Read ქართული ბიბლია, სრული ვერსია Judith 14 Bible Online

Judith 14 - ქართული ბიბლია, სრული ვერსია bible

Judith 14

¹ხოლო ივდითმა უთხრა მათ: მისმინეთ, ძმებო, აიღეთ და ჩამოჰკიდეთ ეს თავი თქვენი გალავნის ქონგურზე.

²როცა ინათებს და მზე თავის სხივებს მოჰფენს დედამიწას, თქვენი საომარი საჭურველი აისხით; ვისაც გული ერჩის, ქალაქგარეთ გავიდეს წინამძღოლის მეთაურობით, თითქოს დაბლობზე ჩასვლას აპირებდეთ, რათა თავს დაესხათ ასურის ძეთა მცველებს, მაგრამ ჩასვლით კი ნუ ჩახვალთ.

³მაშინ ისინი იარაღს დასტაცებენ ხელს და თავიანთ ბანაკს მიაშურებენ, გააღვიძებენ ასურელთა ლაშქრის სარდლებს და ჰოლოფერნეს კარავს მისცვივდებიან, მაგრამ რაკი ვერ იპოვიან, თავზარდაცემულნი უკუიქცევიან თქვენს წინაშე.

⁴ხოლო თქვენ და ისრაელის მიწა-წყლის ყოველმა მკვიდრმა ფეხდაფეხ მისდიეთ და მუსრი გაავლეთ გაქცეულთ.

⁵მანამდე კი აქ მომგვარეთ აქიორ ამონელი; დაე, თავისი თვალით იხილოს და ამოიცნოს ისრაელის სახლის მაგინებელი და, ვით სიკვდილი, ჩვენი მოდგმის აღმოსაფხვრელად მოვლინებული.

⁶გამოიხმეს აქიორი ოზიას სახლიდან. როცა მოვიდა და ჰოლოფერნეს თავი დაინახა, შეკრებილთა შორის ერთ კაცს რომ ეჭირა ხელში, პირქვე დაეცა გულწასული.

⁷როდესაც წამოაყენეს, ფეხქვეშ ჩაუვარდა ივდითს, თაყვანი სცა და უთხრა: კურთხეული ხარ იუდას ყველა კარავში და ყველა ხალხში, განცვიფრებულნი რომ დარჩებიან შენი სახელის გაგონებისას.

⁸ახლა კი მაუწყე, რას აკეთებდი ამ დღეების განმავლობაში? და ივდითმა, ხალხის თანდასწრებით, უამბო ყველაფერი, რაც მოემოქმედა წასვლიდან დღევანდელ დღემდე.

⁹ლაპარაკს რომ მორჩა, ხმამაღლა შეჰღაღადა ხალხმა და სიხარულის ყიჟინამ კიდით კიდემდე დაუარა ქალაქს.

¹⁰აქიორმა კი, როცა იხილა ყველაფერი, რაც მოიმოქმედა ისრაელის ღმერთმა, მთელი არსებით ირწმუნა იგი, წინადაიცვითა და შეუერთდა ისრაელის სახლს თვით დღევანდელ დღემდე.

¹¹როგორც კი ინათა, ქონგურზე გადმოკიდეს ჰოლოფერნეს თავი. ყველამ თავისი იარაღი აისხა და რაზმებად დაწყობილნი მთის კალთისაკენ დაიძრნენ.

¹²მათ დანახვაზე ასურელებმა თავიანთ წინამძღოლებთან აფრინეს ხალხი, წინამძღოლებმა კი თავიანთ სარდლებს, ათასისთავებს და სხვა თავკაცებს მიაშურეს.

¹³ჰოლოფერნეს კარავთან მისულებმა მთელი მისი ავლადიდების გამრიგეს უთხრეს: გააღვიძე ჩვენი მბრძანებელი, რადგანაც მონები ისე გაკადნიერდნენ, რომ ჩვენს წინააღმდეგ საბრძოლველად გამოვიდნენ, რათა დედაბუდიანად გავავლოთ მუსრი.

¹⁴შევიდა ბაგოასი და კარვის კარზე დააკაკუნა, რადგანაც ეგონა ივდითთან ერთად სძინავსო.

¹⁵ხმა რომ არავინ გასცა, კარი გააღო, საწოლში შევიდა და ჰოლოფერნეს თავმოკვეთილი გვამი დაინახა.

¹⁶ხმამაღლა შებღავლა, ოხვრა-გმინვასა და მოთქმა-გოდებას მოჰყვა და ტანსაცმელი შემოიგლიჯა.

¹⁷ივდითის კარავში შევიდა, მაგრამ ქალი იქ რომ არ დახვდა, გარეთ გამოვარდა და ხალხს შესტირა:

¹⁸მონებმა გვიმუხთლეს! ერთმა ებრაელმა ქალმა თავს ლაფი დაასხა მეფე ნაბუქოდონოსორის სახლს, რადგანაც, აი, ჰოლოფერნე თავმოკვეთილი გდია მიწაზე.

¹⁹ამის გაგონებაზე ასურელთა ლაშქრის სარდლებმაც ტანსაცმელი შემოიგლიჯეს და მათმა ბღავილმა მთელი ბანაკი შეძრა.