Read ქართული ბიბლია, სრული ვერსია Tobit 13 Bible Online

Tobit 13 - ქართული ბიბლია, სრული ვერსია bible

Tobit 13

¹სიხარულით დაწერა ტობითმა ლოცვა და თქვა:

²კურთხეულია მარად ცოცხალი ღმერთი და მისი სასუფეველი, რადგანაც იგია დამსჯელიც და შემწყნარებელიც, ჯოჯოხეთს ჩამყვანიც და ამომყვანიც; ვერავინ დაუსხლტება ხელიდან.

³აღიარეთ იგი წარმართთა წინაშე, ისრაელის ძენო, რადგანაც მან მიმოგფანტათ მათ შორის.

⁴მათ აუწყეთ მისი სიდიადე,

⁵ყოველი სულდგმულის წინაშე ადიდეთ იგი, რადგანაც ის არის ჩვენი უფალი და ღმერთი ის არის ჩვენი მამა უკუნითი უკუნისამდე.

⁶ისა გვსჯის ჩვენი უსამართლობისათვის,

⁷მაგრამ კიდევაც შეგვიწყალებს და შეგვკრებს ყველა ხალხიდან, თუ გაბნეულნი ვიქნებით მათ შორის.

⁸თუ მთელი გულით მიიქცევით მისკენ

⁹და მთელი სულით ჰყოფთ სამართალს მის წინაშე, ისიც მოიქცევა თქვენსკენ და არ დაგიფარავთ თავის სახეს.

¹⁰იხილავთ, რის მოწევნასაც აპირებს თქვენზე.

¹¹ერთხმად აღიარეთ და აკურთხეთ სიმართლის უფალი, ადიდეთ საუკუნეთა მეუფე.

¹²ჩემი ტყვეობის ქვეყანაში ვადიდებ მას

¹³და ცოდვილთა მოდგმას განვუცხადებ მის ძალასა და სიდიადეს. მოიქეცით, ცოდვილნო, და ქენით სამართალი მის წინაშე. ვინ იცის, იქნებ შეგიწყნაროთ და მოწყალება მოიღოს თქვენზე.

¹⁴ვადიდებ ჩემს ღმერთს,

¹⁵ჩემი სული ადიდებს ცათა მეუფეს და მისი სიდიადით ხარობს.

¹⁶ყველამ გააცხადოს და აღიაროს იგი იერუსალიმში.

¹⁷იერუსალიმო, წმიდა ქალაქო! დაგსჯის შენი შვილების საქმეთა გამო და კვალად შეიწყალებს მართალთა შვილებს.

¹⁸გულმოდგინედ ადიდე უფალი

¹⁹და აკურთხე საუკუნეთა მეუფე, რათა შენთვის კვლავაც მადლით აშენდეს მისი კარავი;

²⁰რათა შენში სიხარულით აღავსოს ტყვედ წასხმულნი,

²¹და შეიყვაროს შენში საუკუნის ყოველი თაობის ტანჯულნი.

²²მრავალი ხალხი შორიდან მოვა უფალი ღმერთის სახელთან,

²³ცათა მეუფისათვის მიძღვნილი ძღვენით ხელში, თაობათა-თაობანი შეგასხამენ ქება-დიდებას.

²⁴წყეულიმც იყოს ყოველი შენი მოძულე,

²⁵კურთხეულ იყოს ყოველი შენი მოყვარე უკუნისამდე.

²⁶ილხენდე და იხარებდე მართალთა შვილების გამო,

²⁷რადგანაც თავს შეიყრიან და აკურთხებენ მართალთა უფალს. ნეტარნი არიან შენი მოყვარენი, რომელნიც გაიხარებენ შენი მშვიდობით.

²⁸ნეტარნი არიან შენი ტანჯვის გამო შეურვებულნი,

²⁹რადგანაც გაიხარებენ შენით, როცა იხილავენ მთელ შენს დიდებას და აღარასოდეს დაელევათ სიხარული. მაშ, აკურთხოს სულმა ჩემმა დიდ მეუფე — ღმერთი.

³⁰რადგანაც საფირონითა და სმარაგდით აშენდება იერუსალიმი,

³¹პატიოსანი თვლებით — მისი გალავანი ბაჯაღლო ოქროთი — მისი კოშკები და ბურჯები, ხოლო იერუსალიმის მოედნები — ბერილონით, ანთრაკით და სუფირული ქვით მოიკირწყლება.

³²მის ყოველ კუთხეში იგუგუნებს „ალილუია!“ და ქება-დიდებით

³³იტყვიან: „კურთხეულია ღმერთი, რომელმაც აღგაზევა უკუნისამდე!“