Read ქართული ბიბლია, სრული ვერსია 2 Kings 25 Bible Online

2 Kings 25 - ქართული ბიბლია, სრული ვერსია bible

2 Kings 25

¹თავისი მეფობის მეცხრე წლის, მეათე თვის, მეათე დღეს, წამოვიდა ბაბილონის მეფე ნაბუქოდონოსორი მთელი თავისი ლაშქრითურთ იერუსალიმის წინააღმდეგ; შემოადგა მას და მიწაყრილები მოუწყო ირგვლივ.

²და იყო ალყაში ქალაქი მეფე ცედეკიას მეთერთმეტე წლამდე.

³მეოთხე თვის მეცხრე დღეს შიმშილი გაძლიერდა ქალაქში, და აღარაფერი ჰქონდა ხალხს საჭმელად.

⁴და გატყდა ქალაქი, და გაიქცნენ მეფე და მისი მხედრობა ღამით ორ კედელს შუა კარიბჭისკენ მიმავალი გზით, სამეფო ბაღთან რომ არის. ქალაქის ირგვლივ იდგნენ ქალდეველები, ხოლო ცედეკიამ მიმართა დაბლობისაკენ მიმავალ გზას.

⁵და დაედევნა ქალდეველთა ლაშქარი მეფეს, და მიეწივნენ იერიხოს დაბლობზე და მთელი ლაშქარი გაეფანტა მას.

⁶შეიპყრეს მეფე და მიუყვანეს ბაბილონის მეფეს რიბლაში, და მსჯავრი დაადეს:

⁷თვალწინ დაუკლეს ძენი ცედეკიას, ხოლო თავად მას თვალები დასთხარეს, ბრინჯაოს ბორკილები დაადეს და ბაბილონში წაიყვანეს.

⁸მეხუთე თვის მეშვიდე დღეს, ეს იყო ბაბილონის მეფის, ნაბუქოდონოსორის მეცხრამეტე წელი, იერუსალიმში მოვიდა ნებუზარადანი, ქონდაქართუხუცესი, ბაბილონის მეფის მსახური,

⁹და გადაწვა უფლის სახლი და მეფის სახლი, და იერუსალიმის ყველა სახლი, ყველა დიდი სახლი ცეცხლს მისცა.

¹⁰და დაანგრია კედლები იერუსალიმის ირგვლივ ქალდეველთა ლაშქარმა, რომელიც ქონდაქართუხუცესს ახლდა.

¹¹ქალაქში დარჩენილი მოსახლეობა და ისინი, ვინც ბაბილონის მეფეს ჩაბარდნენ, სხვადასხვა ჭრელ ხალხთან ერთად აჰყარა ქონდაქართუხუცესმა ნებუზარადანმა;

¹²და ნაწილი ქვეყნის ხალხისა მევენახეებად და მხვნელ-მთესველებად დატოვა ქონდაქართუხუცესმა.

¹³და ბრინჯაოს სვეტები, უფლის სახლში რომ იდგა, და კვარცხლბეკები და ბრინჯაოს ზღვა, უფლის სახლში რომ იდგა, დალეწეს ქალდეველებმა და ბრინჯაო ბაბილონში წაიღეს.

¹⁴ქვაბები, აქანდაზები, მაშები, კოვზები, ბრინჯაოს მთელი ჭურჭელი, ღვთისმსახურებისას რომ იყენებდნენ, წაიღეს.

¹⁵სასაკმევლეები და სასხურებლები, რაც ოქროსი და ვერცხლისა იყო, ქონდაქართუხუცესმა წაიღო.

¹⁶წყვილი სვეტიც, ერთი ზღვა და კვარცხლბეკები, სოლომონმა რომ დაამზადა უფლის ტაძრისთვის, — აუწონავი იყო ბრინჯაო, რისგანაც ეს საგნები იყო გაკეთებული.

