Read ქართული ბიბლია, სრული ვერსია Judith 11 Bible Online

Judith 11 - ქართული ბიბლია, სრული ვერსია bible

Judith 11

¹ჰოლოფერნემ უთხრა მას: დამშვიდდი, ქალო, ნუ შეკრთება შენი გული, რადგანაც არავის მოვქცევივარ უკეთურად, ვინც ირჩია ყოფილიყო მთელი ქვეყნიერების მეფის — ნაბუქოდონოსორის მონა-მორჩილი.

²ახლაც, მთიანეთში მოსახლე შენს ხალხს რომ არ შეურაცხვეყავი, ჩემს მახვილს არ აღვმართავდი მათზე, მაგრამ თვითონვე ჩაიგდეს თავი ამ დღეში.

³მაშ, მითხარი, რატომ გამოექეცი მათ და ჩვენ მოგვაშურე? ნუ გეშინია, სწორედ აქ ჰპოვებ ხსნას: ამაღამაც ცოცხალი დარჩები და შემდეგშიაც.

⁴უბატონოდ ხმას ვერავინ გაგცემს და არც წყალობა მოგაკლდება, როგორც ჩემი მბრძანებლის — ნაბუქოდონოსორ მეფის ყველა მონა-მორჩილს.

⁵ივდითმა მიუგო მას: ისმინე შენი მონამორჩილის სიტყვა, ნება მიბოძე შენს მხევალს შენს წინაშე ვილაპარაკო: არ ვეცრუები ჩემს მბრძანებელს ამაღამ.

⁶თუ ყურად იღებ შენი მხევლის სიტყვებს, ღმერთი შენი მეშვეობით აღასრულებს საქმეს და არ გაცუდდება ჩემი მბრძანებლის განზრახვა.

⁷დღეგრძელი იყოს მეფე ნაბუქოდონოსორი და დღეგრძელი იყოს მისი მეუფება, შენ რომ წარმოგგზავნა, რათა წრფელი გზით წარმართო ყოველი სული, და შენი მეშვეობით მართო ადამიანები კი არ მორჩილებდნენ მას, არამედ, შენივე ძალმოსილების წყალობით, ველური მხეცებიც, საქონელიც და ცის ფრინველებიც ჰმონებდნენ ნაბუქოდონოსორს და მთელ მის სახლს.

⁸რადგანაც გვსმენია შენი სიბრძნე და შენი შორსმჭვრეტელობა, მთელმა ქვეყანამ იცის, რომ მხოლოდ შენა ხარ კეთილი მთელ სამეფოში, სიბრძნით ძლიერი და ბრძოლის ველზე — სწორუპოვარი.

⁹ხოლო რაც აქიორს მოუხსენებია შენი საკრებულოსათვის, ჩვენც შევიტყვეთ, რადგანაც ბეთულიელებმა შეიწყნარეს იგი და მან გვიამბო ყველაფერი, რაც შენთვის უთქვამს.

¹⁰ამიტომ, ჩვენო ბატონო და მბრძანებელო, ნუ უგულებელყოფ მის სიტყვას, არამედ გულს ჩაიბეჭდე, რადგანაც ჭეშმარიტია იგი: შეუძლებელია ჩვენი მოდგმის დასჯა, მახვილი ვერ მძლავრობს მასზე, თუკი თავისი ღმერთის წინაშე არ სცოდა.

¹¹ახლა კი, ჩემი მბრძანებელი რომ ვერ უკუაქციონ და ამაოდ არ დაშვრეს, სიკვდილმა უწია ჩემს თვისტომთ, რადგანაც ცოდვაში ჩაიდგეს ფეხი, ვინაიდან იმის ჩადენას აპირებენ, რისი ქმნაც არა ხამს.

¹²რაკიღა სურსათ-სანოვაგე შემოაკლდათ და წყლის მარაგი გამოელიათ, გადაწყვიტეს თავიანთ პირუტყვს დაერიონ და საჭმელად გამოიყენონ ყოველივე ის, რისი ჭამაც უფალმა ღმერთმა თავისი სჯულით სასტიკად აგვიკრძალა.

¹³იმასაც კი აპირებენ, რომ საჭმელად მოიხმარონ პირველმოწეული პური და ღვინისა თუ ზეთის მეათედი, რაც წმიდაჰყვეს და მღვდლებს არგუნეს, ჩვენს ღმერთს რომ ემსახურებიან იერუსალიმში, თუმცა მათთვის ხელის ხლებაც კი ეკრძალება ერისკაცთაგანს.

¹⁴ხალხიც კი აფრინეს იერუსალიმში, ვინაიდან იქაურებიც ამას სჩადიან, რათა ნებართვა მიიღონ უხუცესთაგან.

¹⁵როგორც კი ნებართვას მიიღებენ და განზრახულს შეასრულებენ, იმავე დღეს თქვენი წერა გახდებიან.

¹⁶აი, რატომაა, რომ მე, შენი მონა-მორჩილი, ყოველივე ამის შეტყობინებისთანავე გამოვექეცი მათ; ღმერთმა გამომგზავნა, რათა შენთან ერთად აღვასრულო საქმე, რომელიც გააოგნებს ყველას, ვინც კი მოისმენს მას.

¹⁷რადგანაც ღვთისმოსავია შენი მონა-მორჩილი და დღედაღამ ემსახურება ცის ღმერთს. ახლა კი შენთან დავრჩები ჩემო მბრძანებელო; მხოლოდ ნება მიბოძე ღამ-ღამობით ხეობაში გავიდე და ვილოცო ღმერთის მიმართ, რომელიც მამცნობს, როდის შესცოდავენ ისინი.

¹⁸მე კი დაბრუნებისთანავე გაუწყებ შენ, და დაიძვრები მთელი შენი ლაშქრითურთ; ვერცერთი მათგანი ვერ აღგიდგება წინ.

¹⁹მთელი იუდას გავლით ჩაგიყვან იერუსალიმს და მის შუაგულში დაგიდგამ ტახტს; უმწყემსო ფარასავით წაირეკე ისინი, ძაღლიც კი ვერ გაგიბედავს შემოყეფას. ყოველივე ეს ჩემი წინასწარხედვით მემცნო და მეუწყა მე, და მოვლენილ ვიქენ, რომ შენც შეგატყობინო.

²⁰მოეწონათ ეს სიტყვა ჰოლოფერნეს და მის მსახურებს, და მისი სიბრძნით განცვიფრებულებმა თქვეს:

²¹მთელი დედამიწის ზურგზე არ მოიძებნება ქალი, მას რომ შეედრებოდეს სახის სილამაზითა და სიტყვის გონიერებით.

²²ჰოლოფერნემ უთხრა: ღმერთმა ინება, რომ შენ გამოეგზავნე წინასწარ, რათა ჩვენს ხელთ ყოფილიყო ძალა, ჩემი ღმერთის მოძულეთა შორის კი — სიკვდილი.

²³მომხიბლავი ხარ გარეგნობით და სათნო — სიტყვით. თუ აასრულებ იმას, რაცა თქვი, შენი ღმერთი ჩემი ღმერთი იქნება, მეფე ნაბუქოდონოსორის სასახლეში იცხოვრებ და მთელი დედამიწის ზურგზე გაითქვამ სახელს.