Read ქართული ბიბლია, სრული ვერსია 1 Kings 20 Bible Online

1 Kings 20 - ქართული ბიბლია, სრული ვერსია bible

1 Kings 20

¹ბენ-ჰადადმა, არამის მეფემ, შეკრიბა მთელი თავისი საომარი ძალები, თან იახლა 32 მეფე, და ცხენებითა და ეტლებით დაიძრა, შემოადგა სამარიას და ბრძოლა გაუმართა.

²და გაუგზავნა მოციქულები ახაბს, ისრაელის მეფეს, ქალაქში,

³და შეუთვალა: „ასე ამბობს ბენ-ჰადადი: ჩემია შენი ვერცხლი და შენი ოქრო, ჩემები არიანო შენი ცოლები და შენი რჩეული ძენი.“

⁴და მიუგო ისრაელის მეფემ და უთხრა: „შენი სიტყვისამებრ იყოს, ჩემო მეფე-ბატონო! მეც შენი ვარ და ყოველივე, რაც გამაჩნია, შენია.“

⁵კვლავ მოვიდნენ მოციქულები და თქვეს: „ასე ამბობს ბენ-ჰადადი: მე შემოგითვალე: მომეცი-მეთქი შენი ვერცხლი და შენი ოქრო, შენი ცოლები და შენი ძენი;

⁶ხვალ ამ დროს გამოგიგზავნი ჩემს მსახურთ, რათა დაათვალიერონ შენი სახლი და შენი მსახურების სახლები; და რაც მოეწონებათ, აიღონ და წამოიღონ.“

⁷და მოუხმო ისრაელის მეფემ ქვეყნის მთელ უხუცესობას და უთხრა: „ნახეთ და შეიგნეთ, რომ ცუდ ამბავს გვიპირებს ეს კაცი, რადგან ჩემი ცოლების, ჩემი ვაჟების და ჩემი ოქრო-ვერცხლის წასართმევად გამოგზავნა ხალხი, მე უარი არ მითქვამს მისთვის.“

⁸და უთხრა მთელმა უხუცესობამ და მთელმა ერმა: „ყურს ნუ დაუგდებ და ნურც დათანხმდები.“

⁹და უთხრა მან ბენ-ჰადადის მოციქულებს: „ასე უთხარით ჩემს მეფე-ბატონს: რაც პირველად შემოუთვალე შენს მსახურს, იმას კი გავაკეთებ, მაგრამ ამ საქმის გაკეთება არ შემიძლია.“ და წავიდნენ მოციქულები და მიუტანეს პასუხი.

¹⁰და შეუთვალა ბენ-ჰადადმა: „ასე და ასე მიყონ ღმერთებმა და მეტიც დამმართონ, თუ ეყოს სამარიის მიწის თითო პეშვი მათ, ვისაც წინ მოვუძღვივარ.“

¹¹და უპასუხა ისრაელის მეფემ: „სარტყლის შემორტყმისას ტრაბახს სარტყლის შემოხსნისას ტბაბახი სჯობს.“

¹²და გაიგონა ეს შემონათვალი სიტყვა ბენ-ჰადადმა, რომელიც მეფეებთან ერთად ჩარდახში სვამდა და უთხრა თავის მსახურთ: „შემოეწყვეთ!“ ისინიც შემოეწყვნენ ქალაქს.

¹³და აჰა, მიუახლოვდა ერთი წინასწარმეტყველი ახაბს, ისრაელის მეფეს, და უთხრა: „ასე ამბობს უფალი: ‘ხომ ხედავ ამ უამრავ ხალხს? ხელში ჩაგაგდებინებ დღეს ყველას, რათა იცოდე, რომ მე უფალი ვარ.’“

¹⁴და თქვა ახაბმა: „ვისი წყალობით?“ და თქვა: „ასე ამბობს უფალი: ‘მხარეთა მთავრების მსახურთა წყალობით.’“ და თქვა: „ვინ წამოიწყებს ბრძოლას?“ და თქვა: „შენ.“

¹⁵და დათვალა მხარეთა მთავრების მსახურნი და აღმოჩნდა 232 კაცი, მათ მერე დათვალა მთელი ხალხი, ყველა ისრაელიანი — 7 ათასი კაცი.