¹⁷18 წყრთა იყო ერთი სვეტის სიმაღლე, ზედ ბრინჯაოს გვირგვინი ჰქონდა. და სამი წყრთა იყო გვირგვინის სიმაღლე. ცხაური და ბროწეულები გვირგვინის გარშემო, ყველაფერი ბრინჯაოსა იყო. ასეთივე იყო მეორე სვეტი ცხაურიანად.

¹⁸და გამოიყვანა ქონდაქართუხუცესმა მღვდელმთავარი სერაია, მეორე მღვდელი ცეფანია და ზღურბლის სამი მცველი.

¹⁹ქალაქიდან გამოიყვანა ერთი საჭურისი, რომელიც მეომრებს ზედამხედველობდა, და ხუთი კაცი, წინაშე მდგომელნი მეფისა, რომლებიც ქალაქში იმყოფებოდნენ, ლაშქრის მთავრის მწიგნობარი, რომელიც იწერდა ჯარში ჩასარიცხად ხალხს, და 600 კაცი ხალხიდან, რომლებიც ქალაქში იმყოფებოდნენ.

²⁰და წაიყვანა ისინი ნებუზარადანმა, ქონდაქართუხუცესმა, და მიჰგვარა ბაბილონის მეფეს რიბლაში.

²¹და დაჰკრა მათ ბაბილონის მეფემ და დახოცა რიბლაში, ხამათის მხარეში. და აჰყარა იუდა თავისი ქვეყნიდან.

²²იუდას ქვეყანაში დარჩენილ ხალხზე კი, რომელიც იქ დატოვა ნაბუქოდონოსორმა, ბაბილონის მეფემ, უფროსად დანიშნა გედალია, ძე ახიკამისა, შაფანის ძისა.

²³როცა გაიგეს მხედართმთავრებმა და მათმა კაცებმა, რომ ბაბილონის მეფემ გედალია დანიშნაო უფროსად, მასთან მივიდნენ მიცფაში. ესენი იყვნენ: ისმაელ ნეთანიას ძე, იოხანან კარეახის ძე, სერაია, ნეტოფათელი თანხუმეთის ძე, იააზანია მაყაქათელის ძე და მათი ხალხი.

²⁴და შეჰფიცა გედალიამ მათ და მათ ხალხს და უთხრა: „ნუ გეშინიათ ქალდეველთა მორჩილებისა, დასახლდით ქვეყანაში და ემსახურეთ ბაბილონის მეფეს, და კარგი იქნება თქვენთვის.“

²⁵მეშვიდე თვეს მოვიდა ისმაელი, ძე ნეთანიასი, ელიშამაყის ძისა, მეფეთა ნათესავი, ათი კაცითურთ, და მოკლა გედალია და ამოხოცა იუდაელები და ქალდეველები, ვინც მიცფაში ახლდნენ გედალიას.

²⁶და ადგა მთელი ხალხი დიდიან-პატარიანად და მხედართმთავრები, და ეგვიპტეში გადაიხვეწნენ ქალდეველების შიშით.

²⁷იუდას მეფის, იეჰოიაქინის გადასახლებიდან ოცდამეჩვიდმეტე წლის თავზე, მეთორმეტე თვეს, თვის ოცდამეშვიდე დღეს, ევილ-მეროდაქმა, ბაბილონის მეფემ, თავისი გამეფების წელს, საპყრობილიდან იპატივა იოიაქინი, იუდას მეფე.

²⁸და კეთილად ელაპარაკა და დაუდგა ტახტი იმ მეფეთა ტახტზე მაღლა, რომლებიც ბაბილონში ჰყავდა მას.

²⁹და გამოუცვალა საპყრობილის ტანისამოსი და მის წინ ჭამდა იგი პურს მთელი სიცოცხლე.

³⁰და მისი სარჩო, სამუდამო სარჩო, ეძლეოდა მეფისაგან ყოველდღიურად, მთელი სიცოცხლის მანძილზე.