Read ქართული ბიბლია, სრული ვერსია 2 Chronicles 22 Bible Online

2 Chronicles 22 - ქართული ბიბლია, სრული ვერსია bible

2 Chronicles 22

¹და გაამეფეს იერუსალიმის მცხოვრებლებმა მის ნაცვლად ახაზია, მისი უმცროსი ძე, რადგან უფროსები ბანაკში შემოჭრილმა არაბებმა ამოხოცეს. და გამეფდა ახაზია, იუდას მეფის, იორამის, ძე.

²42 წლისა იყო ახაზია, რომ გამეფდა, და ერთი წელი იმეფა იერუსალიმში. მისი დედა იყო ღათალია, ყომრის ასული.

³ახაზიაც ახაბის სახლის გზით დადიოდა, ვინაიდან დედამისი ურჩევდა უღმერთოების კეთებას.

⁴ბოროტს აკეთებდა უფლის თვალში, ახაბის სახლის მსგავსად, რადგან, მისდა საუბედუროდ, მამამისის სიკვდილის შემდეგ მისი მრჩეველნი ისინი იყვნენ.

⁵იგი მათი რჩევით გაჰყვა იორამ ახაბის ძეს, ისრაელის მეფეს, არამის მეფე ხაზაელთან საომრად გალაადის რამოთში. და დაჭრეს არამელებმა იორამი.

⁶და მობრუნდა ის, რომ იზრეყელში მოეშუშებინა ჭრილობები, რაც რამაში მიაყენეს, როცა ხაზაელს, არამის მეფეს, ეომებოდა. და ჩამოვიდა ახაზია იორამის ძე, იუდას მეფე, იზრეყელში იორამ ახაბის ძის სანახავად, რადგან ავად იყო იგი.

⁷იორამთან მისვლა ღვთისაგან იყო ახაზიას დასაღუპად: რადგან მისვლისთანავე იორამთან ერთად გაილაშქრა იეჰუ ნიმშის ძის წინააღმდეგ, რომელსაც უფალმა სცხო ახაბის სახლის დასაქცევად.

⁸როცა იეჰუ მსჯავრს სდებდა ახაბის სახლს, მოძებნა იუდას მთავარნი და ახაზიას ძმისწულები, ახაზიას რომ ემსახურებოდნენ, და ყველანი დახოცა.

⁹და მოაძებნინა ახაზიაც და შეიპყრეს იგი სამარიაში სადაც იმალებოდა, და მიჰგვარეს იეჰუს. და მოკლეს ის და დამარხეს, რადგან თქვეს: „შვილია იოშაფატისა, რომელიც მთელი გულით ეძიებდა უფალს.“ აღარავინ დარჩა ახაზიას სახლში, მეფობა რომ შესძლებოდა.

¹⁰რადგან ღათალიამ, ახაზიას დედამ, როცა დაინახა, რომ მოკვდა მისი ძე, ადგა და გაწყვიტა იუდას სახლის მთელი სამეფო მოდგმა.

¹¹აიყვანა იეჰოშაბეყათმა, იორამ მეფის ასულმა, იოაში, ახაზიას ვაჟი, თავის ძიძასთან ერთად, რადგან იეჰოშაბეყათი, იეჰოიადაყ მღვდლის ცოლი, ახაზიას და იყო, და საწოლ ოთახში გადამალა ღათალიასაგან და ვერ მოკლეს იგი.

¹²და ექვს წელიწადს იმალებოდა იოაში მათთან ღვთის სახლში, ვიდრე ღათალია ქვეყნის დედოფალი იყო.