Read ქართული ბიბლია, სრული ვერსია 2 Chronicles 32 Bible Online

2 Chronicles 32 - ქართული ბიბლია, სრული ვერსია bible

2 Chronicles 32

¹ამ პატიოსან საქმეთა შემდეგ მოვიდა სენახერიბი, აშურის მეფე, შემოიჭრა იუდაში და ალყა შემოარტყა ციხე-ქალაქებს. მათ გატეხას ფიქრობდა.

²როცა დაინახა ხიზკიამ, რომ მოვიდა სენახერიბი და იერუსალიმზე ლაშქრობას აპირებს,

³გადაწყვიტა თავის მთავრებთან და თავის მებრძოლებთან ერთად, ამოევსოთ წყლის სათავეები, რომლებიც ქალაქგარეთ იყო, და ისინიც მიეხმარნენ.

⁴შეიყარა უამრავი ხალხი და დაწყვიტეს ყველა სათავე და ნაკადული, რაც კი დიოდა იმ მიწაზე, რადგან თქვეს: „რატომ უნდა ნახონო მოსულმა აშურის მეფეებმა ბევრი წყალი?“

⁵მოიცა ძალი და ამოაშენა ყველა დანგრეული კედელი, აამაღლა გოდლები და გარედან კიდევ სხვა კედელი შემოაშენა. გაამაგრა მილო დავითის ქალაქში, დაამზადა დიდძალი საჭურველი და ფარები.

⁶მხედართმთავრები დაუყენა ხალხს, შემოიკრიბა ისინი ქალაქის კარიბჭის მოედანზე და გაამხნევა:

⁷„განმტკიცდით და გაძლიერდით! ნუ შიშობთ და ნუ თრთით აშურის მეფისა და იმ ურდოს წინაშე, თან რომ ახლავს, რადგან ჩვენთან უფრო დიდი ძალაა, ვიდრე მასთან.

⁸მასთან ხორციელი ძალაა, ჩვენთან კი უფალი, ჩვენი ღმერთი, რათა შეგვეწიოს და იომოს ჩვენს ბრძოლებში.“ და გამხნევდა ხალხი ხიზკიას, იუდას მეფის, სიტყვებზე.

⁹ამის შემდეგ სენახერიბმა, აშურის მეფემ, რომელიც მთელი თავისი ძალებით ლაქიშის წინ იდგა, გაუგზავნა თავისი მსახურნი იერუსალიმში ხიზკიას, იუდას მეფეს, და მთელ იუდას, იერუსალიმში მყოფს, რომ ეთქვათ:

¹⁰„ასე ამბობს სენახერიბი, აშურის მეფე: რისი იმედი გაქვთ, იერუსალიმის ციხესიმაგრეში რომ ჩამსხდარხართო?

¹¹განა ხიზკია არ გაცდუნებთ, რომ შიმშილითა და წყურვილით ამოგხადოთ სული, როცა გეუბნებათ: ‘უფალი, ჩვენი ღმერთი, გვიხსნისო აშურის მეფის ხელიდან?’

¹²განა მაგ ხიზკიამ არ დაანგრია მისი გორაკები და სამსხვერპლოები? განა ასე არ უთხრა იუდასა და იერუსალიმს: ‘ერთი სამსხვერპლოს წინაშე უნდა სცეთ თაყვანი, და მასზე უნდა აკმიოთ საკმეველი?’

¹³განა არ იცით, რა დღე დავაწიეთ მე და ჩემმა მამებმა ქვეყნის ყველა ხალხებს? განა შეძლეს ქვეყნის ხალხების ღმერთებმა, რომ ჩემი ხელიდან ეხსნათ მათი ქვეყნები?

¹⁴რომელი იყო ჩემი მამებისგან განადგურებულ ამ ხალხების ღმერთთაგან ისეთი, თავისი ხალხი რომ ეხსნა ჩემი ხელიდან, რომ ახლა თქვენმა ღმერთმა გიხსნათ ჩემი ხელიდან?“

¹⁵ახლა არ მოგატყუოთ ხიზკიამ და არ გაცდუნოთ ამგვარად. არ დაუჯეროთ მას, რაკი ვერცერთი ხალხის და სამეფოს ვერცერთმა ღმერთმა ვერ შეძლო თავისი ხალხის ხსნა ჩემი და ჩემი მამების ხელიდან, ვერც თქვენი ღმერთი ვერ გიხსნითო ჩემი ხელიდან.

¹⁶კიდევ ელაპარაკნენ მისი მსახურნი უფლის, მათი ღმერთის, წინააღმდეგ და მისი მსახურის, ხიზკიას, წინააღმდეგ.

