქრისტე ცოდვისა-მე Ms. page: AR მსახურ იქმნა? ნუიყოფინ!

¹⁸უკუეთუ რომელ-იგი დავარღჳე და კუალად მასვე ვაშჱნებდე, შჯულისა გარდამავალად თავი თჳსი შევირაცხო.

¹⁹რამეთუ მე შჯულისათჳს შჯულითა მოვკუედ, რაჲთა ღმრთისა ვცხოვნდე. ქრისტჱს თანა ჯუარს-ცუმულ ვარ.

²⁰ხოლო ცხოველ არღარა მე ვარ, არამედ ცხოველ არს ჩემ თანა ქრისტჱ. ხოლო აწ ცხოველ ვარ ჴორცითა, სარწმუნოებითა ცხოველ ვარ ძისაღმრთისაჲთა, რომელმან შემიყუარა მე და მისცა თავი თჳსი ჩემთჳს.

²¹არა შეურაცხ-ვჰყოფ მადლსა მას ღმრთისასა. უკუეთუ შჯულისაგან არს სიმართლჱ, ქრისტჱ ცუდად-მე მოკუდაა?