¹⁶შუადღისას გავიდნენ, როცა ბენ-ჰადადი სვამდა და თვრებოდა ჩარდახში თავის თანამდგომ 31 მეფესთან ერთად.

¹⁷პირველად მხარეთა მთავრების მსახურნი გავიდნენ. გაგზავნა ბენ-ჰადადმა და ამბავი მოუტანეს: ხალხი გამოდისო სამარიიდან.

¹⁸და თქვა: „თუ სამშვიდობოდ არიან გამოსულნი, ცოცხლად შეიპყარით. თუ საომრად არიან გამოსულნი, ასევე შეიპყარით ცოცხლად.“

¹⁹გამოვიდნენ ქალაქიდან მხარეთა მთავრების მსახურნი და ლაშქარი, მათ რომ მიჰყვებოდა უკან.

²⁰ყველამ თავ-თავისი მეტოქე დასცა ძირს. უკუიქცნენ არამელები და დაედევნა მათ ისრაელი. და გაიქცა ცხენით ბენ-ჰადადი, არამის მეფე, მხედრებთან ერთად.

²¹და გამოვიდა ისრაელის მეფე და დასცხო ცხენებსა და ეტლებს. და დიდი გამარჯვება მოიპოვა არამზე.

²²და მიუახლოვდა წინასწარმეტყველი ისრაელის მეფეს და უთხრა: „წადი, გამაგრდი და იფიქრე, რა უნდა გააკეთო, რადგან წელიწადი შემობრუნდება და დაგესხმის თავს არამის მეფე.“

²³და უთხრეს მისმა მსახურებმა არამის მეფეს: „მთათა ღმერთია მათი ღმერთი, ამიტომაც გვძლიეს. თუ ვაკეზე შევებრძოლებით, უსათუოდ ვძლევთ.

²⁴აბა, ასე მოიქეცი: თავ-თავის ადგილებს მოაშორე მეფეები და მათ ნაცვლად ერისმთავარნი დააყენე.

²⁵შეჰყარე იმდენივე ჯარი, რამდენიც დაგეღუპა, იმდენივე ცხენი, რამდენიც გყავდა, და იმდენივე ეტლი, რამდენიც გქონდა. ვაკეზე შევებრძოლოთ მათ და უსათუოდ დავამარცხებთ.“ ყურად იღო მათი სიტყვა და ასე გააკეთა.

²⁶და როცა მობრუნდა წელიწადი, დაათვალიერა თავისი ლაშქარი არამის მეფემ და გაემართა აფეკისკენ ისრაელის ძეებთან საომრად.

²⁷და დაეწყვნენ ისრაელიანებიც, საგზალი მიიღეს და მათ შესახვედრად დაიძრნენ. თხის ორი ჯოგივით დაიბანაკეს ისრაელიანთ მათ პირისპირ, ხოლო არამელებმა დაფარეს მიწა.

²⁸და გამოჩნდა ღვთისკაცი და უთხრა ისრაელის მეფეს: „ასე ამბობს უფალი: ‘რაკი თქვეს არამელებმა უფალზე, მთების ღმერთი არისო და ვაკეების ღმერთი არ არისო, მთელ ამ ურიცხვ ლაშქარს ხელში ჩაგაგდებინებ, რათა იცოდეთ, რომ უფალი ვარ.’“

²⁹ასე იყვნენ დაბანაკებულნი ერთმანეთის პირისპირ შვიდ დღეს. მეშვიდე დღეს გაიმართა ბრძოლა და გაწყვიტეს ისრაელიანთ არამელნი — 100 ათასი ქვეითი ერთ დღეს.

