Read ადიშის ოთხთავი 897 წ. – ძველი მონუსკრიპტები ეფესელთა მიმართ 3 Bible Online

ეფესელთა მიმართ 3 - ადიშის ოთხთავი 897 წ. – ძველი მონუსკრიპტები bible

ეფესელთა მიმართ 3

¹ამისთჳს მე, პავლე, კრული იესუ ქრისტჱსი, თქუენ წარმართთათჳს.

²უკუეთუ გასმიეს მოღუაწებაჲ იგი მადლისა მის ღმრთისაჲ, რომელ მოცემულ არს ჩემდა თქუენდა მიმართ,

³რამეთუ გამოცხადებით მეუწყა მე საიდუმლოჲ იგი, ვითარცა-იგი მცირედ უწინარჱს-რე მივწერე თქუენდა,

⁴რაოდენ შეუძლოთ ცნობად გულისხმის-ყოფაჲ იგი ჩემი საიდუმლოჲ იგი ქრისტჱსი,

⁵რომელ ნათესავსა სხუასა არა გამოეცხადა ძეთა კაცთასა, ვითარ-ესე აწ გამოეცხადა წმიდათა მოციქულთა მისთა და წინაჲსწარმეტყუელთასულითა წმიდითა,

⁶რაჲთა იყვნენ წარმართნი თანა-მკჳდრ და თანა-ჴორც და თანა-მყოფ აღთქუმისა მის ქრისტე იესუჲს მიერ სახარებითა მით,

⁷რომლისა ვიქმენ მე მსახურ ნიჭისა მისებრ მადლისა ღმრთისა, მოცემულისა ჩემდა შეწევნითა ძალისა მისისაჲთა.

⁸მე, უმრწემჱსსა ყოველთა წმიდათასა, მომეცა მადლი ესე წარმართთა შორის ხარებად გამოუკულეველი იგი სიმდიდრჱ ქრისტჱსი

⁹და განათლებად ყოველთა, რაჲ-იგი არს განგებაჲ საიდუმლოჲსა მის დაფარულისაჲ საუკუნითგან ღმრთისა თანა, რომელმან ყოველივედაჰბადა,

¹⁰რაჲთა ეუწყოს აწ მთავრობათა და ჴელმწიფებათა ზეცისათა ეკლესიაჲსაგან მრავალფერი იგი სიბრძნჱ ღმრთისაჲ

¹¹გულს-მოდგინებისაებრ საუკუნეთაჲსა, რომელ-იგი ქმნა ქრისტე იესუჲს მიერ, უფლისა ჩუენისა,

¹²რომლითა მაქუს ჩუენ განცხადებულებაჲ და მოსლვაჲ სასოებით სარწმუნოებითა მისითა.

¹³ამისთჳს ვითხოვ, რაჲთა არა გეწყინებოდის ჭირთა შინა ჩემთა, რომელ არს თქუენთჳს რომელ-იგი არს დიდება თქუენდა.

¹⁴ამისთჳს მოვიდრეკ მუჴლთა ჩემთა მამისა მიმართ,

¹⁵რომლისაგან ყოველნი ნათესავნი ცათა შინა და ქუეყანასა ზედა სახელ-დებულ არიან,

¹⁶რაჲთა მოგცეს თქუენ სიმდიდრისაებრ დიდებისა მისისა, ძალითა განმტკიცებად სულითა მისითა შინაგანსა კაცსა,

¹⁷დამკჳდრებად ქრისტე სარწმუნოებითა გულთა შინა თქუენთა,

¹⁸სიყუარულითა დამტკიცებულ და დაფუძნებულ, რაჲთა შეუძლოთ წარწევნად ყოველთა თანა წმიდათა, რაჲ-იგი არს სივრცჱ და სიგრძჱ,სიმაღლჱ და სიღრმჱ,

¹⁹ცნობად გარდარეული იგი მეცნიერებისა სიყუარული ქრისტჱსი, რაჲთა აღივსნეთ თქუენ ყოვლითა სავსებითა ღმრთისაჲთა.

²⁰ხოლო რომელი-იგი შემძლებელ არს უფროჲს ყოვლისა ყოფად უმეტჱს, რომელსა-იგი ვითხოვთ გინა თუ ვსცნობთ ძალისა მისებრ შეწევნისაჩუენ შორის,

²¹მისა დიდებაჲ ეკლესიასა შინა ქრისტე იესუჲს მიერ ყოველთა მიმართ ნათესავთა საუკუნეთა უკუნისამდე. ამენ.