Read ქართული ბიბლია, სრული ვერსია Tobit 7 Bible Online

Tobit 7 - ქართული ბიბლია, სრული ვერსია bible

Tobit 7

¹შევიდნენ ეკბატანაში და მიადგნენ რაგუელის სახლს. სარა გამოეგება და მიესალმა მათ, მათაც სალამი უთხრეს, და შინ შეუძღვა სტუმრებს.

²და უთხრა რაგუელმა ედნას, თავის ცოლს: როგორა ჰგავს ეს ჭაბუკი ტობითს, ჩემს მოძმეს.

³ჰკითხა რაგუელმა მათ: სადაურები ხართ, ძმებო? მიუგეს: ნაფთალის ძენი ვართ, ნინევეში ტყვედ წასხმულთაგანნი.

⁴კვლავ ჰკითხა მათ: ტობითს თუ იცნობთ, ჩემს ძმას? და მათ მიუგეს, ვიცნობთო.

⁵ისიც იკითხა: ხომ კარგადაა? მიუგეს: ცოცხალია და კარგადაა. ხოლო ტობიამ დასძინა: მამაა ჩემი.

⁶წამოხტა რაგუელი, გადაკოცნა, დალოცა და უთხრა: ო, კეთილი და ღირსეული მამის შვილო! მაგრამ როდესაც გაიგო, რომ ტობითს თვალი დავსებოდა, დამწუხრებული ატირდა.

⁷ტიროდა ედნაც, მისი ცოლი, და სარა, მისი ასული. სტუმართმოყვრულად მიიღეს ისინი.

⁸ცხვარი დაუკლეს და დიდებული სუფრა გაუშალეს.

⁹უთხრა ტობიამ რაფაელს: აზარია, ძმაო, უთხარი რაგუელს, რასაც გზაში მეუბნებოდი, და ბარემ მოვათავოთ ეს საქმე.

¹⁰რაფაელმა ყველაფერი გადასცა რაგუელს, ხოლო მან ტობიას უთხრა: ჭამე, სვი და მოილხინე. ჩემი ასული შენი საბედოა, მაგრამ სიმართლე უნდა გითხრა:

¹¹შვიდ ქმარს მივეცი ჩემი ასული, მაგრამ ვინც კი მასთან შევიდა, იმავე ღამეს სიცოცხლეს გამოეთხოვა. ახლა კი მოილხინე.

¹²უთხრა ტობიამ: ლუკმას არ ჩავიდებ პირში, ვიდრე არ მოილაპარაკებთ და თანხმობას არ მომცემთ. და თქვა რაგუელმა: ახლავე წაიყვანე ჩვენი წესისამებრ. შენ ძმა ხარ მისი და ის შენია. სიკეთე ნუ მოგიშალოთ მოწყალე ღმერთმა.

¹³მოიხმო რაგუელმა სარა, თავისი ასული, ხელი დაუჭირა, ცოლად მისცა ტობიას და თქვა: აჰა, წაიყვანე მოსეს სჯულისამებრ და მიუყვანე მამაშენს. მერე კი დალოცა ისინი.

¹⁴შემდეგ უხმო ედნას, თავის ცოლს, აიღო გრაგნილი, პირობა დაწერა და ბეჭედი დაასვა.

¹⁵კვლავ უხმო ედნას, თავის ცოლს, და უთხრა: გაამზადე, დაო, სხვა სანთიობო და შეიყვანე შენი ასული.

¹⁶ედნა ისე მოიქცა, როგორც ქმარმა უთხრა. შეიყვანა ქალი სანთიობოში და ატირდა. ატირდა სარაც. ცრემლი მოსწმინდა თავის ქალს და უთხრა:

¹⁷„გამაგრდი, შვილო, ცისა და მიწის მეუფე მოგაგებს მადლს ამდენი დარდის სანაცვლოდ. გამაგრდი, შვილო.“