Read ადიშის ოთხთავი 897 წ. – ძველი მონუსკრიპტები ფილიპელთა მიმართ 4 Bible Online

ფილიპელთა მიმართ 4 - ადიშის ოთხთავი 897 წ. – ძველი მონუსკრიპტები bible

ფილიპელთა მიმართ 4

¹ამიერითგან, ძმანო ჩემნო საყუარელნო და სასურველნო, სიხარულნო და გჳრგჳნნო ჩემნო, ესრჱთ მტკიცედ დეგით, საყუარელნო.

²ევდიას გლოცავ და სჳნტიქეს გლოცავ, მასვე ზრახვასა ჰზრახევდით უფლისა მიერ;

³ჰე, გლოცავ შენცა, ერთგულსა თანა-მეუღლესა, შეიწყნარენ ეგენი, რომელნი-ეგე სახარებასა მას თანა-მოღუაწე მექმნნეს მეკლემენტოსითურთ, თანა-შემწენი იგი ჩემნი და სხუანი, რომელთაჲ სახელები არს წიგნსა მას ცხოვრებისასა.

⁴გიხაროდენ მარადის უფლისა მიერ, მერმე გეტყჳ: გიხაროდენ.

⁵სიმდაბლჱ ეგე თქუენი ცხად იყავნ ყოველთა კაცთა. უფალი ახლოს არს.

⁶ნურას ჰზრუნავთ, არამედ ყოვლითა ლოცვითა და ვედრებითა მადლობით თხოვანი ეგე თქუენნი საცნაურ იყვნედ ღმრთისა მიმართ,

⁷და მშჳდობამან ღმრთისამან, რომელი ჰმატს ყოველთა გონებათა, განამტკიცენინ გულნი თქუენნი და გონებანი თქუენნი ქრისტე იესუჲსმიერ.

⁸ამიერითგან, ძმანო, რაჲ-იგი არს ჭეშმარიტ, რაჲ-იგი არს კეთილ, რაჲ-იგი არს მართალ, რაჲ-იგი არს სიწმიდე, რაჲ-იგი არსსაყუარელ, რაჲ-იგი არს საქებელ, სათნო და ქებულ, მას ზრახევდით.

⁹რომელცა-იგი ისწავეთ და მიიღეთ და გესმა და იხილეთ ჩემ თანა, მასცა იქმოდეთ; და ღმერთი მშჳდობისაჲ იყავნ თქუენ თანა.

¹⁰განვიხარე უფლისა მიერ დიდად, რამეთუ აწვე ეგერა აღმოცჱნებულ ხართ ჩემ კერძო ზრახვად, რომელსაცა-იგი ჰზრახევდით, ხოლოუხუებდითცა.

¹¹არა თუ ნაკლულევანებისათჳს რაჲსმე გეტყჳ თქუენ, რამეთუ მე მისწავიეს: რომელსა შინა, კმა-ვარი მე.

¹²ვიცი დამდაბლებაჲცა და ვიცი აღმაღლებაჲცა; ყოველთა მიმართ და ყოველსა შინა შეზმნულ ვარ: განძღებად და სიმშილდ, აღმატებად დადაკლებად.

¹³ყოველსავე შემძლებელ ვარ მის მიერ, რომელმან-იგი განმაძლიერა მე.

¹⁴ხოლო ესეცა კეთილად ჰყავთ, რამეთუ მეზიარენით ჭირთა ამათ ჩემთა.

¹⁵ხოლო ესე თქუენცა უწყით, ფილიპელნო, რამეთუ დასაბამსა მას სახარებისასა, რაჟამს გამოვედ მაკედონიაჲთ, არცა ერთიეკლესიაჲ მეზიარა მე მოცემისათჳს და მოღებისა, გარნა თქუენ მარტოდ.

¹⁶რამეთუ თესალონიკედცა ერთ-გზის და ორ-გზის საჴმარად ჩემდა მომიძღუანეთ.

¹⁷არა თუ საცემელსა ვეძიებ, არამედ ვეძიებ ნაყოფსა მას, რომელი აღემატების სახელად თქუენდა.

¹⁸მაქუს მე ყოველი და გარდამრევიეს; აღსავსე ვარ მოღებითა ეპაფროდიტჱსგან თქუენ მიერ სულითა სულნელებისაჲთა, მსხუერპლითა მითშეწირულითა სათნოჲთა ღმრთისაჲთა.

¹⁹ხოლო ღმერთმან ჩემმან აღავსენ ყოველი საჴმარი თქუენი სიმდიდრისაებრ მისისა დიდებით ქრისტე იესუჲს მიერ.

²⁰ხოლო ღმერთსა და მამასა ჩუენსა დიდებაჲ უკუნითი უკუნისამდე. ამენ.

²¹მოიკითხევდით ყოველთა წმიდათა ქრისტე იესუჲს მიერ. გიკითხვენ თქუენ ჩემთანანი ძმანი.

²²გიკითხვენ თქუენ ყოველნი წმიდანი, უფროჲსღა სახლისა მისგან კეისრისანი.

²³მადლი უფლისა ჩუენისა იესუ ქრისტჱსი სულისა თქუენისა თანა. ამენ.