Read ადიშის ოთხთავი 897 წ. – ძველი მონუსკრიპტები ეფესელთა მიმართ 6 Bible Online

ეფესელთა მიმართ 6 - ადიშის ოთხთავი 897 წ. – ძველი მონუსკრიპტები bible

ეფესელთა მიმართ 6

¹შვილნი მორჩილ იყვენით მამა-დედათა თქუენთა უფლისა მიერ, რამეთუ ესე არს სამართალი.

²პატივ-ეც მამას შენსა და დედასა შენსა, რომელ არს მცნებაჲ პირველი აღთქუმასა შინა,

³რაჲთა კეთილი გეყოს შენ, და დღეგრძელ იყო ქუეყანასა ზედა.

⁴და მამანი ეგე ნუ განარისხებთ შვილთა თქუენთა, არამედ განზარდენით იგინი სწავლითა და მოძღურებითა უფლისაჲთა.

⁵მონანი მორჩილ იყვენით ჴორციელთა უფალთა თქუენთა შიშით და ძწოლით, განმარტებულებითა გულისა თქუენისაჲთა, ვითარცაქრისტესა,

⁶და ნუ თუალთა წინაშე ხოლო თუალთ-ღებით, ვითარცა-იგი კაცთ-მოთნენი, არამედ ვითარცა მონანი ქრისტჱსნი, ჰყოფდიოთ ნებასაღმრთისასა გულითად;

⁷გონიერად ჰმონებდით ვითარცა უფალსა, და ნუ ვითარცა კაცსა;

⁸უწყოდეთ, რამეთუ რაჲცა ვინ ქმნეს კაცად-კაცადმან კეთილი გინა ბოროტი, იგიცა მოიღოს უფლისა მიერ, გინა თუ მონამან გინათუ აზნაურმან.

⁹და უფალნი ეგე ეგრევე ჰყოფდით მათა მიმართ, შეუნდობდით რისხვასა, უწყოდეთ, რამეთუ მათი და თქუენი უფალი ცათა შინა არს, დათუალთ-ღება არა არს მის თანა.

¹⁰ამიერითგან განძლიერდით უფლისა მიმართ და სიმტკიცითა ძლიერებისა მისისაჲთა;

¹¹შეიმოსეთ ფრიად-საჭურველი იგი ღმრთისაჲ, რაჲთა შეუძლოთ თქუენ წინა-დადგომად მანქანებათა მათ ეშმაკისათა,

¹²რამეთუ არა არს ბრძოლაჲ ჩუენი სისხლთა მიმართ და ჴორცთა, არამედ მთავრობათა მიმართ და ჴელმწიფებათა, სოფლის მპყრობელთა მათმიმართ ამის ბნელისათა, სულთა მიმართ უკეთურებისათა, რომელნი არიან ცასა ქუეშე.

¹³ამისთჳს აღიღეთ ფრიად-საჭურველი იგი ღმრთისაჲ, რაჲთა შეუძლოთ წინა-დადგომად დღესა მას ბოროტსა, და ყოველსავე იქმოდეთ,რაჲთა მტკიცედ სდგეთ.

¹⁴მტკიცედ უკუე დეგით, შეირტყენით წელნი თქუნნი ჭეშმარიტებითა, შეიმოსეთ ჯაჭჳ იგი სიმართლისაჲ.

¹⁵და შეისხენით ფერჴთა თქუენთა განმზადებულებაჲ იგი სახარებისა მის მშჳდობისაჲ.

¹⁶ყოველსა შინა აღიღეთ ფარი იგი სარწმუნოებისაჲ, რომლითა შეუძლოთ ყოველთა მათ ისართა უკეთურებისათა განჴურვებულთადაშრეტად;

¹⁷და ჩაფხუტი იგი ცხოვრებისაჲ დაიდგთ და მახჳლი იგი სულისაჲ, რომელ არს სიტყუაჲ ღმრთისაჲ.

¹⁸ყოვლითა ლოცვითა და ვედრებითა ილოცევდით ყოველსა ჟამსა სულითა და მისა მიმართ იღჳძებდით ყოვლითა კრძალულებითა დავედრებითა ყოველთა წმიდათათჳს

¹⁹და ჩემთჳსცა, რაჲთა მომეცეს მე სიტყუაჲ აღებასა პირისა ჩემისასა განცხადებულად უწყებად თქუენდა საიდუმლოჲ იგი სახარებისაჲ,

²⁰რომლისათჳს ვციქუ ჯაჭჳთურთ, რაჲთა მას შინა განვცხადნე, ვითარ-იგი ღირს ჩემდა სიტყუად.

²¹ხოლო თქუენცა რაჲთა უწყოდით ჩემთჳს, რასა ვიქმ, ყოველივე გაუწყოს ტჳქიკოს, საყუარელმან ძმამან და სარწმუნომან მსახურმან უფლისამიერ,

²²რომელი-იგი მივავლინე თქუენდა ამისთჳს, რაჲთა უწყოდით ჩუენთჳს და ნუგეშინის-სცეს გულთა თქუენთა.

²³მშჳდობაჲ ძმათა და სიყუარული სარწმუნოებითურთ ღმრთისა მიერ მამისა და იესუ უფლისა ჩუენისა იესუ ქრისტჱსა.

²⁴მადლი ყოველთა თანა მოყუარეთა უფლისა ჩუენისა იესუ ქრისტჱსთა უხრწნელებით. ამენ.