Read ქართული ბიბლია, სრული ვერსია 1 Esdras (Greek) 2 Bible Online

1 Esdras (Greek) 2 - ქართული ბიბლია, სრული ვერსია bible

1 Esdras (Greek) 2

¹სპარსთა მეფის კვიროსის მეფობის პირველ წელს, იერემიას პირით თქმული უფლის სიტყვის აღსასრულებლად, უფალმა სულით აღძრა კვიროსი, სპარსთა მეფე, რომელმაც მთელ თავის სამეფოს სიტყვით და წერილობით აუწყა:

²ამას ამბობს კვიროსი, სპარსთა მეფე: ისრაელის უფალმა, უზენაესმა უფალმა, მე დამადგინა მთელი ქვეყნიერების მეფედ და მიბრძანა სახლი ავუგო მას იერუსალემს, რომელიც არის იუდაში.

³ამიტომ თუ ვინმეა თქვენში მისი ხალხიდან, დე, იყოს მისი უფალი მასთან; დაე, ავიდეს იერუსალემს, რომელიც არის იუდაში, რათა სახლი აუგოს უფალს: იგია უფალი, ისრაელში დავანებული.

⁴ყოველი კაცი, სადაც არ უნდა ცხოვრობდეს იგი, მოვალეა შეეწიოს მათ ოქრო-ვერცხლით, ცხენებით, საქონლითა და სხვა აღთქმული შესაწირავით უფლის ტაძრისათვის იერუსალიმში.

⁵მაშინ აღდგნენ უხუცესნი იუდას ტომიდან და ბენიამინის ტომიდან, მღვდლები და ლევიანები, ყველა, ვისაც სული აღუძრა უფალმა წასასვლელად და უფლის სახლის ასაგებად იერუსალიმში.

⁶მეზობლად მცხოვრებნი კი ყოველნაირად ხელს უმართავდნენ მათ: ოქრო-ვერცხლით, ცხენებით, საქონლით და ურიცხვი აღთქმული შესაწირავით, რომელიც გაიღო მრავალმა, ვისი გონებაც აღძრულ იქნა.

⁷მეფე კვიროსმა გამოიტანა უფლის წმიდა ჭურჭელი, რომელიც ნაბუქოდონოსორმა წაიღო იერუსალიმიდან და თავის საკერპოში დადო.

⁸აიღო იგი კვიროსმა, სპარსთა მეფემ, და თავის მეჭურჭლეთუხუცესს — მითრიდატეს — გადასცა, მისი მეშვეობით კი გადაეცა შეშბაცარს, იუდაელთა მთავარს.

⁹ხოლო რიცხვი ჭურჭლისა იყო: ათასი ოქროს სასათხევლე, ათასი — ვერცხლისა, და ვერცხლის 29 სასაკმევლე,

¹⁰30 ოქროს ფიალა, 2410 — ვერცხლისა და სხვა ჭურჭელი ათასი.

¹¹სულ წამოღებულ იქნა 5469 ოქრო-ვერცხლის ჭურჭელი; შეშბაცარმა ბაბილონიდან დაბრუნებულ ტყვეებთან ერთად ჩამოიტანა ისინი იერუსალიმში.

¹²სპარსთა მეფის არტაქსერქსეს მეფობისას ბიშლამმა და მითრიდატემ, ტაბეელმა და რეხუმმა, ბეელტეთმოსმა, მწერალმა შიმშაიმ და სამარიასა და სხვა ადგილებში მცხოვრებმა მათმა თანამზრახველებმა იუდასა და იერუსალიმის მცხოვრებთა წინააღმდეგ შემდეგი შინაარსის წერილი მისწერეს მეფეს:

¹³მეფე არტაქსერქსეს, ჩვენს ბატონს, შენი ქვეშევრდომები — მრჩეველი რეხუმი, მწერალი შიმშაი და მათი საბჭოს დანარჩენი მსაჯულნი კელესირიასა და ფინიკიაში.

¹⁴აწ ეუწყოს მეფე-ბატონს, რომ თქვენგან წამოსული იუდაელები ჩვენთან მოვიდნენ იერუსალიმში, აშენებენ ამ განდგომილსა და უკეთურ ქალაქს, აწყობენ მის მოედნებს აღადგენენ გალავანს და საძირკველს უყრიან ტაძარს

¹⁵თუ ქალაქი კვლავ აშენდა და გალავანიც გასრულდა, არამცთუ ხარკს შეგიწყვეტენ, არამედ მეფეთაც წინ აღუდგებიან.

¹⁶რაკი ტაძრის მშენებლობა უკვე დაიწყო, საჭიროდ ვცანით გაგაფრთხილოთ და გირჩიოთ, მეფე-ბატონო, იქნებ ჩახედო შენი წინაპრების წიგნებს.

¹⁷მატიანეებში ნახავ, რა სწერია მათზე და შეიტყობ, რომ ეს ქალაქი მოღალატე იყო და მეფეთა და ქალაქთა მაშფოთარი, იუდაელები კი — განდგომილნი და ოდითგანვე მეამბოხენი, რის გამოც მოოხრდა ეს ქალაქი.

¹⁸გვიუწყებია შენთვის, მეფე-ბატონო, რომ თუ ეს ქალაქი კვლავ აშენდა და მისი გალავანიც აღდგა, აღარ გექნება გასასვლელი კელესირიასა და ფინიკიაში.

¹⁹მაშინ მეფემ საპასუხოდ მისწერა რეხუმს, ვითარებათა აღმწერელს, ბეელტეთმოსს, მწერალ შიმშაის და მათ თანამზრახველებს სამარიაში, სირიასა და ფინიკიაში:

²⁰მივიღე თქვენი გამოგზავნილი წერილი;

²¹ვბრძანე განეხილათ და დავრწმუნდი, რომ ეს ქალაქი ოდითგანვე მეფეთა წინააღმდგომი ყოფილა, მისი მცხოვრებნი კი — განდგომილნი და შფოთის ამტეხნი;

²²ძლევამოსილსა და სასტიკ მბრძანებლებს უმეფიათ იერუსალიმში, ხარკს რომ კრეფდნენ კელესირიასა და ფინიკიაში.

²³ამიტომაც ვბრძანებ, აეკრძალოს ამ ხალხს ქალაქის შენება;

²⁴თვალყური ადევნეთ, რომ აღარაფერი გაკეთდეს და ბოლო მოეღოს მეფეთა წინააღმდეგ მიმართულ ბოროტმზრახველობას.

²⁵მეფე არტაქსერქსეს წერილი რომ წაიკითხეს, რაუმოსი და მწერალი სამსაიოსი მხედართა და მოლაშქრეთა თანხლებით სასწრაფოდ გაემართნენ იერუსალიმისკენ და დაერივნენ მშენებლებს.

²⁶და შეჩერდა იერუსალიმის ტაძრის შენება სპარსთა მეფის დარიოსის მეფობის მეორე წლამდე.