Read ქართული ბიბლია, სრული ვერსია 1 Esdras (Greek) 6 Bible Online

1 Esdras (Greek) 6 - ქართული ბიბლია, სრული ვერსია bible

1 Esdras (Greek) 6

¹დარიოსის მეფობის მეორე წელს წინასწარმეტყველებმა: ანგიამ და ზაქარიამ, იდოს ძემ, უფლის, ისრაელის ღმერთის, სახელით უწინასწარმეტყველეს იერუსალიმსა და იუდაში მყოფ იუდაელებს.

²მაშინ ადგა ზერუბაბელი, შეალთიელის ძე, და იესო, იოცადაკის ძე, და დაიწყეს უფლის სახლის შენება იერუსალიმში უფლის წინასწარმეტყველთა თანდასწრებით, რომლებიც შეეწეოდნენ მათ.

³ამ დროს გამოეცხადა მათ სისინესი, სირიისა და ფინიკიის გამგებელი, სათრაბუზანესსა და მის თანამდგომებთან ერთად, და უთხრა მათ:

⁴ვისი ნებართვით აშენებთ ამ სახლს და ამ ჭერს, და აღასრულებთ სხვა დანარჩენსაც? ან ვინ არიან ამის მოქმედი მშენებელნი?

⁵მაგრამ იუდაელთა უხუცესებმა მიიღეს მადლი უფლისაგან, რომელმაც ტყვეობაში მიხედა მათ;

⁶ამიტომაც არ აუკრძალეს შენება, ვიდრე ეს ამბავი ეუწყებოდა დარიოსს და პასუხი მოვიდოდა მისგან.

⁷აი, იმ წერილის პირი, დარიოსს რომ მისწერა და გაუგზავნა სისინესმა, სირიისა და ფინიკიის გამგებელმა, აგრეთვე სათარბუზანმა, და მათმა თანამდგომებმა — სირიისა და ფინიკიის მთავრებმა:

⁸მოკითხვას ვუთვლით მეფე დარიოსს! უნდა გაუწყოთ, მეფე-ბატონო: იუდაელთა ქვეყანას რომ ვეწვიეთ და ქალაქ იერუსალიმში შევედით, ვნახეთ ტყვეობიდან გამოსული იუდაელთა უხუცესნი, იერუსალიმში უზარმაზარ ახალ სახლს რომ უგებენ უფალს ძვირფასი თლილი ქვებითა და კედლებში დატანებული ძელებით.

⁹თავგამოდებით შრომობენ და კარგადაც მიდის საქმე მათ ხელში; დიდებულად და გულმოდგინედ კეთდება ყველაფერი.

¹⁰მაშინ ვკითხეთ უხუცესებს და ვუთხარით: „ვისი ბრძანებით აშენებთ ამ სახლს და საფუძველს უყრით ამ საქმეს?“

¹¹ასე ვკითხეთ, რათა მოგვეწერა და გვეუწყებინა შენთვის, თუ ვინ არიან მათი თავკაცნი და წინამძღოლთა სიაც მოვთხოვეთ.

¹²ხოლო მათ პასუხად გვითხრეს: „ჩვენა ვართ მონები ღვთისა, ცისა და მიწის შემოქმედისა.

¹³ეს სახლი მრავალი წლის წინათ აიგო ისრაელის დიდი და ძლევამოსილი მეფის მიერ და დასრულებულ იქნა,

¹⁴მაგრამ როცა ჩვენმა მამებმა თავიანთი ცოდვებით განარისხეს ზეციური უფალი ისრაელისა, მაშინ ისინი ნაბუქოდონოსორს, ბაბილონის მეფეს, ქალდეველთა მეფეს ჩაუგდო ხელში.

¹⁵სახლი დაანგრიეს და დაწვეს, ხოლო ხალხი ტყვედ წაასხეს ბაბილონში.

¹⁶მაგრამ კვიროსის გამეფების პირველსავე წელს ბაბილონის ქვეყანაზე მეფე კვიროსმა ბრძანა აგვეშენებინა ეს სახლი.

¹⁷ოქროსა და ვერცხლის წმიდა ჭურჭელი, ნაბუქოდონოსორმა რომ წარიტაცა იერუსალიმის სახლიდან და თავის საკერპოში დადო, კვიროსმა ბაბილონის ტაძრიდან გამოიტანა და ზერუბაბელსა და მთავარ შეშბაცარს გადასცა.

