Read ადიშის ოთხთავი 897 წ. – ძველი მონუსკრიპტები ფილიმონის მიმართ 1 Bible Online

ფილიმონის მიმართ 1 - ადიშის ოთხთავი 897 წ. – ძველი მონუსკრიპტები bible

ფილიმონის მიმართ 1

¹პავლე, კრული ქრისტე იესუჲსი, და ტიმოთე ძმაჲ ფილემონს, საყუარელსა და თანა-მოღუაწსა ჩუენსა.

²და ამფიას დასა, და არქიპოსს, თანა-მოსაგრესა ჩუენსა, და სახლისა შენისა კრებულთა.

³მადლი თქუენდა და მშჳდობაჲ ღმრთისა მიერ მამისა ჩუენისა და უფლისა ჩუენისა იესუქრისტჱსა.

⁴ვჰმადლობ ღმერთსა ჩემსა, მარადის ჴსენებასა შენსა ვჰყოფ ლოცვათა შინა ჩემთა.

⁵მესმის შენი ეგე სიყუარული და სარწმუნოებაჲ, რომელ გაქუს უფლისა მიმართ იესუ ქრისტჱსა და ყოველთა მიმართ წმიდათა,

⁶რაჲთა ზიარებაჲ ეგე სარწმუნოებისა შენისაჲ შეწევნულ იყოს მეცნიერებითა ყოვლისავეკეთილისაჲთა, რომელ არს ჩუენ შორის ქრისტე იესუჲს მიერ.

⁷რამეთუ სიხარული დიდი მაქუნდა და ნუგეშინის-ცემაჲ სიყუარულისა შენისათჳს,რამეთუ ნაწლევნი წმიდათანი განსუენებულ არიან შენთჳს, ძმაო.

⁸ამისთჳს ფრიადი კადნიერებაჲ მაქუს ქრისტე იესუჲს მიერ ბრძანებად შენდა ადვილი;

⁹სიყუარულისათჳს უფროჲსღა გლოცავ ესევითარი ესე, ვითარცა პავლე მოხუცებული,ხოლო აწ კრულიცა ქრისტე იესუჲსი.

¹⁰გლოცავ შენ შვილისა ჩემისათჳს, რომელი ვშევ კრულებათა შინა ონისიმე,

¹¹რომელი-იგი უჴმარ შენდა, ხოლო აწ ჩემდა და შენდა საჴმარ, რომელი მივავლინე შენდა,

¹²ხოლო შენ შეიწყნარე იგი, ესე არს ნაწლევნი ჩემნი,

¹³რომლისაჲ მეგულებოდა დაყენებად ჩემ თანა, რაჲთა შენ წილ მმსახურებდეს მეკრულებათა ამათ შინა სახარებისათა.

¹⁴ხოლო თჳნიერ ნებისა შენისა არა ვინებე ყოფად, რაჲთა არა უნებლებით კეთილი იგი შენი იყოს, არამედ ნებსით.

¹⁵ვინ უწყის, გან-ვე=ამისთჳს-გეშოვრა ჟამერთ, რაჲთა საუკუნოდ მიიყვანო

¹⁶არღარა ვითარცა მონაჲ, არამედ უფროჲს მონისა, საყუარელი ძმაჲ. ვინაჲთგან ჩემდაესრჱთ, რაოდენ უფროჲს შენდა ჴორციელადცა და უფლისა მიერცა!

¹⁷უკუეთუ შეგირაცხიე მე თანა-ზიარად, შეიწყნარე ეგე, ვითარცა მე.

¹⁸უკუეთუ რაჲმე შეგცოდა გინა თანა-აც, იგი მე შემირაცხე, მე გარდავიჴადო.

¹⁹მე, პავლე, დავწერე ჴელითა ჩემითა, რაჲთა არა გრქუა შენ, ვითარმედ შენცა თანა-მდებ ხარჩემდა.

²⁰ჰე, ძმაო, მე მოგიპოვე შენ უფლისა მიერ; განუსუენე ნაწლევთა ჩემთა ქრისტე იესუჲს მიერ.

²¹სასოებითა მორჩილებისა შენისაჲთა მივწერე შენდა, უწყი, რამეთუ რომლისათჳს-ესეგეტყჳ, ჰყოცა.

²²და ამას თანა განმიმზადე მე ვანიცა; რამეთუ ვესავ, ვითარმედ ლოცვითა თქუენითამიგემადლო თქუენ.

²³გიკითხავს შენ ეპაფრა, თანა-ტყუჱ ჩემი ქრისტე იესუჲს მიერ,

²⁴მარკოს, არისტარქოს, დემა, ლუკა, თანა-შემწენი ჩემნი.

²⁵მადლი თქუენ თანა. ამენ.