Read ქართული ბიბლია, სრული ვერსია 1 Kings 19 Bible Online

1 Kings 19 - ქართული ბიბლია, სრული ვერსია bible

1 Kings 19

¹და უამბო ახაბმა იეზებელს ყველაფერი, რაც ელიამ გააკეთა, და ისიც, რომ მან მახვილით ამოხოცა წინასწარმეტყველნი.

²მოციქული გაუგზავნა იეზებელმა ელიას და შეუთვალა: „ასე და ასე მიყონ ღმერთებმა და უარესიც დამმართონ, თუ ხვალ ამ დროს ისევე არ მოგექცე, როგორც შენ მოექეცი თითოეულ იმათგანს.“

³შეეშინდა ელიას, ადგა და წავიდა, რათა თავი გადაერჩინა. და მივიდა იუდას ბეერ-შებაყში და დატოვა იქ თავისი მსახური.

⁴თავად კი უდაბნოში გავიდა ერთი დღის სავალზე, და მივიდა ერთი წნორნარის ბუჩქთან და მის ძირას დაჯდა, სიკვდილი ინატრა და თქვა: „ახლა კი კმარა, უფალო, წაიღე ჩემი სული, რადგან ჩემს მამებზე უკეთესი არა ვარ.“

⁵და მიწვა და მიეძინა წნორნარის ბუჩქის ძირას. და აჰა, ანგელოზი შეეხო მას და უთხრა: „ადექი, ჭამე.“

⁶გაიხედა ელიამ, და, აჰა, გამომცხვარი კვერი და წყლის დოქი უდგას თავით. და შეჭამა, დალია და ისევ დაიძინა.

⁷მეორედ მოვიდა უფლის ანგელოზი, შეეხო მას და უთხრა: „ადექი და ჭამე, რადგან წინ დიდი გზა გაქვს.“

⁸და ადგა, ჭამა, სვა და ამ საჭმლით მომაგრებულმა 40 დღე და 40 ღამე იარა ღვთის მთამდე, ხორებამდე.

⁹შევიდა ერთ მღვიმეში და იქ დაიღამა. და, აჰა, უფლის სიტყვა იყო მის მიმართ და უთხრა: „აქ რა გინდა, ელია?“

¹⁰და მიუგო მან: „ცაბაოთ უფალი ღმერთის მოშურნე ვარ, მაგრამ დაივიწყეს შენი აღთქმა ისრაელიანებმა, დაანგრიეს შენი სამსხვერპლოები, მახვილით დახოცეს შენი წინასწარმეტყველნი, მე ერთი დავრჩი, მაგრამ დამეძებენ, რათა სული ამომხადონ.“

¹¹ხოლო მან უთხრა: „გარეთ გამოდი და დადექი მთაზე უფლის წინაშე.“ და, აჰა, ჩაიარა უფალმა; და უფლის წინაშე ამოვარდა დიდი და ძლიერი ქარი, მთათა დამაქცეველი და კლდეთა შემმუსვრელი; მაგრამ ქარში არ იყო უფალი. ქარს მოჰყვა მიწისძვრა, არც მიწისძვრაში იყო უფალი;

¹²მიწისძვრას მოჰყვა ცეცხლი; მაგრამ არც ცეცხლში იყო უფალი. და ცეცხლს მოჰყვა ხმა ნელი ნიავისა.

¹³ეს რომ გაიგონა ელიამ, თავისი ხალენით დაიფარა სახე, გარეთ გავიდა და მღვიმის შესასვლელთან დადგა. და აჰა, ხმა იყო მასთან და უთხრა: „აქ რა გინდა, ელია?“

¹⁴და თქვა: „ცაბაოთ უფალი ღმერთის მოშურნე ვარ, მაგრამ დაივიწყეს შენი აღთქმა ისრაელიანებმა, და დაანგრიეს შენი სამსხვერპლოები, მახვილით დახოცეს შენი წინასწარმეტყველნი. მე ერთი დავრჩი, მაგრამ დამეძებენ, რათა სული ამომხადონ.“

¹⁵და უთხრა უფალმა: „წადი, გაბრუნდი შენი გზით უდაბნოზე და დამასკოში მიდი. როცა მიხვალ, სცხე ხაზაელს არამზე სამეფოდ.

¹⁶და იეჰუს, ნიმშის ძეს, სცხე ისრაელზე სამეფოდ. ელისეს კი, შაფატის ძეს, აბელ-მეხოლადან რომ არის, სცხე, რათა წინასწარმეტყველებდეს შენს ნაცვლად.

¹⁷და ასე მოხდება: ვინც ხაზაელის მახვილს გადაურჩება, იეჰუ მოკლავს მას; ვინც იეჰუს მახვილს გადაურჩება, ელისე მოკლავს მას.

¹⁸დავიტოვებ ისრაელში 7 ათას კაცს: ყველა მუხლს, რომელიც არ მოდრეკილა ბაყალის წინაშე და ყველა ბაგეს, რომელსაც არ უკოცნია მისთვის.“

¹⁹და წავიდა იქიდან და მოძებნა ელისე, შაფატის ძე, როცა ის ხნავდა; 12 უღელი ხარი ება და თავად ედგა მეთორმეტეს. ჩაუარა ელიამ და გადაუგდო თავისი ხალენი.

²⁰მიატოვა ხარები, გამოეკიდა ელიას და უთხრა: „გამიშვი, ვეამბორო ჩემს დედ-მამას და მერე წამოგყვები.“ უთხრა: „წადი და უკანვე დაბრუნდი, მე ხომ არ გაკავებ?“

²¹და მოცილდა მას, და აიღო და დაკლა უღელი ხარი, უღელს მოუკიდა და შეწვა ხორცი, და გაუნაწილა ხალხს, და მათაც ჭამეს. თავად კი ადგა და გაჰყვა ელიას, და ემსახურებოდა.