Read ადიშის ოთხთავი 897 წ. – ძველი მონუსკრიპტები გალატელთა მიმართ 3 Bible Online

გალატელთა მიმართ 3 - ადიშის ოთხთავი 897 წ. – ძველი მონუსკრიპტები bible

გალატელთა მიმართ 3

¹ჵ უცნობელნო გალატელნო, ვინ გეშურობდა თქუენ, რომელთა თუალთა წინაშე პირველვე მოგიწერე ქრისტჱ ჯუარს-ცუმული?

²ესე ხოლო მნებავს თქუენგან უწყებად: საქმეთაგან შჯულისათა სული იგი მიიღეთ ანუ სმენითა მით სარწმუნოებისაჲთა?

³ესოდენ უცნობელ ხართ, იწყეთ სულიერად და აწ ჴორციელად აღასრულებთ?

⁴ესოდენ გევნო ცუდად? და თუმცა ცუდად!

⁵რომელმან-იგი მოგცა თქუენ სული და იქმს ძალთა თქუენ შორის, საქმეთაგან შჯულისათა ანუ სმენითა სარწმუნოებისაჲთ?

⁶ვითარცა აბრაჰამსა ჰრწმენა ღმერთი და შეერაცხა მას სიმართლედ.

⁷უწყით-მეა, რამეთუ სარწმუნოებისაგანნი იგი არიან შვილნი აბრაჰამისნი?

⁸რამეთუ წინაჲსწარ იცოდა წიგნმან, ვითარმედ სარწმუნოებითა განამართლებს წარმართთა ღმერთი, წინაჲსწარ ახარა აბრაჰამსა, ვითარმედ:შენდამი იკურთხეოდიან ყოველნი წარმართნი.

⁹აწ უკუე სარწმუნოებისაგანნი იგი იკურთხევიან მორწმუნისა მის აბრაჰამის თანა.

¹⁰რამეთუ რაოდენნი-იგი საქმეთაგან შჯულისათა არიან, წყევასა ქუეშე არიან. ვითარცა წერილ არს: წყეულ იყავნ ყოველი, რომელი არადაადგრეს ყოველსა მას წერილსა წიგნისა ამის შჯულისასა ყოფად მისა.

¹¹და რამეთუ შჯულითა არავინ განმართლდების ღმრთისა წინაშე, ჩას, რამეთუ: მართალი იგი სარწმუნოებითა ცხოვნდეს.

¹²ხოლო შჯული იგი არა არს სარწმუნოებისაგან; არამედ, ყოს თუ ვინმე იგი, ცხოვნდეს მას შინა.

¹³ქრისტემან გამოგჳჴსნნა ჩუენ წყევისა მისგან შჯულისა და იქმნა ჩუენთჳს წყევასა ქუეშე. რამეთუ წერილ არს: წყეულ იყავნ ყოველი, რომელიდამოკიდებულ იყოს ძელსა.

¹⁴რაჲთა წარმართთა მიმართ კურთხევაჲ იგი აბრაჰამისი იყოს იესუ ქრისტჱს მიერ, რაჲთა აღთქუმაჲ იგი სულისაჲ მოვიღოთსარწმუნოებითა.

¹⁵ძმანო, კაცობრივ ვიტყჳ: კაცისაჲ პირველ გამტკიცებული წიგნი არავინ შეურაცხ-ყვის, გინა სხუაჲ ბრძანებაჲ ბრძანის მას ზედა.

¹⁶ხოლო აბრაჰამისა მიმართ ითქუნეს აღთქუმანი ესე და ნათესავისა მისისა. არა იტყჳს: "ნათესავთა", ვითარცა მრავალთასა, არამედ ვითარცაერთისათა: "და ნათესავისა შენისა", რომელ არს ქრისტჱ.

¹⁷ხოლო ამას ვიტყჳ: წიგნი აღთქუმისაჲ, წინაჲსწარ დამტკეცილი ღმრთისაგან, რომელი შემდგომად ოთხას ოცდაათისა წლისა იყო შჯული,არა დაუმტკიცებელ ყოს განქარვებად აღთქუმაჲ იგი.

¹⁸უკუეთუმცა შჯულისაგან იყო მკჳდრობაჲ იგი მიერითგან, არღარა აღთქუმისაგან არს; ხოლო აბრაჰამსა აღთქუმით მოჰმადლაღმერთმან.

¹⁹აწ უკუე რაჲ შჯული? გარდასლვისათჳს-მე მოეცაა, ვიდრემდე მოვიდეს ნათესავი, რომელი აღთქუმულ არს, ბრძანებული ანგელოზთაგანჴელითა შოვამდგომელისაჲთა?

²⁰რამეთუ შუამდგომელი ერთისაჲ არა არნ, ხოლო ღმერთი ერთ არს.

²¹აწ უკუე შჯული მტერ-მე არსა აღთქუმათათჳს ღმრთისათა? ნუ იყოფინ! უკუეთუმცა მოეცა შჯული, რომელი შემძლებელ იყო ცხოვრებად,ნანდჳლვე შჯულისაგანმცა იყო სიმართლჱ.

²²არამედ შეაყენა წიგნმან ყოველივე ცოდვასა ქუეშე, რაჲთა აღთქუმაჲ იგი სარწმუნოებისაგან იესუ ქრისტჱსისა მოეცეს მორწმუნეთა მათ.

²³ხოლო მოწევნამდე სარწმუნოებისა შჯულსა ქუეშე მოცვულ ვიყვენით და შეყენებულ მერმისათჳს სარწმუნოებისა გამოჩინებამდე.

²⁴რამეთუ შჯული იგი მზარდულ გუექმნა ჩუენ ქრისტჱს მიმართ, რაჲთა სარწმუნოებისაგან განვმართლდეთ.

²⁵ხოლო მო-რაჲ-იწია სარწმუნოებაჲ, არღარა მზარდულთა ქუეშე ვართ.

²⁶არამედ ყოველნი შვილნი ღმრთისანი ვართ სარწმუნოებითა იესუ ქრისტჱსითა,

²⁷რამეთუ რაოდენთა ნათელ-ვიღეთ ქრისტჱს მიმართ, ქრისტჱ შევიმოსეთ.

²⁸არა არს ჰურიაება, არცა წარმართება; არა არს მონება, არცა აზნაურება; არა არს რჩევა მამაკაცისა, არცა დედაკაცისა, რამეთუ თქუენ ყოველნიერთ ხართ ქრისტე იესუჲს მიერ.

²⁹უკუეთუ თქუენ ქრისტჱსნი ხართ, აბრაჰამისნი ვიდრემე შვილნი ხართ და აღთქუმისაგან მკჳდრნი.