Read ქართული ბიბლია, სრული ვერსია 1 Esdras (Greek) 9 Bible Online

1 Esdras (Greek) 9 - ქართული ბიბლია, სრული ვერსია bible

1 Esdras (Greek) 9

¹წამოდგა ეზრა ტაძრის ეზოდან და გაემართა იეჰოხანანის, ელიაშიბის ძის სადგომისაკენ.

²იქ ყოფნისას არც პური უჭამია და არც წყალი უსვამს, გლოვობდა ხალხის დიდი ურჯულოების გამო.

³მთელს იუდასა და იერუსალიმში ეუწყა ტყვეობიდან ყველა გამოსულს, თავი მოეყარათ იერუსალიმში.

⁴ვინც არ მოვიდოდა ორი თუ სამი დღის განმავლობაში, უხუცესთა წინამძღოლების სამართლით მთელი ქონება ჩამოერთმეოდა, თვითონ კი გაძევებულ იქნებოდა ტყვედყოფილთა კრებულისაგან.

⁵სამ დღეში ყველანი შეიკრიბნენ იერუსალიმში იუდასა და ბენიამინის ტომიდან, — ეს იყო მეცხრე თვის მეოცე დღეს.

⁶ისხდა მთელი ხალხი ეზოში და ცახცახებდა, რადგან ზამთარი იდგა.

⁷წამოდგა ეზრა და უთხრა მათ: თქვენ დაარღვიეთ სჯული, რაკიღა უცხო ტომის ქალები შეირთეთ ცოლად, და უმრავლეთ ცოდვა ისრაელს.

⁸ახლა აღსარება უთხარით და ადიდეთ უფალი, ჩვენი მამა-პაპის ღმერთი;

⁹აღასრულეთ მისი ნება და განეშორეთ ქვეყნის ხალხებს და უცხო ტომის ცოლებს.

¹⁰ხმა აიმაღლა მთელმა ხალხმა და შეღაღადა: როგორც თქვი, ესე მოვიქცევით.

¹¹მაგრამ ხალხმრავლობაა და ზამთარი დგას, არ შეგვიძლია ვიდგეთ ღია ცის ქვეშ, ეს არც ერთი დღის საქმეა და არც ორისა, რადგანაც ურიცხვი ცოდვა მიგვიძღვის ამ მხრივ.

¹²ამიტომაც დადგენილ იქნენ ხალხის წინამძღოლნი, და ყველა, ვისაც ჩვენში უცხო ტომის ქალი ჰყავს ცოლად, თავის დროს გამოცხადდეს მათთან,

¹³თითოეული ადგილის უხუცესისა და მსაჯულის თანხლებით, ვიდრე არ დაცხრება უფლის რისხვა ჩვენზე ამ საქმის გამო.

¹⁴თავს იდვეს ეს იონათანმა, აზაელის ძემ, და იახზეიამ, თიკვას ძემ, ხოლო მეშულამი, ლევი და შაბეთაი შეეწეოდნენ მათ.

¹⁵და ყველაფერი ამის მიხედვით აღასრულეს ტყვეობიდან გამოსულებმა.

¹⁶ეზრა მღვდელმა სახელდებით ამოირჩია საგვარეულოთა წინამძღვარნი, და შეიკრიბნენ ისინი მეათე თვის ახალმთვარობისას საქმის გასარჩევად.

¹⁷და დასრულდა იმათი საქმის გამოძიება, ვისაც ცოლად ჰყავდა უცხო ტომის ქალი, პირველი თვის ახალმთვარობისას.

¹⁸აღმოჩნდა, რომ შეკრებილ მღვდელთაგან უცხო ტომის ცოლები ჰყავდათ:

¹⁹იოცადაკის ძის, იესოს ძეთა და ძმათაგან — მაყასეიას და ელეაზარს, იარიბს და იოდანს,

²⁰რომლებმაც ფიცი დადეს, რომ გაუშვებდნენ ცოლებს და მოიყვანეს ვერძები თავიანთი ცოდვების მისატევებლად.

²¹იმერის ძეთაგან — ანანია და ზებადია, მაყასეია და შემაია, იეხიელი და აზარია;

²²ფასურის ძეთაგან — ელიოყენაი, მაყასეია, ისმაელი, ნათანაელი, გედალია, სალთა;

²³ლევიანთაგან — იოზაბდი და შიმყი, კელაია (იგივე კელიტა) და ფეთახია, იუდა და იონა;

²⁴მგალობელთაგან — ელიაშიბი და ზაქური;

²⁵მეკარეთაგან — შალუმი და ტელემი;

²⁶ისრაელისგან, ფარყოშის ძეთაგან — რამია და იზია, მალქია და მიამინი, ელეაზარი, ხაშაბია და ბენაია;

²⁷ელამის ძეთაგან — მათანია და ზაქარია, იეცრიელი და აბდი, იერემოთი და ელია;

²⁸ზამოთის ძეთაგან — ელიადა, ელიაშიბი, ოთონია, იერემოთი, ზაბადი და ზერდაია;

²⁹ბებაის ძეთაგან — იოხანანი და ანანია, ზაბდი და ემათისი;

³⁰მანის ძეთაგან — ოლამოსი, მამუქოსი, ადაია, იაშუბი, შეალი და იერემოთი;

³¹ადის ძეთაგან — ნაათოსი და მოოსიასი, ლაკუნოსი და ნაიდოსი, ბესკასპასმისი და სესთელი, ბელნუოსი და მანასეასი.

