Read ქართული ბიბლია, სრული ვერსია Tobit 10 Bible Online

Tobit 10 - ქართული ბიბლია, სრული ვერსია bible

Tobit 10

¹ხოლო ტობითი, მამამისი, დღეს დღეზე ითვლიდა. როცა სამგზავროდ დათქმული დღეები მიილია, ტობია კი არსად ჩანდა.

²თქვა: იქნებ შეაყოვნეს სადმე? ან იქნებ მოკვდა გაბაელი და ვერცხლის დამბრუნებელი აღარავინაა?

³და დამწუხრდა ძლიერ.

⁴ცოლმა კი უთხრა: ნამდვილად დაგვეღუპა შვილი, ამიტომაც აღარ ჩანს. მოთქმა-გოდება დაიწყო და თქვა:

⁵რატომ გამწირე, შვილო, რატომ დამივსე თვალი?

⁶ტობითმა უთხრა: გაჩუმდი, ხმა აღარ ამოიღო! ჩვენი შვილი კარგადაა.

⁷ანამ მიუგო: შენ თვითონ გაჩუმდი! რას მატყუებ? შვილი აღარა მყავსო. ანა ყოველდღე გადიოდა ქალაქგარეთ და გაჰყურებდა გზას, რომელსაც დაადგა მისი შვილი. დღისით ლუკმას არ იკარებდა და ღამით განუწყვეტლივ მოსთქვამდა ტობიაზე, ვიდრე არ გასრულდა ქორწილის 14 დღე, ფიცის თანახმად, რაგუელთან რომ უნდა დაეყო.

⁸და უთხრა ტობიამ რაგუელს: გამიშვი, რადგან დედაჩემს და მამაჩემს, ალბათ, უკვე გადაუწყდათ ჩემი ხილვის იმედი.

⁹უთხრა სიმამრმა: დარჩი, კაცს გავგზავნი მამაშენთან და მიუტანს შენს ამბავს. მაგრამ ტობიამ უთხრა: არა, მე თვითონ გამგზავნე მამაჩემთან.

¹⁰მაშინ ადგა რაგუელი და მისცა სარა, მისი ცოლი, და თავისი ქონების ნახევარი — მსახურნი, საქონელი და ვერცხლი.

¹¹დალოცა ისინი და ვიდრე გაისტუმრებდა, უთხრა: მშვიდობით გატაროთ, შვილებო, მამაზეციერმა ჩემს სიკვდილამდე.

¹²თავის ასულს კი უთხრა: პატივი ეცი შენს დედამთილ-მამამთილს, ახლა ისინი არიან შენი მშობლები. სულ მუდამ კარგი მსმენოდეს შენზე. და აკოცა მას.

¹³ხოლო ედნამ უთხრა ტობიას: მამაზეციერი იყოს შენი მფარველი, საყვარელო ძმაო, ღმერთმა მომასწროს შენი და ჩემი სარას შვილებს, რათა ვაკურთხო ისინი უფლის წინაშე. აი, გაბარებ ჩემს ქალს და ნუ დამიჩაგრავ.

¹⁴მერე გამოეთხოვა ტობია რაგუელს და მის ცოლს. გზას გაუდგა და ლოცავდა ღმერთს, რომ ხელი მოუმართა მგზავრობაში.