¹⁷უფლის, ისრაელის ღმერთის, სალანძღავ წერილებს წერდა იგი და ასეთ სიტყვებს ამბობდა მასზე: „როგორც ქვეყნიერების ხალხების ღმერთებმა ვერ იხსნეს თავისი ხალხი ჩემი ხელიდან, ასევე ვერც ხიზკიას ღმერთი იხსნის თავის ხალხს ჩემი ხელიდან.“

¹⁸ხმამაღლა უყვიროდნენ ებრაულად იერუსალიმელთ, გალავანზე მყოფთ, რომ შეეშინებინათ და თავზარი დაეცათ, და აეღოთ ქალაქი.

¹⁹ისე ლაპარაკობდნენ იერუსალიმის ღმერთზე, როგორც ქვეყნიერების ხალხთა ღმერთებზე, ადამიანის ხელით შექმნილებზე.

²⁰ამის გამო ილოცეს მეფე ხიზკიამ და წინასწარმეტყველმა ესაია ამოცის ძემ, და ცას შეჰღაღადეს.

²¹მოავლინა უფალმა ანგელოზი და ამოწყვიტა აშურის მეფის ბანაკში ყველა მაგარი ვაჟკაცი, წინამძღოლი და მეთაური. შერცხვენილი გაბრუნდა იგი თავის ქვეყანაში და, როცა თავისი ღმერთის სახლში შევიდა, მისი საზარდულიდან გამოსულმა შვილებმა მახვილით განგმირეს იქ.

²²იხსნა უფალმა ხიზკია და იერუსალიმის მკვიდრნი აშურის მეფის — სენახერიბის — და ყველას ხელიდან, და დაიფარა ყოველი მხრივ.

²³მრავალს მოჰქონდა იერუსალიმში ძღვენი უფლისათვის და რჩეული საჩუქრები იუდას მეფე ხიზკიასთვის. მას შემდეგ ამაღლდა იგი ყველა ხალხების თვალში.

²⁴იმ დღეებში სასიკვდილოდ დასნეულდა ხიზკია და შეევედრა უფალს. ელაპარაკა უფალი და მისცა ნიშანი.

²⁵მაგრამ არ მიაგო ხიზკიამ სანაცვლო, მის მიმართ გამოჩენილი სიკეთისთვის, რადგან გამედიდურდა. და იყო ღვთის რისხვა მასზე, იუდასა და იერუსალიმზე.

²⁶და, როცა დაიცხრო ხიზკიამ მედიდურება — თვითონ და მასთან ერთად იერუსალიმის ყველა მკვიდრმა — აღარ დასტყდომიათ თავს ღვთის რისხვა ხიზკიას დღეებში.

²⁷დიდზე დიდი დოვლათი და პატივი ჰქონდა ხიზკიას. საგანძურები მოიწყო ვერცხლისთვის, ოქროსთვის, პატიოსანი ქვებისთვის, ნელსაცხებლებისთვის, ფარებისათვის და ყოველგვარი ძვირფასი ნივთისათვის;

²⁸ბეღელ-მარნები აიშენა მიწის ნაყოფისთვის: პურისთვის, ღვინისთვის და ზეთისთვის; ბაკები — ყოველგვარი პირუტყვისთვის, და ფარეხები — ცხვრის ფარებისთვის;

²⁹ქალაქებიც ააშენა თავისთვის; ცხვარ-ძროხა მრავლად ჰყავდა, რადგან ღმერთი მას დიდძალ დოვლათს აძლევდა.

³⁰მანვე გადაკეტა გიხონის ზემო წყაროების სათავეები და ქვემოთ ჩამოიყვანა წყალი, დავითის ქალაქის დასავლეთ მხარეს; წარმატება ჰქონდა ხიზკიას ყველა საქმეებში.

³¹ხოლო როცა ბაბილონის მთავრები აგზავნიდნენ მასთან მოციქულებს, რათა გამოეძიებინათ მისგან მის ქვეყანაში მომხდარი სასწაულები, მიუშვა იგი ღმერთმა, რომ გამოეცადა და სცოდნოდა ყოველი მისი გულისნადები.

³²ხიზკიას დანარჩენი საქმენი და მისი სიკეთენი აღწერილია წინასწარმეტყველ ესაიას, ამოცის ძის, ხილვაში, და იუდასა და ისრაელის მეფეთა წიგნში.

³³და განისვენა ხიზკიამ თავის მამებთან და დამარხეს იგი დავითიანთა სამარხების გვერდით. პატივი მიაგეს მას სიკვდილის შემდეგ მთელმა იუდამ და იერუსალიმის მკვიდრებმა. და გამეფდა მის ნაცვლად მისი ძე, მანაშე.