Read ადიშის ოთხთავი 897 წ. – ძველი მონუსკრიპტები გალატელთა მიმართ 6 Bible Online

გალატელთა მიმართ 6 - ადიშის ოთხთავი 897 წ. – ძველი მონუსკრიპტები bible

გალატელთა მიმართ 6

¹ძმანო, უკუეთუ ვინმე დაეპყრას კაცი რომელსამე ბრალსა, თქუენ, სულიერთა მაგათ, დაამტკიცეთ ეგევითარი იგი სულითა მითმშჳდობისაჲთა; ეკრძალე თავსა შენსა, ნუუკუე შენცა განიცადო.

²ურთიერთასი სიმძიმჱ იტჳრთეთ და ესრჱთ აღასრულეთ შჯული ქრისტჱსი.

³უკუეთუ ვისმე ეგონოს რაჲმე თავი თჳსი, და იგი არარაჲ იყოს, აცთუნებს იგი თავსა თჳსსა.

⁴არამედ საქმენი თჳსნი გამოიცადენინ კაცად-კაცადმან, და მაშინ თავსა შინა ხოლო თჳსსა ქებაჲ იგი აქუნდინ და ნუ მოყუსისა მიმართ,

⁵რამეთუ კაცად-კაცადსა თჳსი ტჳრთი უტჳრთავს.

⁶ეზიარებოდენ უმეცარი იგი სიტყუასა მას მასწავლელისასა ყოველსა შინა კეთილსა.

⁷ნუ სცთებით, ღმერთი არავისგან შეურაცხ-იქმნების. რაჲცა სთესოს კაცმან, იგიცა მოიმკოს.

⁸რამეთუ რომელმან სთესოს ჴორცთა შინა თჳსთა, ჴორცთაცა შინა თჳსთა მოიმკოს ხრწნილებაჲ; ხოლო რომელმან სთესოს სულითა,სულისაგანცა მოიმკოს ცხოვრებაჲ საუკუნჱ.

⁹ხოლო კეთილისა საქმჱ ნუმცა გუეწყინების, რამეთუ ჟამსა თჳსსა მოვიმკოთ, და ნუმცა დავჰჴსნდებით.

¹⁰აწ უკუე, ვიდრე ჟამი გუაქუს-ღა, ვიქმოდით კეთილსა ყოველთა მიმართ, უფროჲს ხოლო სახლეულთა მათ მიმართ სარწმუნოებისათა.

¹¹აწ იხილეთ, რაოდენი წიგნები მივწერე ჴელითა ჩემითა თქუენდა.

¹²რომელთა-იგი ჰნებავს პირ-შუენიერებაჲ ჴორცითა, იგინი გაიძულებენ თქუენ წინადაცუეთასა, გარნა რაჲთა ჯუარსა ქრისტჱსსა არაშეუდგენ.

¹³არცაღა იგინი თჳთ წინადაცუეთილნი შჯულსა იმარხვენ, არამედ ჰნებავს თქუენი წინადაცუეთაჲ, რაჲთა თქუენითა მით ჴორცითაიქადოდიან;

¹⁴ხოლო ჩემდა ნუ იყოფინ სიქადულ, გარნა ჯუარითა უფლისა ჩუენისა იესუ ქრისტჱსითა, რომლისათჳს სოფელი ჩემდამო ჯუარს-ცუმულარს და მე -- სოფლისა.

¹⁵ამიერითგან არცა წინადაცუეთილებაჲ რაჲ არს, არცა წინადაუცუეთილებაჲ, არამედ ახალი დაბადებული.

¹⁶და რომელნი წესსა მას ზედა ეგნენ, მშჳდობაჲ მათ ზედა და წყალობაჲ ისრაჱლსა ზედა ღმრთისასა.

¹⁷ამიერითგან შურომასა ნუვინ შემამთხუევნ მე; რამეთუ მე ვნებანი იგი უფლისა ჩუენისა იესუ ქრისტჱსნი ჴორცთა შინა ჩემთა მიტჳრთვან.

¹⁸მადლი უფლისა ჩუენისა იესუ ქრისტჱსი სულისა თქუენისა თანა, ძმანო. ამენ.