Read ქართული ბიბლია, სრული ვერსია Tobit 2 Bible Online

Tobit 2 - ქართული ბიბლია, სრული ვერსია bible

Tobit 2

¹როდესაც შინ მოვედი და დამიბრუნეს ანა, ჩემი ცოლი, და ტობია, ჩემი ძე, ორმოცდაათობის დღესასწაულზე, რომელიც არის წმიდა შვიდი შვიდეული, მშვენიერი სადილი მომიმზადეს და პურის საჭმელად დავჯექი.

²თვალი გადავავლე უამრავ სასმელ-საჭმელს და ჩემს ვაჟს ვუთხარი: წადი და მომგვარე ერთი ჩვენი უპოვარ მოძმეთაგანი, მე კი აქ დაგელოდები-მეთქი.

³უკან მობრუნებულმა მითხრა: მამა, ერთი ჩვენი მოძმეთაგანი გაგუდული დაუგდიათო მოედანზე.

⁴მაშინ მე, ვიდრე ლუკმას გავტეხდი, სასწრაფოდ გავეშურე და, მზის ჩასვლამდე, ერთ სახლში დავმალე გვამი.

⁵შინ რომ მოვბრუნდი, განვიბანე და დამწუხრებულმა ვჭამე პური.

⁶გავიხსენე წინასწარმეტყველება ამოსისა, რომელმაც თქვა: თქვენი დღესასწაულები გლოვად გექცევათ, თქვენი სიხარული კი — გოდებადო; და ავტირდი.

⁷მზე რომ ჩავიდა, გავედი, საფლავი გავთხარე და დავმარხე იგი.

⁸ახლობლები დამცინოდნენ და ამბობდნენ: არ ეშინია, რომ ამ საქმის გამო მოკლან? აკი ერთხელ უკვე გაიქცა და აი, ხელახლა მარხავსო მკვდრებს.

⁹იმავე ღამეს, დასაფლავებიდან დაბრუნებული განუბანლად დავწექი ეზოს გალავანთან. სახეზე არა მეფარა რა.

¹⁰ვერ შევნიშნე, რომ გალავანზე ბეღურები ისხდნენ, თვალგახელილს თბილი სითხე გადმომაღვარეს და თვალებზე ლიბრი გადამეკრა. ვიარე ექიმებთან, მაგრამ ვერაფერი მიშველეს, ახიკარი მინახავდა, სანამ ელიმაისში არ წავიდა.

¹¹შემდეგ კი ჩემი ცოლი ანა მქსოველად დაუდგა ქალბატონებს.

¹²თავის ნამუშევარს უგზავნიდა მათ და ისინიც უხდიდნენ, რაც ეკუთვნოდა; ერთხელაც თიკანი აჩუქეს.

¹³ჩემთან რომ მოიყვანეს, აკიკინდა; ვკითხე ანას, ვინ მოგცა ეს თიკანი, მოპარული ხომ არ არის? დაუბრუნე, ვისიცაა, ნაქურდალის ჭამა არა ხამს-მეთქი.

¹⁴მან მიპასუხა, მაჩუქესო. არ დავუჯერე და ვუთხარი პატრონისათვის დაებრუნებინა და გავუწყერი. მან კი პასუხად მომიგო: სადაა შენი წყალობანი და კეთილი საქმენი? აი, რად გექცა ყოველი.