Read ქართული ბიბლია, სრული ვერსია 2 Chronicles 4 Bible Online

2 Chronicles 4 - ქართული ბიბლია, სრული ვერსია bible

2 Chronicles 4

¹და გააკეთა ბრინჯაოს სამსხვერპლო სიგრძით 20 წყრთა, სიგანით 20 წყრთა,

²და ჩამოასხა ბრინჯაოს ზღვა, სრულიად მრგვალი, კიდით კიდემდე ათი წყრთა იყო, სიმაღლე ხუთი წყრთა ჰქონდა, 30 წყრთა ლარი სწვდებოდა გარს.

³ეს ზღვა იდგა ხარების ქანდაკებებზე, რომლებიც ათ წყრთაზე ორ რიგად გარს ერტყმოდა მას და მასთან ერთ მთლიანობაში იყო ჩამოსხმული.

⁴იმ თორმეტ ხართაგან სამი ჩრდილოეთისკენ იყურებოდა, სამი — დასავლეთისკენ, სამი — სამხრეთისკენ, სამი — აღმოსავლეთისკენ. ზღვა ზედ ედგათ და გავები ყველას შიგნით ჰქონდათ მიქცეული.

⁵სისქე ერთი ნები ჰქონდა, პირზე კანტი შემოავლო თასივით; გაშლილ შროშანს მიემგვანებოდა; 3 000 ბათს[1] იტევდა ის.

⁶და გააკეთა ათი საბანელი. ხუთი მარჯვენა ფრთაზე დადგა, ხუთი — მარცხენაზე, რომ მათში განბანილიყვნენ, — და სრულადდასაწველ საკლავსაც მასში ავლებდნენ. ხოლო ზღვა მღვდელთა განბანისთვის იყო განკუთვნილი.

⁷და გააკეთა ათი ოქროს სასანთლე მათი ფორმის შესაფერისი და ტაძარში დაალაგა — ხუთი მარჯვნივ და ხუთი — მარცხნივ.

⁸და გააკეთა ათი ტაბლა და ტაძარში დააწყო. — ხუთი მარჯვნივ და ხუთი — მარცხნივ. და გააკეთა ოქროს 100 ფიალა.

⁹და მოაწყო მღვდელთა ეზო, და დიდი ეზო, და ეზოს კარები, და ბრინჯაოთი მოჭედა ისინი.

¹⁰ზღვა მარჯვენა მხარეს დადგა, სამხრეთ-აღმოსავლეთით.

¹¹და გააკეთა ხურამმა ქვაბები, აქანდაზები და ფიალები. და მოამთავრა სოლომონის სამუშაო ღვთის სახლში.

¹²ორი სვეტი და სვეტებზე დასადგმელი ბუღაურები, და ორი ცხაური ბუღაურებზე შემოსაკვრელად,

¹³და 400 ბროწეული ცხაურებისთვის, ორ-ორი რიგი ბროწეულებისა ორთავე ცხაურისათვის, სვეტებზე დასადგმელი, ბუღაურების მოსართავად.

¹⁴და გააკეთა კვარცხლბეკები, კვარცხლბეკებზე საბანლები დადგა.

¹⁵ერთი ზღვა და 12 ხარი მის ქვეშ.

¹⁶ქვაბები, აქანდაზები, ჩანგლები და ყველა სხვა ჭურჭელი, რაც კი ხურამმა სოლომონს გაუკეთა უფლის ტაძრისათვის, მბზინვარე ბრინჯაოსა იყო.

¹⁷იორდანეს მიდამოებში ჩამოასხა ისინი მეფემ, თიხნარ ნიადაგზე, სუქოთსა და ცერედას შორის.

¹⁸და გააკეთა სოლომონმა ყველა ეს ჭურჭელი, ძალზე ბევრი, ისე, რომ არავინ იცოდა ბრინჯაოს წონა.

¹⁹და გააკეთა სოლომონმა ყველა ის ჭურჭელი, რაც კი ღვთის სახლშია: ოქროს სამსხვერპლო, ოქროსავე ტაბლები, რომლებზედაც საწინაშეო პურები ეწყო;

²⁰ხალასი ოქროს სასანთლეები და ლამპრები, რათა აენთოთ ისინი დაბირის წინ, წესისამებრ.

²¹ყვავილები, ლამპრები და მაშები ოქროსი იყო, ყველაფერი ხალასი ოქროსი,

²²დანები, ფიალები, კოვზები, საცეცხლურები — ხალასი ოქროსი. ასევე ტაძრის კარები: წმიდათა წმიდაში შესასვლელი შიდა კარებიც და ტაძრის საწმიდარში შესასვლელი კარებიც ოქროსი იყო.