Read ქართული ბიბლია, სრული ვერსია 2 Samuel 14 Bible Online

2 Samuel 14 - ქართული ბიბლია, სრული ვერსია bible

2 Samuel 14

¹და შეიტყო იოაბმა, ცერუიას ძემ, რომ მეფეს გული მოუბრუნდა აბესალომზე.

²და გაგზავნა იოაბმა კაცი თეკოაყში და ერთი ჭკვიანი ქალი მოაყვანინა იქიდან, და უთხრა: „თავი მოიმგლოვიარე, ჩაიცვი სამგლოვიარო სამოსელი, ზეთს ნუ იცხებ და დიდი ხნის მგლოვიარე ქალივით იყავი;

³მიდი მეფესთან და უამბე ასე და ასე.“ და დაარიგა იოაბმა ქალს, რაც უნდა ეთქვა.

⁴და შევიდა თეკოაყელი ქალი მეფესთან, დაემხო მიწაზე, თაყვანი სცა და უთხრა: „მიშველე, მეფეო!“

⁵ჰკითხა მეფემ: „რა მოგსვლია?“ ქალმა უთხრა: „ქვრივი ქალი ვარ, ქმარი მომიკვდა;

⁶ორი ვაჟიშვილი ჰყავდა შენს მხევალს. მინდორში წაეკიდნენ ერთმანეთს, გამშველებელი არავინ იყო, დაჰკრა ერთმა მეორეს და მოკლა.

⁷და აჰა, აღდგა შენი მხევლის წინააღმდეგ მთელი ნათესაობა და მეუბნებიან: ‘მოგვეცი ძმის მკვლელი, რომ მოვკლათ ძმის სულის წილ, რომელიც მან მოკლა, და თვით მემკვიდრეც კი მოვუსპოთ.’ ამ ნაპერწკალსაც ჩამიქრობენ, რომელიც დამრჩა, და სახელს და შთამომავლობას არ დაუტოვებენ ჩემს ქმარს ამ ქვეყანაზე.“

⁸და უთხრა მეფემ ქალს: „წადი მშვიდად შინ. ბრძანებას გავცემ შენს შესახებ.“

⁹და უთხრა თეკოაყელმა ქალმა მეფეს: „ჩემზე, მეფე-ბატონო, და მამაჩემის სახლზე იყოს ცოდვა. მეფე და მისი ტახტი უბრალოა.“

¹⁰და უთხრა მეფემ: „აქ მომიყვანე შენი მოდავე და ვეღარ გაბედავს შენს შეწუხებას.“

¹¹და უთხრა მან: „ახსენე, მეფეო, უფალი, შენი ღმერთი, ვინძლო არ გამრავლდნენ სისხლისმაძიებელნი და არ დამიღუპონ შვილი.“ მეფემ უთხრა: „უფალს ვფიცავ, შენი შვილის თმის ერთი ღერიც არ დავარდება მიწაზე.“

¹²და უთხრა ქალმა: „ერთი სიტყვაც ათქმევინე მეფე-ბატონისთვის შენს მხევალს.“ და უთხრა: „თქვი.“

¹³უთხრა ქალმა: „რატომ ფიქრობ ასე ღვთის ერის წინააღმდეგ? საკუთარ თავს ამტყუნებს ამის მთქმელი მეფე, რადგან თავის განდევნილს უკან არ აბრუნებს.

¹⁴რადგან ყველანი დავიხოცებით და მიწაზე დაღვრილი წყალივით ვეღარ შევგროვდებით. მაგრამ ღმერთი არ გასწირავს კაცის სიცოცხლეს, და იმას ფიქრობს, რომ განდევნილიც კი არ მოიკვეთოს თავისგან საბოლოოდ.

