Read ქართული ბიბლია, სრული ვერსია 2 Chronicles 17 Bible Online

2 Chronicles 17 - ქართული ბიბლია, სრული ვერსია bible

2 Chronicles 17

¹მის ნაცვლად მისი ძე იოშაფატი გამეფდა. ძალა მოიკრიბა ისრაელიანთა წინააღმდეგ იოშაფატმა.

²და ჩააყენა ჯარი იუდას ყველა გამაგრებულ ქალაქში. მცველები დააყენა იუდას ქვეყანაში და ეფრემის ქალაქებში, რომელიც მამამისმა ასამ დაიპყრო.

³და უფალი იყო იოშაფატთან, რადგან დავითის, მამამისის, პირვანდელი გზით დადიოდა და ბაყალები არ უძებნია.

⁴და ეძიებდა თავისი მამის ღმერთსა და მის მცნებებს ასრულებდა და არ იქცეოდა ისრაელიანთა მსგავსად.

⁵და გააძლიერა უფალმა სამეფო მის ხელში. და მთელი იუდა ძღვენს აძლევდა იოშაფატს და დიდი დოვლათი და პატივი ჰქონდა.

⁶და გული მიეცა უფლის გზებზე და კვლავ მოშალა გორაკები და აშერები იუდაში.

⁷თავისი მეფობის მესამე წელს გაგზავნა თავისი მთავრები: ბენ-ხაილი, ყობადია, ზაქარია, ნეთანელი და მიქაია იუდას ქალაქების დასამოძღვრად.

⁸მათ თან გააყოლა ლევიანები: შემაყია, ნეთანია, ზებადია, ყასაელი, შემირამოთი, იონათანი, ადონია, ტობია, ტობ-ადონია და მათვე გააყოლა მღვდლები: ელიშამაყი და იორამი.

⁹და მოძღვრავდნენ ხალხს იუდაში და თან ჰქონდათ უფლის რჯულის წიგნი. და მოიარეს იუდას ყველა ქალაქი და დამოძღვრეს ხალხი.

¹⁰უფლის დიდი შიში ჰქონდა ყველა იმ ქვეყნის სამეფოს, იუდას ირგვლივ რომ იყო, და არ ებრძოდნენ იოშაფატს.

¹¹ფილისტიმელთ იოშაფატთან მოჰქონდათ ძღვენი და ვერცხლით იხდიდნენ ხარკს; ასევე არაბებსაც მოჰყავდათ 7 700 ვერძი და 7 700 ვაცი.

¹²და თანდათან განდიდდა და აღზევდა იოშაფატი. და ააშენა იუდაში სიმაგრეები და სამარაგო ქალაქები.

¹³დიდძალი მარაგი ჰქონდა იუდას ქალაქებში, და მებრძოლი ხალხი, მაგარი ვაჟკაცები, ჰყავდა იერუსალიმში.

¹⁴აჰა, მათი ჩამონათვალი მამისსახლთა მიხედვით. იუდას ათასისთავები: თავკაცი ყადნა, მას ჰყავდა 300 ათასი მაგარი ვაჟკაცი;

¹⁵მის მერე იყო თავკაცი იეჰოხანანი. მას 280 ათასი ჰყავდა;

¹⁶მის მერე იყო ამასია, ზიქრის ძე, ნებით რომ შესწირა თავი უფალს, მასთან იყო 200 ათასი მაგარი ვაჟკაცი;

¹⁷ბენიამინს ჰყავდა მამაცი ვაჟკაცი ელიადაყი და მასთან ერთად 200 ათასი ფარ-შუბოსანი კაცი;

¹⁸მის მერე იყო იეჰოზაბადი და მასთან ერთად 180 ათასი აღჭურვილი მებრძოლი.

¹⁹აჰა, ისინი, ვინც მეფეს ემსახურებოდნენ, მათ გარდა, მეფემ იუდას ყველა გამაგრებულ ქალაქში რომ ჩააყენა.