Read ადიშის ოთხთავი 897 წ. – ძველი მონუსკრიპტები ფილიპელთა მიმართ 1 Bible Online

ფილიპელთა მიმართ 1 - ადიშის ოთხთავი 897 წ. – ძველი მონუსკრიპტები bible

ფილიპელთა მიმართ 1

¹პავლე და ტიმოთე, მონანი იესუ ქრისტჱსნი, ყოველთა წმიდათა ქრისტე იესუჲს მიერ, რომელნი ხართ ფილიპეს შინა, ეპისკოპოსთა დადიაკონთა:

²მადლი თქუენდა და მშჳდობაჲ ღმრთისა მიერ მამისა ჩუენისა და უფლისა იესუ ქრისტჱსა.

³ვჰმადლობ ღმერთსა ჩემსა ყოველსა ზედა ჴსენებასა თქუენსა;

⁴მარადის ყოველთა შინა ლოცვათა ჩემთა თქუენ ყოველთათჳს სიხარულით ლოცვასა ვჰყოფ

⁵ზიარებისა მაგის თქუენისათჳს სახარებასა მას პირველით დღითგან მოაქამდე

⁶სასოებით ამისთჳსვე, რამეთუ რომელმან იწყოს თქუენ შორის საქმჱ კეთილი, აღასრულენ ვიდრე დღედმდე იესუ ქრისტჱსა.

⁷ვითარცა არს სამართალ ესე ჩემდა ზრახვად თქუენ ყოველთათჳს, რამეთუ მაჴსოთ მე თქუენ გულსა ჩემსა კრულებათა შინა ჩემთა და სიტყჳს-გებათა და დამტკიცებასა მას სახარებისასა, რაჲთა ჩემ თანა ზიარ მადლისა მის თქუენ ყოველნი იყვნეთ.

⁸მოწამე არს ჩემდა ღმერთი, ვითარ-იგი მსურის მე თქუენდა მოწყალებითა ქრისტე იესუჲსითა;

⁹და ამასცა ვილოცავ, რაჲთა სიყუარული იგი თქუენი უფროჲს და უმეტეს გარდაერიოს მეცნიერებითა და ყოვლითა ფრთხილებითა,

¹⁰რაჲთა გამოიცადოთ თქუენ უმჯობესი იგი და იყვნეთ თქუენ ჭეშმარიტ და დაუბრკოლებელ ვიდრე დღედმდე ქრისტე იესუჲსა,

¹¹აღსავსენი ნაყოფითა სიმართლისაჲთა ქრისტე იესუჲს მიერ სადიდებელად და საქებელად ღმრთისა.

¹²უწყებაჲ თქუენი მნებავს, ძმანო, რამეთუ ჩემთჳს უფროჲსღა წარსამატებელად სახარებისა მის მოივლინა,

¹³ვითარმედ კრულებანი ესე ჩემნი განცხადებულ იქმნნეს ქრისტჱს მიერ ყოველსა მას ტაძარსა და სხუათა მიმართ ყოველთა,

¹⁴და უმრავლესთა ძმათა უფლისა მიერ, მოსავთა მათ კრულებათა ჩემთათჳს, უმეტესღა ვიკადრებ უშიშად სიტყუასა მას ღმრთისასასიტყუად.

¹⁵რომელნიმე შურით და ჴდომით, რომელნიმე სათნოებისათჳს ქრისტესა ქადაგებენ;

¹⁶რომელნიმე -- სიყუარულით: უწყიან, რამეთუ სიტყჳს-გებად სახარებისა მისთჳს ვდგა მე.

¹⁷რომელნიმე ჴდომითა ქრისტესა მიმოდასდებენ არაწმიდებით, ჰგონებენ ჭირთა მოწევნად კრულებათა ამათ ჩემთა.

¹⁸აწ უკუე რაჲ? დაღათუ ყოვლითა სახითა, გინა თუ მიზეზით გინა ჭეშმარიტად, ქრისტე იქადაგების, და ამისთჳს მიხარის დამიხაროდისცა.

¹⁹უწყი, რამეთუ ესე მექმნეს მე საცხორებელად თქუენითა ვედრებითა და შეწევნითა სულისა ქრისტე იესუჲსითა,

²⁰მოსალოდებელითა მით და სასოებითა ჩემითა, რამეთუ არარაჲთ მრცხუენის, არამედ ყოვლითა კადნიერებითა, ვითარცა მარადის და აწცაიდიდოს ქრისტე ჴორცთა შინა ჩემთა, გინა თუ ცხორებით, გინა თუ სიკუდილით.

²¹რამეთუ ჩემდა ცხორებად ქრისტე არს, და სიკუდილი -- შესაძინელ.

²²უკუეთუ ცხორებაჲ იგი ჴორცითა ესე არს ნაყოფი საქმისა მის ჩემისაჲ, და რომელი გამოვირჩიო, არა ვიცი.

²³შეპყრობილ ვარ მე ორთა ამათგან: გული მეტყჳს განსლვად და ქრისტეს თანა ყოფად უფროჲსღა უმჯობეს.

²⁴ხოლო დადგრომაჲ ჴორცთა შინა უნებელადრე თქუენთჳს.

²⁵და ესე სასოებით უწყი, ვითარმედ დავადგრე და გგებდე თქუენ ყოველთა წარმართებისათჳს და სიხარულისა მისსარწმუნოებისა,

²⁶რაჲთა სიქადული ეგე თქუენი აღემატოს ქრისტე იესუჲს მიერ ჩემდა მომართ ჩემითა მით მისლვითა კუალად თქუენდა მომართ.

²⁷გარნა ღირსად ხოლო სახარებისა მის ქრისტესისა ვიდოდეთ, რაჲთა დაღათუ მოვიდე და გიხილე თქუენ, გინა თუ შორს ვიყო და მესმესთქუენთჳს, რამეთუ სდგათ თქუენ ერთითა სულითა და ერთითა გონებითა, თანა-მოღუაწე იყვენით სარწმუნოებითა მით სახარებისაჲთა,

²⁸და ნუ ჰფრთხებით ნურარაჲთ მჴდომთა მათგან, რომელ-იგი არს მათა სახჱ წარწყმედისაჲ, ხოლო თქუენდა -- ცხორება; და ესე ღმრთისამიერ.

²⁹რამეთუ თქუენ მოგემადლა ქრისტჱსთჳს არა ხოლო მისა მიმართ სარწმუნოებაჲ, არამედ მისთჳს ვნებაჲცა.

³⁰იგივე ღუაწლი გაქუნდინ, რომელ იხილეთ ჩემ თანა და აწ გესმის ჩემ მიერ.