Read ქართული ბიბლია, სრული ვერსია 1 Chronicles 18 Bible Online

1 Chronicles 18 - ქართული ბიბლია, სრული ვერსია bible

1 Chronicles 18

¹ამის შემდეგ იყო, რომ დაამარცხა დავითმა ფილისტიმელები, და დაიმორჩილა ისინი და ხელიდან გამოგლიჯა მათ გათი თავისი დაბა-სოფლებითურთ.

²და დაამარცხა მოაბიც. და გახდნენ მოაბელნი დავითის მსახურნი და მოხარკენი.

³და დაამარცხა დავითმა ჰადადყეზერი, ცობას მეფე, ხამათში, როცა ის ევფრატზე ბატონობის განსამტკიცებლად მიდიოდა,

⁴და წაართვა მას დავითმა ათასი ეტლი, 7 ათასი ცხენოსანი და 20 ათასი ქვეითი. ეტლის ცხენებს მყესები გადაუჭრა დავითმა, 100 ეტლი დატოვა მათგან.

⁵და მოვიდნენ დამასკოს არამელები ცობას მეფის ჰადადყეზერის დასახმარებლად და მუსრი გაავლო დავითმა არამელთაგან 22 ათასი კაცს.

⁶და დაადგინა დავითმა ხელისუფალნი დამასკოს არამში და გახდნენ არამელები დავითის მსახურნი და მოხარკენი. სადაც არ უნდა წასულიყო დავითი, ყველგან უფალი შეეწეოდა.

⁷და აიღო დავითმა ოქროს ფარები, ჰადადყეზერის მსახურებს რომ ჰქონდათ, და იერუსალიმში მოიტანა.

⁸დიდძალი ბრინჯაო წამოიღო დავითმა ტიბხათიდან და ქუნიდან, ჰადადყეზერის ქალაქებიდან, რისგანაც შემდეგ სოლომონმა გააკეთა ბრინჯაოს ჭურჭელი.

⁹და შეიტყო თოყუმ, ხამათის მეფემ, რომ სძლია დავითმა ჰადადყეზერს, და ცობას მეფეს,

¹⁰და გაგზავნა თავისი ძე ადორამი დავით მეფესთან მოსაკითხად და მისალოცად, რომ შეებრძოლა ჰადადყეზერს და სძლია, რადგან თოყუს მოსისხლე იყო ჰადადყეზერი; თან გაატანა ოქრო-ვერცხლისა და ბრინჯაოს ჭურჭელი.

¹¹მეფე დავითმა ესეც უფალს შესწირა იმ ოქრო-ვერცხლთან ერთად, დამორჩილებულ ხალხებს: ედომს, მოაბს, ყამონელთ, ფილისტიმელთ და ყამალეკს რომ წაართვა.

¹²აბიშაი ცერუიას ძემ 18 ათასი ედომელი ამოწყვიტა მარილოვან ველზე,

¹³და დააყენა ედომში ხელისუფალნი და გახდა მთელი ედომი დავითის მსახური. და ყველგან, სადაც არ უნდა წასულიყო, უფალი შეეწეოდა დავითს.

¹⁴და მეფობდა დავითი მთელს ისრაელზე და წესსა და სამართალს აძლევდა თავის ხალხს.

¹⁵იოაბ ცერუიას ძე, სარდალი იყო, ხოლო იოშაფატ ახილუდის ძე — მემატიანე;

¹⁶ცადოკ ახიტუბის ძე და აბიმელექ აბიათარის ძე მღვდლები იყვნენ, ხოლო შავშა მწერალი იყო.

¹⁷ბენაია იეჰოიადაყის ძე ქერეთელებსა და ფელეთელებს განაგებდა; ხოლო დავითის ძენი პირველნი იყვნენ მეფის გვერდით.