Read ადიშის ოთხთავი 897 წ. – ძველი მონუსკრიპტები ეფესელთა მიმართ 1 Bible Online

ეფესელთა მიმართ 1 - ადიშის ოთხთავი 897 წ. – ძველი მონუსკრიპტები bible

ეფესელთა მიმართ 1

¹პავლე, მოციქული იესუ ქრისტჱსი ნებითა ღმრთისაჲთა, წმიდათა მაგათ, რომელნი ხართ ეფესოს შინა, ქრისტე იესუჲს მიმართთა:

²მადლი თქუენდა და მშჳდობაჲ ღმრთისა მიერ მამისა ჩუენისა და უფლისა ჩუენისა იესუ ქრისტჱსა.

³კურთხეულ არს ღმერთი და მამაჲ უფლისა ჩუენისა იესუ ქრისტჱსი, რომელმან-იგი მაკურთხნა ჩუენ ყოვლითა მით კურთხევითასულიერითა ცათა შინა ქრისტჱს მიერ.

⁴ვითარცა-იგი გამოგჳრჩინა ჩუენ მას შინა სოფლის დაბადების წინაჲთგან, რაჲთა ვიყვნეთ ჩუენ წმიდა და უბიწო წინაშე მისსა სიყუარულით.

⁵წინაჲსწარ გამოგუაჩინნა ჩუენ შვილებად იესუ ქრისტჱს მიერ მისა მიმართ სათნოებისაებრ ნებისა მისისა,

⁶საქებელად დიდებისა მადლისა მისისა, რომელ-იგი მოგუმადლა ჩუენ საყუარელისა მის მიერ,

⁷რომლისა მიერ გუაქუს ჩუენ გამოჴსნაჲ სისხლითა მისითა, მოტევებაჲ ცოდვათა ჩუენთაჲ სიმდიდრისაებრ მადლისა მისისა,

⁸რომელ-იგი გარდაჰმატა ჩუენდა მომართ ყოვლითა სიბრძნითა და გონიერებითა.

⁹გუაუწყა ჩუენ საიდუმლოჲ იგი ნებისა მისისაჲ სათნოებისაებრ მისისა, რომელ-იგი წინაჲსწარვე განაჩინა მას შინა

¹⁰განსაგებელად აღსავსებისა მის ჟამთაჲსა, თავად-ყოფად ყოველივე ქრისტჱს მიმართ, რაჲ-იგი არს ცათა შინა და ქუეყანასა ზედა;

¹¹მისა მიმართ, რომელსა ზედაცა განვეწესენით და წინაჲსწარ ვიჩინენით ნებითა ღმრთისაჲთა, რომელმან-იგი ყოველივე შექმნა ზრახვისაებრნებისა მისისა,

¹²რაჲთა ვიყვნეთ ჩუენ საქებელად დიდებისა მისისა, რომელნი-ესე წინაჲსწარ მოსავ ვიყვენით ქრისტესა.

¹³რომელ-იგი თქუენ გესმა სიტყუაჲ იგი ჭეშმარიტებისაჲ, სახარებაჲ იგი ცხოვრებისა თქუენისაჲ, რომლითა-იგი გრწმენა და აღიბეჭდენითსულითა მით წმიდითა აღთქუმისაჲთა,

¹⁴რომელ-იგი არს წინდი მკჳდრობისა ჩუენისაჲ გამოსაჴსრად შეწევნისა ჩუენისათჳს, საქებელად დიდებისა მისისა.

¹⁵ამისთჳს მეცა მესმა თქუენი ეგე სარწმუნოებაჲ უფლისა მიერ იესუ ქრისტჱსა და სიყუარული იგი, რომელ გაქუს ყოველთამიმართ წმიდათა.

¹⁶არა დავსცხრები მადლობითა თქუენთჳს, ჴსენებასა ვჰყოფ ლოცვათა შინა ჩემთა,

¹⁷რაჲთა ღმერთმან უფლისა ჩუენისა იესუ ქრისტჱსმან, მამამან დიდებისამან, მოგცეს თქუენ სული სიბრძნისაჲ და გამოცხადებისაჲმეცნიერებითა მისითა.

¹⁸და განანათლნეს თუალნი გულისა თქუენისანი, რაჲთა იცოდით თქუენ, რაჲ-იგი არს სასოებაჲ ჩინებისა მის მისისაჲ, და რაჲ-იგი არსსიმდიდრჱ დიდებისა მის მკჳდრობისა მისისაჲ წმიდათა შინა,

¹⁹და რაჲ-იგი არს გარდამატებული სიმდიდრჱ ძლიერებისა მისისაჲ ჩუენდა მომართ მორწმუნეთა შეწევნისაებრ სიმტკიცისა ძლიერებისამისისა,

²⁰რომელ ქმნა ქრისტჱს თანა, რამეთუ აღადგინა იგი მკუდრეთით და დასუა იგი მარჯუენით მისა ზეცათა შინა.

²¹უზეშთაეს ყოველთა მთავრობათა და ჴელმწიფებათა და ძალთა და უფლებათა და ყოველსავე სახელსა, რომელ სახელ-დებულ არს არახოლო ამას სოფელსა, არამედ მერმესაცა მას.

²²და ყოველივე დაამორჩილა ქუეშე ფერჴთა მისთა და იგი მოსცა მთავრობად უფროჲს ყოველთა ეკლესიასა.

²³რომელ-იგი არს გუამი მისი, აღსავსებაჲ იგი, რომელმან-იგი ყოველი ყოველსა შინა აღავსო.