Read ქართული ბიბლია, სრული ვერსია Judith 12 Bible Online

Judith 12 - ქართული ბიბლია, სრული ვერსია bible

Judith 12

¹და ბრძანა შეეყვანათ იქ, სადაც მისი ვერცხლის ჭურჭელი ეწყო, მისი კერძი მიერთმიათ სუფრაზე და მისივე ღვინო მიეცათ სასმელად.

²მაგრამ ივდითმა თქვა: პირს არ დავაკარებ ამას, რათა საცთურად არ მექცეს, არამედ ჩემს საგზალს ვიკმარებ.

³ჰოლოფერნემ მიუგო მას: კი მაგრამ, როცა ეგ საგზალი გაგითავდება, სადღა გიშოვოთ მაგისი მსგავსი, რადგანაც ჩვენს შორის არავინაა შენი მოდგმისა?

⁴ივდითმა პასუხად თქვა: შენმა სიცოცხლემ, ჩემო მბრძანებელო, არ დახარჯავს შენი მხევალი ყველაფერს, რაც თანა აქვს, ვიდრე უფალი ჩემი ხელით არ აღასრულებს იმას, რაც განუზრახავს.

⁵ჰოლოფერნეს მსახურებმა კარავში შეიყვანეს იგი და იქ შუაღამემდე ეძინა; დილაუთენია კი ადგა

⁶და ჰოლოფერნეს შეუთვალა: იქნებ ინებოს ჩემმა ბატონმა და მის მხევალს სალოცავად წასვლის ნება დართოს.

⁷ჰოლოფერნემ უბრძანა თავის სხეულის მცველებს გაეტარებინათ ქალი. ასე დაჰყო მან ბანაკში მთელი სამი დღე. ღამ-ღამობით ბეთულიას ხეობაში გადიოდა და წყაროს წყლით იბანდა ტანს.

⁸მერე კი ევედრებოდა ისრაელის უფალ ღმერთს, კეთილად წარემართა მისი გზა უფლის ერის სახსნელად.

⁹განბანილი ბრუნდებოდა კარავში და იქ რჩებოდა, ვიდრე საღამო ჟამს საზრდოს არ მიართმევდნენ.

¹⁰მეოთხე დღეს ჰოლოფერნემ ლხინი გამართა მხოლოდ თავის მსახურთათვის და თავისი ხალხიდან მეტი არავინ მიუწვევია.

¹¹და უთხრა საჭურის ბაგოასს, მთელი მისი საბადებლის მოურავს: წადი და უთხარი იმ ებრაელ ქალს, შენ რომ გაბარია, მოვიდეს და ჩემთან ერთად ჭამოს და სვას.

¹²სირცხვილიცაა, ასეთი ქალი ისე გავუშვათ ხელიდან, რომ ვერ დავიახლოვოთ. თუ არ მოვიწვევთ, დაგვცინებს კიდეც.

¹³ჰოლოფერნესგან გამოსული ბაგოასი ივდითთან მივიდა და უთხრა: ნუ იუარებ, მშვენიერო ყმაწვილო ქალო, ჩემს მბრძანებელთან მისვლას, რათა პატივი მოგეგოს მის წინაშე, ჩვენთან ერთად სვა ღვინო სამხიარულოდ და დღევანდელ დღეს ისე იყო, როგორც ასურის ძეთა ასულნი, ნაბუქოდონოსორის სასახლეს რომ ამშვენებენ.

¹⁴მიუგო მას ივდითმა: ვინა ვარ მე, რომ უარი ვუთხრა ჩემს მბრძანებლს? ახლავე ისე მოვიქცევი, როგორც მას ეამება და სიკვდილის დღემდე სასიხარულოდ დამრჩება ეს.

¹⁵ადგა, სასალუქო სამოსითა და მთელი თავისი სამკაულებით მოიკაზმა, მისმა მოახლემ კი ჰოლოფერნეს წინ ცხვრის ტყავი დაუგო, ბაგოასისთვის რომ გამოერთმია საყოველდღიურო სახმარად, რათა საჭმლის ჭამისას მასზე ფეხმორთხმით მჯდარიყო.

¹⁶შევიდა ივდითი და დაჯდა. ჰოლოფერნეს გული შეუვარდა მასზე და სული აემღვრა, ისე ძალიან მოუნდა დაუფლებოდა ქალს. მას შემდეგ, რაც პირველად ნახა იგი, ხელსაყრელ შემთხვევას ეძებდა მის საცთუნებლად.

¹⁷და უთხრა მას ჰოლოფერნემ: სვი და ილხინე ჩვენთან ერთად.

¹⁸ხოლო ივდითმა მიუგო: ვსვამ, მბრძანებელო, ვინაიდან დღეს ამაღლდა ჩემი სიცოცხლე, როგორც არასდროს ჩემი გაჩენის დღიდან.

¹⁹დასწვდა ყველაფერს, რაც მოახლეს მოემზადებინა მისთვის და ჰოლოფერნეს წინაშე ჭამა და სვა.

²⁰ჰოლოფერნე ტკბებოდა მისი სიახლოვით; ღვინოს მიეძალა და იმდენი სვა, თავის დღეში რომ არ უსვამს.