¹⁵ახლა მოვედი, რომ ეს სიტყვები ვუთხრა ჩემს მეფე-ბატონს, რადგან ხალხი მაშინებს. იფიქრა შენმა მხევალმა: ვეტყვი მეფეს, იქნებ აღასრულოს მან თავისი მხევლის სათხოვარი,

¹⁶რომ მოუსმინოს მეფემ თავის მხევალს და დაგვიხსნას მათგან, ვინც მე და ჩემს შვილს ღვთის სამკვიდროდან ამოძირკვას გვიპირებს.“

¹⁷და თქვა შენმა მხევალმა: „ნუგეში იქნება ჩემთვის მეფე-ბატონის სიტყვა, რადგან ღვთის ანგელოზივით არის ჩემი მეფე-ბატონი, და გაარჩევს კეთილს და ბოროტს. შენთან იყოს უფალი, შენი ღმერთი.“

¹⁸და მიუგო მეფემ ქალს და უთხრა: „ერთ რამეს გკითხავ და ნუ დამიმალავ.“ და უთხრა ქალმა: „ბრძანოს მეფე-ბატონმა.“

¹⁹და თქვა მეფემ: „იოაბის ხელი ხომ არ ურევია შენთან ერთად ამ საქმეში?“ და მიუგო ქალმა და უთხრა: „მეფე-ბატონს ვფიცავ, თუ მარჯვნივ ან მარცხნივ გადაუხვიოს ვინმემ მეფე-ბატონის ნათქვამს. სწორედ შენმა მსახურმა იოაბმა დამარიგა და მან ჩააგონა შენს მხევალს ეს სიტყვები.

²⁰იგავის სახე რომ მიეცა ამ საქმისთვის, იმიტომ მოიქცა ასე იოაბი. მაგრამ ღვთის ანგელოზივით ბრძენია ჩემი ბატონი და ყველაფერს ხვდება ამ ქვეყანაზე.“

²¹და უთხრა მეფემ იოაბს: „რაკი შენ მოგიწყვია ეს საქმე, წადი და დააბრუნე ყმაწვილი აბესალომი.“

²²და პირქვე დაემხო იოაბი, თაყვანი სცა მეფეს და მადლი მოახსენა. და უთხრა იოაბმა: „ახლა სჯერა შენს მსახურს, რომ მადლი მიპოვია ჩემი მეფე-ბატონის თვალში, რადგან აღასრულა მეფემ თავისი მსახურის სათხოვარი.“

²³და ადგა და წავიდა იოაბი გეშურს და მოიყვანა აბესალომი იერუსალიმში.

²⁴და თქვა მეფემ: „დაბრუნდეს თავის სახლში, ოღონდ ვერ იხილავს ჩემს სახეს.“ და დაბრუნდა აბესალომი თავის სახლში და ვერ იხილა მეფის სახე.

²⁵და არავინ იყო აბესალომივით ლამაზი და ქებული კაცი მთელს ისრაელში, თავით ფეხთამდე უნაკლო იყო.

²⁶როცა თავს გაიკრეჭდა, — ის კი ყოველ წელს იკრეჭდა თმას, რადგან ამძიმებდა, — მოკრეჭილი თმა ორას შეკელს იწონიდა სამეფო საწონით.

²⁷და შეეძინა აბესალომს სამი ძე და ერთი ასული — სახელად თამარი. ძალიან ლამაზი შესახედაობის ქალი იყო იგი.

²⁸ორ წელს ცხოვრობდა აბესალომი იერუსალიმში, მაგრამ მეფის სახე არ უხილავს.

²⁹დაიბარა აბესალომმა იოაბი მეფესთან მისაგზავნად, მაგრამ არ ინდომა იოაბმა მისვლა. მეორედ დაიბარა, არც ახლა ინდომა მისვლა.

³⁰და უთხრა მან თავის მსახურთ: „მოათვალიერეთ იოაბის ყანა, ჩემს მეზობლად რომ არის, ქერი უთესია იქ, მიდით და გადაწვით.“ და გადაბუგეს ის ყანა აბესალომის მსახურებმა.

³¹ადგა იოაბი და მივიდა აბესალომთან სახლში და უთხრა: „რატომ გადამიწვეს ყანა შენმა მსახურებმა?“

³²უთხრა აბესალომმა იოაბს: „აჰა, დაგიბარე და შემოგითვალე: მოდი-მეთქი, მინდოდა მეფესთან გამეგზავნე და ეს მეთქმევინებინა: რისთვის მოვედი გეშურიდან? მიჯობდა იქ დავრჩენილიყავი. ახლა მინდა მეფის სახე ვიხილო. თუ დამნაშავე ვარ, ბარემ მომკალი.“

³³მივიდა იოაბი მეფესთან და მოახსენა. და უხმო მეფემ აბესალომს. ისიც მივიდა მეფესთან და მდაბლად თაყვანი სცა და აკოცა მეფემ აბესალომს.