Read ქართული ბიბლია, სრული ვერსია 2 Chronicles 33 Bible Online

2 Chronicles 33 - ქართული ბიბლია, სრული ვერსია bible

2 Chronicles 33

¹12 წლისა იყო მანაშე, როცა გამეფდა და 55 წელი იმეფა იერუსალიმში.

²და უკუღმართად იქცეოდა უფლის თვალში. იმ ხალხების სიბილწეთა კვალზე, რომელნიც აჰყარა უფალმა ისრაელიანთაგან.

³მან კვლავ აღადგინა სამსხვერპლო მაღლობები, მამამისმა ხიზკიამ რომ მოსპო; სამსხვერპლოები აღუმართა ბაყალებს; გააკეთა აშერები და თაყვანს სცემდა ცის მხედრობას და ემსახურებოდა მათ.

⁴ააგო სამსხვერპლოები უფლის სახლში, რომელზეც უფალმა თქვა: „იერუსალიმში საუკუნოდ იქნებაო ჩემი სახელი.“

⁵აუგო სამსხვერპლოები ცის მხედრობას უფლის ტაძრის ორთავე ეზოში.

⁶ცეცხლში ატარებდა თავის შვილებს ბენ-ჰინომის ველზე, მკითხაობდა, მისნობდა, ჯადოსნობდა, დაადგინა მესულთანეები და მჩხიბავები. ბევრ უკუღმართობას სჩადიოდა უფლის თვალში მის გასარისხებლად.

⁷და დადგა ჩამოსხმული კერპი ღვთის სახლში, იმ სახლში, რომელზეც ეუბნებოდა ღმერთი დავითს და მის ძეს სოლომონს: „ამ სახლში და იერუსალიმში, რომელიც ამოვირჩიე ისრაელის ყველა შტოდან, საუკუნოდ დავამკვიდრებო ჩემს სახელს,

⁸აღარ მოვაცვლევინებ ფეხს ისრაელს ამ მიწიდან, რომელიც მის მამებს დავუდგინე, ოღონდ უნდა შეასრულონ, რაც ვუბრძანე, თანახმად მთელი რჯულისა, წესებისა და მცნებებისა, მოსეს მიერ რომ მიეცათ.“

⁹მაგრამ აცდუნა მანაშემ იუდა და იერუსალიმის მკვიდრნი და იმ ხალხზე უფრო უკუღმართად იქცეოდნენ, რომლებიც გადააშენა უფალმა ისრაელიანთა წინაშე.

¹⁰ელაპარაკა უფალი მანაშესა და მის ხალხს, მაგრამ არ შეისმინეს.

¹¹ამიტომ მიუსია მას უფალმა აშურის მეფის მხედართმთავრები. შეიპყრეს მანაშე, დაატყვევეს, ბორკილები დაადეს და ბაბილონს წაიყვანეს.

¹²გასაჭირში მყოფი მანაშე შეევედრა უფალს, თავის ღმერთს, და ძლიერ მოდრკა თავის მამათა წინაშე.

¹³ილოცა ღმერთის მიმართ და მანაც შეივედრა იგი; შეიწყნარა მისი ვედრება და იერუსალიმში, მის სამეფოში, დააბრუნა. მიხვდა მანაშე, რომ თვით ღმერთია უფალი.

¹⁴ამის შემდეგ გარე კედელი შემოუშენა დავითის ქალაქს გიხონის დასავლეთით, ხევისკენ, თევზთა კარიბჭის შესასვლელამდე, გარს შემოარტყა ყოფელს და ძალზე აამაღლა. და ჩააყენა მხედარათმთავრები იუდას ყველა გამაგრებულ ქალაქში.

¹⁵მოაშორა უცხო ღმერთები და კერპები უფლის ტაძარს, ასევე ყველა საკერპო, უფლის ტაძრის მთაზე რომ ააგო იერუსალიმში, და ქალაქგარეთ გადაყარა.

¹⁶განაახლა უფლის სამსხვერპლო, და შესწირა მასზე სამშვიდობო და სამადლობელო მსხვერპლი, და უბრძანა იუდაელთ, ემსახურათ უფლისთვის, ისრაელის ღმერთისთვის.

¹⁷მაგრამ ხალხი მაინც სამსხვერპლო მაღლობებზე სწირავდა მსხვერპლს, ოღონდ მხოლოდ უფალს, თავის ღმერთს.

¹⁸მანაშეს დანარჩენი ამბები, მისი ლოცვა თავისი ღმერთის მიმართ, და იმ მხილველთა სიტყვები, რომელნიც მას უფლის, ისრაელის ღმერთის, სახელით ელაპარაკებოდნენ, ისრაელის მეფეთა მატიანეშია ჩაწერილი.

¹⁹და მისი ლოცვა და როგორ უსმინა მას უფალმა, და მთელი მისი ცოდვები და უკეთურება, რასაც აკეთებდა, სამსხვერპლო მაღლობები რომ მოაწყო და აშერები და კერპები რომ აღმართა, ყველაფერი (თვით იქამდე, ვიდრე მოინანიებდა), ხოზაის მატიანეშია ჩაწერილი.

²⁰განისვენა მანაშემ თავის მამებთან, და დამარხეს თავის სახლში. მის ნაცვლად მისი ძე, ამონი, გამეფდა.

²¹22 წლისა იყო ამონი, როცა გამეფდა, და ორი წელი იმეფა იერუსალიმში.

²²უკუღმართად იქცეოდა უფლის თვალში, როგორც მამამისი, მანაშე იქცეოდა. მამამისის მიერ გაკეთებულ ყველა კერპს მსხვერპლს სწირავდა ამონი და ემსახურებოდა.

²³აღარ მოდრკა უფლის წინაშე, როგორც მანაშე, მამამისი, მოდრკა, არამედ უფრო გაამრავლა ამონმა დანაშაულები.

²⁴შეითქვნენ მის წინააღმდეგ მისი მსახურნი და თავისავე სახლში მოკლეს იგი.

²⁵ხალხმა ამოწყვიტა მეფე ამონის წინააღმდეგ შეთქმულნი და მის ნაცვლად მისი ძე, იოშია, გაამეფა.