³²ანანის ძეთაგან — ელიონასი და ასაიასი, მელქიასი, საბაიასი და სიმონ ქოსამეოსი.

³³ხაშუმის ძეთაგან — მათენაი და მათათა, ზაბადი და ელიფელეტი, მანასე და შიმყი;

³⁴ბანის ძეთაგან — იერემია, მომდიოსი, მეროსი, იოელი, მამდაი, პედიასი, ანოსი, კარაბასიონი, ელიაშიბი, მარნითანემოსი, ელიასისი, ბინუი, ელიალისი, შიმეი, შელემია, ნეთანია; ეზორას ძეთაგან: შაშაი, აზარელი, აზაელი, სამატოსი, ზამბრისი, იოსები;

³⁵ნოომას ძეთაგან — მაზიტიასი, ზაბადი, იდო, იოელი და ბენაია.

³⁶ყველა ესენი ცხოვრობდნენ უცხო ტომის ცოლებთან და გაუშვეს ისინი ბავშვებიანად.

³⁷და დამკვიდრდნენ მღვდლები, ლევიანები და ისრაელიანები იერუსალიმში და სოფლად, მეშვიდე თვის ახალმთვარობისას, ხოლო ისრაელიანები — თავ-თავიანთ ადგილას.

³⁸მთელმა ხალხმა ერთად მოიყარა თავი აღმოსავლეთის ბჭესთან, გაშლილ ადგილას.

³⁹და სთხოვეს ეზრას, მღვდელმთავარსა და მკითხველს, გამოეტანა მოსეს სჯული, ბოძებული უფლის, ისრაელის ღმერთის მიერ.

⁴⁰გამოუტანა მღვდელმთავარმა ეზრამ სჯული მთელ ხალხს, კაციდან ქალამდე, და ყველა მღვდელს, რათა მოესმინათ იგი მეშვიდე თვის ახალმთვარობისას.

⁴¹კითხულობდა ტაძრის ბჭესთან, გაშლილ ადგილას, ცისკრიდან შუადღემდე, კაცებისა და ქალების წინაშე, და მთელი ხალხი უსმენდა სჯულს.

⁴²და შედგა ეზრა, მღვდელი და მკითხველი, გამზადებულ ფიცარნაგზე.

⁴³მხარმარჯვნივ ედგნენ მათათია, შემაყი, ანანია, აზარია, ურია, ხიზკია და ბალსამუსი;

⁴⁴ხოლო ხელმარცხნივ — ფედაია, მისაელი, მალქია, ლოთასუბუსი, ნაბარია და ზაქარია.

⁴⁵აიღო ეზრამ სჯულის წიგნი ხალხის თვალწინ და დიდებით დაჯდა ყველას წინაშე.

⁴⁶სჯულს რომ ხსნიდა, ყველა წელგამართული იდგა; და აკურთხა ეზრამ უფალი ღმერთი, უზენაესი ღმერთი საბაოთ, ყოვლისმპყრობელი.

⁴⁷მთელმა ხალხმა ერთხმად შეჰღაღადა: ამინ! ხელაპყრობილი დაემხო მიწაზე და თაყვანი სცა უფალს.

⁴⁸ლევიანები — იესო და ანიუთი, შერებია და იადინუსი, აკუბი და შაბეთაი, ჰოდია, მაიანასი, კელიტა, აზარია, იოზაბადი, ანანი და ფელაია ხალხის წინაშე კითხულობდნენ უფლის სჯულს და იმავდროულად, კიდევაც განმარტავდნენ მას.

⁴⁹და უთხრა ატარატესმა ეზრას, მღვდელმთავარსა და მკითხველს, და ლევიანებს, ყველაფერს რომ ასწავლიდნენ ხალხს:

⁵⁰წმიდაა ეს დღე უფლისათვის — და ყველანი ტიროდნენ, როცა უსმენდნენ სჯულს —

⁵¹მაშ, წადით, ჭამეთ ნოყიერი და სვით ტკბილი, და წყალობას ნუ მოაკლებთ უპოვართ,

⁵²ვინაიდან წმიდაა ეს დღე უფლისათვის და ნუ მწუხარებთ, რადგან უფალი განგადიდებთ თქვენ.

⁵³ლევიანებიც შეაგონებდნენ ხალხს და ამბობდნენ: წმიდაა ეს დღე და ნუ მწუხარებთო.

⁵⁴წავიდნენ ყველანი, რათა ესვათ და ეჭამათ, ელხინათ და გაეკითხათ უპოვარნი; და ხარობდნენ დიდად,

⁵⁵რადგანაც გამსჭვალულნი იყვნენ სიტყვებით, საკრებულოში რომ ესწავლათ.