³⁰დანარჩენები ქალაქ აფეკში გაიქცნენ, დანარჩენი 27 ათასი კაცი კი კედელმა დაიტანა. ბენ-ჰადადიც გაიქცა, ქალაქში მივიდა და ერთი ოთახიდან მეორეში იმალებოდა.

³¹და უთხრეს მისმა მსახურებმა: „გვსმენია, გულმოწყალენი ყოფილან ისრაელის სახლის მეფეები; წელზე ჯვალოს შემოვიკრავთ, თავზე საბლებს დავიწყობთ და გავალთ ისრაელის მეფესთან, ვინძლო ცოცხლები დაგვტოვოს.“

³²წელზე ჯვალო შემოიკრეს, თავზე საბლები დაიდეს, და მივიდნენ ისრაელის მეფესთან და უთხრეს: „შენი მსახური ბენ-ჰადადი გთხოვს, სიცოცხლე შემინარჩუნეო.“ და თქვა: „ჯერ კიდევ ცოცხალია? ის ჩემი ძმა არის.“

³³და ინიშნეს ეს ამ კაცებმა, არ დაიბნენ და სასწრაფოდ მიუგეს: „შენი ძმა არის ბენ-ჰადადი.“ და თქვა მეფემ: „წადით და მოიყვანეთ.“ და გამოვიდა მასთან ბენ-ჰადადი და ეტლზე დაისვა იგი მეფემ.

³⁴და უთხრა: „დაგიბრუნებ იმ ქალაქებს, მამაშენს რომ წაართვა მამაჩემმა. იქონიე ქუჩები დამასკოში, როგორც მამაჩემს ჰქონდა სამარიაში. მე კი ხელშეკრულების დადებით გაგისტუმრებ.“ დაუდო ხელშეკრულება და გაისტუმრა.

³⁵და უთხრა ერთმა წინასწარმეტყველთა დასიდან მეორეს უფლის სიტყვით: მცემეო. და არ ინდომა ამ კაცმა მისი ცემა.

³⁶და უთხრა: „რაკი არ გაიგონე უფლის ხმა, აჰა, წახვალ თუ არა ჩემგან, ლომი მოგკლავს.“ წავიდა მისგან კაცი, შემოეყარა ლომი და მოკლა.

³⁷და მოძებნა სხვა კაცი და უთხრა: მცემეო. მაგრად სცემა იმ კაცმა და დააწყლულა.

³⁸და წავიდა წინასწარმეტყველი და დახვდა მეფეს გზაზე, სახეზე რიდე ჰქონდა აფარებული.

³⁹და როცა გამოიარა მეფემ, შეჰბღავლა მან მეფეს და უთხრა: „შუაგულ ბრძოლაში იყო შენი მსახური, როცა ვიღაც უცნობმა მომიყვანა კაცი და მითხრა: უყარაულე ამ კაცს; თუ დაიკარგა, შენი სული მისი სულის წილ იყოს, ანდა ერთი ტალანტი ვერცხლი გადაიხადეო.

⁴⁰და გაერთო საქმით შენი მსახური და, აჰა, სადღაა ის კაცი.“ და უთხრა მას ისრაელის მეფემ: „შენ თავად გამოგიტანია განაჩენი საკუთარი თავისათვის.“

⁴¹და მყისვე გადაიძრო რიდე სახეზე და იცნო ისრაელის მეფემ, წინასწარმეტყველი დაინახა მასში.

⁴²და უთხრა წინასწარმეტყველმა: „ასე ამბობს უფალი: ‘რაკი ხელიდან გაუშვი ჩემი დარისხებული კაცი, იყოს შენი სული მისი სულის წილ, და შენი ხალხი — მისი ხალხის წილ.’“

⁴³და წავიდა ისრაელის მეფე შინისაკენ დამწუხრებული და შეშფოთებული და მივიდა სამარიას.