¹⁸და უბრძანა მას, წამოეღო ეს ჭურჭელი, იერუსალიმის ტაძარში დაედო და აეშენებინა ღვთის ტაძარი მისსავ ადგილას.

¹⁹მაშინ მოვიდა შეშბაცარი და იერუსალიმში საძირკველი ჩაუყარა უფლის სახლს; მას მერე დღემდე შენდება და ჯერ კიდევ არ დასრულებულა.“

²⁰აწ, თუ ინებებ, მეფეო, მოიძიონ ბაბილონს, მეფე კვიროსის წიგნთსაცავებში.

²¹თუ აღმოჩნდება, რომ უფლის სახლი მეფე კვიროსის ნებით შენდებოდა იერუსალიმში, და თუ ასეთია ჩვენი ბატონის ნებაც, ჩვენც გვეუწყოს.

²²მაშინ ბრძანა დარიოს მეფემ მოეძებნათ ბაბილონის წიგნთსაცავებში; და მიდიის ქალაქ ეკბატანაში მიაკვლიეს ერთ ჩანაწერს, რომელშიაც ნათქვამი იყო:

²³კვიროსის მეფობის პირველ წელს მეფე კვიროსმა ბრძანა უფლის სახლი აეგოთ იერუსალიმში, სადაც უშრეტ ცეცხლზე სწირავენ მსხვერპლს.

²⁴სიმაღლით 60 წყრთა, სიგანით 60 წყრთა, თლილი ქვის სამი სახლითა და ადგილობრივი ხით ნაშენი ერთი ახალი სახლითურთ, ხოლო ხარჯი კვიროს მეფის სახლმა გაიღოს.

²⁵უფლის სახლის წმიდა ჭურჭელი, ნაბუქოდონოსორმა იერუსალიმის სახლიდან რომ წამოიღო ბაბილონში, იერუსალიმის სახლს დაუბრუნდეს და სადაც ინახებოდა, იქვე დაიდოს.

²⁶ვუბრძანე სისინესს, სირიისა და ფინიკიის გამგებელს, სათრაბუზანესს და მათ თანამდგომთ, სირიასა და ფინიკიაში მთავრებად გამწესებულთ, დაეხსნან იქაურობას და საშუალება მისცენ უფლის მონას ზერუბაბელს, იუდაელთა მთავარს, და იუდაელთა უხუცესებს უფლის სახლი ააგონ მის ძველ ადგილას.

²⁷ხოლო მე ვბრძანებ: მთლიანად ააშენონ და თვალი ადევნონ, რომ ტყვეობიდან დაბრუნებულ იუდაელებს არ მოაკლდეთ შემწეობა უფლის სახლის დასრულებამდე;

²⁸რომ კელესირიასა და ფინიკიაში აკრეფილი ხარკიდან ამ ხალხს დროულად ეძლეოდეს წილი უფლისთვის მსხვერპლის შესაწირად, და მთავარ ზერუბაბელს — ზვარაკის, ვერძებისა და კრავებისთვის.

²⁹ასევე დაუბრკოლებლივ — ხორბალი, მარილი, ღვინო და ზეთი ყოველწლიურად, და როგორც იერუსალიმელი მღვდლები მოითხოვენ, რაც კი რამ სჭირდებათ დღიურ სახარჯოდ.

³⁰რათა მსხვერპლს სწირავდნენ მეფისა და მისი შვილებისათვის და მათ დღეგრძელობას შესთხოვდნენ უზენაეს ღმერთს.

³¹ვბრძანებ, თუ ვინმე დაარღვევს ან შეცვლის დაწერილს, მისივე საკუთარი ძელი აიღონ და ზედ ჩამოჰკიდონ, მისი ავლადიდება კი მეფის საკუთრებად გამოცხადდეს.

³²ამის გამო უფალი, ვის სახელსაც იქ უხმობენ, მიწის პირისაგან აღგვის ყველა მეფესა და ხალხს, ვინც შეეცდება ხელი შეუშალოს, ან ბოროტი ზრახვით შეაფერხებს უფლის სახლის მშენებლობას იერუსალიმში.

³³მე, მეფე დარიოსმა, დავადგინე, ყველაფერი ზუსტად აღსრულდეს ამის მიხედვით.