Read ქართული ბიბლია, სრული ვერსია 2 Chronicles 11 Bible Online

2 Chronicles 11 - ქართული ბიბლია, სრული ვერსია bible

2 Chronicles 11

¹და მივიდა რეხობოყამი იერუსალიმში და შეჰყარა იუდას და ბენიამინის მთელი სახლი — 180 ათასი რჩეული მეომარი, რათა შებრძოლებოდნენ ისრაელს რეხობოყამისათვის მეფობის დასაბრუნებლად.

²და გამოეცხადა უფლის სიტყვა შემაყიას, ღვთისკაცს:

³„უთხარი რეხობოყამს, სოლომონის ძეს, იუდას მეფეს, მთელ ისრაელს და ბენიამინის მთელ სახლს:

⁴ასე ამბობს-თქო უფალი: ‘ნუ გახვალთ საომრად თქვენს ძმებთან! თავ-თავის სახლში გაბრუნდეს ყველა, რადგან ჩემი ნებით მოხდა ეს ამბავი.’“ და ისმინეს უფლის სიტყვა და იერობოყამთან საომრად გასულნი უკან გაბრუნდნენ.

⁵რეხობოყამი იერუსალიმში ცხოვრობდა და ციხესიმაგრეებად აქცია ქალაქები იუდაში.

⁶მან გაამაგრა: ბეთლემი, ყეტამი და თეკოაყი,

⁷ბეთ-ცური, სოქო, ყადულამი,

⁸გათი, მარეშა, ზიფი,

⁹ადორაიმი, ლაქიში, ყაზეკა,

¹⁰ცორყა, აიალონი, ხებრონი — გამაგრებული ქალაქები — იუდასა და ბენიამინს რომ ეკუთვნოდა.

¹¹და გაამაგრა ეს ციხესიმაგრეები, და ჩააყენა მათში წინამძღოლნი და მისცა სურსათ-სანოვაგის, ზეთისა და ღვინის მარაგი.

¹²და ყველა ქალაქს ფარ-შუბები ჩამოურიგა და ძლიერ გაამაგრა. მის ხელში იყო იუდა და ბენიამინი.

¹³მღვდლები და ლევიანები, ვინც კი იყო მთელს ისრაელში, თავ-თავიანთი საზღვრებიდან შეუდგნენ მას.

¹⁴ვინაიდან ტოვებდნენ ლევიანები თავიანთ სანახებს, სამფლობელოებს და მიდიოდნენ იუდაში და იერუსალიმში, რადგან იერობოყამი და მისი ძენი უშლიდნენ მათ უფლის მღვდლობას.

¹⁵და დაიყენა იერობოყამმა მღვდლები გორაკებზე, ციკნებისათვის და ხბორებისთვის, თვითონ რომ გააკეთებინა.

¹⁶მათ მიჰყვნენ ისრაელის ყველა ტომიდან, ვინც გულით ეძებდა უფალს, ისრაელის ღმერთს. ისინი მოვიდნენ იერუსალიმში, რომ მსხვერპლი შეეწირათ უფლისათვის, თავიანთი მამების ღმერთისათვის.

¹⁷და გაამაგრეს იუდას სამეფო და სამ წელიწადს მხარს უჭერდნენ რეხობოყამს, სოლომონის ძეს, რადგან ამ სამ წელიწადს დადიოდა იგი დავითისა და სოლომონის გზით.

¹⁸რეხობოყამმა ცოლად შეირთო მახალათი, რომლის მამა იყო იერიმოთ დავითის ძე, დედა კი — ელიაბ იესეს ძის ასული აბიხაილი.

¹⁹და შეეძინა მას ვაჟები: იეყუში, შემარია და ზაჰამი.

²⁰მის შემდეგ შეირთო მაყაქა, აბესალომის ასული, რომელმაც მას უშვა: აბია, ყათაი, ზიზა, შელომითი.

²¹რეხობოყამს ყველა თავის ცოლზე და ხარჭაზე მეტად უყვარდა მაყაქა, აბესალომის ასული (მას 18 ცოლი და 60 ხარჭა ჰყავდა. და შეეძინა 28 ვაჟი და 60 ქალი).

²²და დააყენა ძმებში უფროსად რეხობოყამმა აბია, მაყაქას ვაჟი, რადგან მისი გამეფება ეწადა.

²³გონივრულად მოიქცა და ყველა თავისი შვილი იუდასა და ბენიამინის ყველა კუთხეში და ყველა გამაგრებულ ქალაქში ჩაასახლა. და უხვად მისცა სარჩო და მრავალი ცოლი შერთო.