Read ქართული ბიბლია, სრული ვერსია 1 Chronicles 23 Bible Online

1 Chronicles 23 - ქართული ბიბლია, სრული ვერსია bible

1 Chronicles 23

¹მოხუცდა დავითი და გაძღა წლებით, და თავისი ძე, სოლომონი, დასვა ისრაელის მეფედ.

²და შეკრიბა ისრაელის მთავრები, მღვდლები და ლევიანები.

³და აღრიცხეს ლევიანები 30 წელს გადაცილებული ლევიანები. და გამოვიდა სულ 38 ათასი კაცი.

⁴აქედან 24 ათასი უფლის ტაძრის საქმეს უძღვებოდა, 6 ათასი კი მოხელეები და მსაჯულები იყვნენ.

⁵კარისმცველი 4 ათასი იყო, 4 ათასი კი უფალს ადიდებდა იმ საკრავებით, რომლებიც დავითმა გააკეთა.

⁶და დაყო დავითმა ისინი ლევის, გერშონის, კოჰათის და მერარის ძეთა დასებად.

⁷გერშონელთაგან იყვნენ: ლაყდანი და შიმეყი;

⁸ლაყდანის ძენი: უფროსი იეხიელი, ზეთამი და იოელი — სამნი.

⁹შიმეყის ძენი: შელომითი, ხაზიელი და ჰარანი — სამნი. ესენი არიან ლაყდანის მამისსახლთა თავკაცები.

¹⁰შიმეყის ძენი: იახათი, ზინა, იეყუში და ბერიყა. ესენი არიან შიმეყის ძენი — ოთხნი.

¹¹იახათი უფროსი იყო, ზიზა — მომდევნო; იეყუშსა და ბერიყას ძალიან ცოტა შვილები ჰყავდათ, ამიტომ აღრიცხვისას ერთ მამისსახლს შეადგენდნენ.

¹²კოჰათის ძენი: ყამრამი, იცჰარი, ხებრონი და ყუზიელი — ოთხნი.

¹³ყამრამის ძენი: აარონი და მოსე. აარონი იმისთვის გამოირჩა, რომ წმიდათა წმიდისთვის ეკურთხებინათ იგი და მისი ძენი სამარადისოდ, რათა მათ ეკმიათ უფლის წინაშე, რათა სამსახური გაეწიათ მისთვის და მისი სახელით უკუნისამდე ეკურთხებინათ.

¹⁴მოსე ღვთისკაცი იყო და მისი ძენი ლევიანთა ტომს მიათვალეს.

¹⁵მოსეს ძენი: გერშომი, ელიყეზერი.

¹⁶გერშომის ძე: შებუელი — უფროსი.

¹⁷ელიყეზერის ძე: რეხაბია — უფროსი. ელიეზერს მეტი შვილი არც ჰყოლია, რეხაბიას ძენი კი ძალიან გამრავლდნენ.

¹⁸იცჰარის ძე: შელომითი — უფროსი.

¹⁹ხებრონის ძენი: იერია — უფროსი, ამარია — მეორე, იახაზიელი — მესამე, იეკამეყამი — მეოთხე,

²⁰ყუზიელის ძენი: მიქა — უფროსი, იშია — მეორე.

²¹მერარის ძენი: მახლი და მუში; მახლის ძენი: ელეაზარი და კიში.

²²ელეაზარი ისე მოკვდა, რომ ვაჟი არ ჰყოლია, მხოლოდ ასულები დარჩა. ისინი კიშის ძეებმა — ბიძაშვილებმა — შეირთეს.

²³მუშის ძენი: მახლი, ყედერი და იერემოთი — სამნი.

²⁴აჰა, ლევის ძენი, თავ-თავიანთი მამისსახლების მიხედვით, მამისსახლთა თავკაცები, სახელებისა და სულადობის რიცხვის მიხედვით აღრიცხულნი, რომელნიც უფლის ტაძრის სამსახურს უძღვებოდნენ, 20 წელს გადაცილებულნი.

²⁵რადგან თქვა დავითმა: „უფალმა ღმერთმა მისცა მშვიდობა ისრაელს, თავის ერს, და იერუსალიმში დამკვიდრდა იგი უკუნისამდე.

²⁶და აღარც ლევიანებს დასჭირდებათ სამსახურის გასაწევად სავანისა და მისი ჭურჭლის ტარება.“

²⁷დავითის უკანასკნელი სიტყვების მიხედვით აღრიცხეს 20 წელს გადაცილებული ლევიანები,

²⁸რათა ისინი მდგარიყვნენ აარონის ძეთა გვერდით, ემსახურათ უფლის სახლში, ეზოებში და ოთახებში, სუფთად შეენახათ ყოველი სიწმიდე და აღესრულებინათ ღვთის სახლის სამსახური.

²⁹და ეზრუნათ საწინაშეო პურზე, ძღვენზე, უფუარ კვერებზე, ტაფებზე და შესაწვავზე, ყველაფრის ზომა-წონაზე,

³⁰დილა-საღამოობით უფლის ქება-დიდებაზე,

³¹და ყველა სრულადდასაწველზე უფლისათვის შაბათობით, ახალმთვარობების დღესასწაულების განსაზღვრულ რიცხვებში, როგორც მათთვისაა დაწესებული, უფლის წინაშე მარად აღსასრულებლად,

³²რომ დაიცვან დადგენილება სადღესასწაულო კარვის შესახებ, დადგენილება საწმიდრის შესახებ და დადგენილება აარონის ძეთა — მათი ძმების — შესახებ, უფლის სახლში სამსახურის გასაწევად.