Read ქართული ბიბლია, სრული ვერსია Judith 15 Bible Online

Judith 15 - ქართული ბიბლია, სრული ვერსია bible

Judith 15

¹ეს რომ კარვებში მყოფთაც გაიგეს, შეძრწუნდნენ იმის გამო, რაც მოხდა.

²შიშმა და ძრწოლამ მოიცვა ისინი; კაციშვილი არ დარჩენილა ერთმანეთის გვერდით, არამედ ერთდროულად გამოცვივდნენ და დაბლობისა და მთებისაკენ მიმავალი გზებით მოჰკურცხლეს.

³ბეთულიას ირგვლივ, მთის კალთებზე დაბანაკებულნიც უკუიქცნენ, და მაშინ ისრაელის ძენი, ვისაც კი ბრძოლა შეეძლო, ფეხდაფეხ მიჰყვნენ მათ.

⁴ოზიამ ხალხი აფრინა ბეთომასთაიმში, ბებაიში, ქობაში, კოლასა და ისრაელის ყველა კუთხეში იმის საუწყებლად, რაც მოხდა, რათა ყველანი თავს დასხმოდნენ მომხდურს და მუსრი გაევლოთ მისთვის.

⁵ეს რომ გაიგეს, ისრაელის ძენი ერთსულოვნად დაეცნენ თავს გაქცეულთ და ქობამდე კაფეს ისინი. მათ არც იერუსალიმელები და მთიელები ჩამორჩნენ, რომლებმაც შეიტყეს მტრის ბანაკში მომხდარი ამბავი. გალაადელებმაც და გალილეველებმაც მძვინვარედ შეუტიეს მტერს აქეთიქიდან, ვიდრე დამასკოსა და მის საზღვრებს მიღმა არ გადარეკეს ისინი.

⁶დანარჩენი ბეთულიელები კი თავს დაესხნენ ასურელთა ბანაკს, დაარბიეს და აივსნენ ნადავლით.

⁷ხოლო მტრის ხოცვა-ჟლეტის შემდეგ უკან შემოქცეული ისრაელის ძენი დაეუფლნენ ყოველივე იმას, რაც დარჩა; მთისა და ბარის დაბა-სოფლებმაც დიდძალი ნადავლი ჩაიგდეს ხელში, რადგან ურიცხვი იყო მისი სიმრავლე.

⁸მოვიდნენ მღვდელმთავარი იოაკიმი და ისრაელის ძეთა უხუცესნი, იერუსალიმის მკვიდრნი, რათა ენახათ, რა სიკეთე უყო უფალმა ისრაელს, ენახათ ივდითიც და მისალმებოდნენ მას.

⁹მასთან მისვლისთანავე აკურთხეს იგი და უთხრეს: შენა ხარ დიდება იერუსალიმისა, შენა ხარ სიამაყე ისრაელისა, შენა ხარ სიქადული ჩვენი მოდგმისა.

¹⁰შენი ხელით აღასრულე ყოველივე ეს; სიკეთე უყავ ისრაელს და წყალობა მოიღო მასზე ღმერთმა. კურთხეულ იყავ ყოვლისმპყრობელი ღმერთის მიერ უკუნისამდე. და თქვა მთელმა ერმა: იყოს!

¹¹30 დღის განმავლობაში ძარცვავდა ხალხი ბანაკს; და მისცეს ივდითს ჰოლოფერნეს კარავი, მთელი ვერცხლეული, საწოლი, სასმისები და მთელი დგამი მისი. ქალმაც შეაგროვა ისინი, აჰკიდა თავის ჯორს, შეაბა ურმები და მთელი ნადავლი ზედ დაუდო.

¹²ისრაელის ქალთა მთელი კრებული გამოეფინა მის სანახავად და აკურთხეს იგი; მადლი შესწირეს და ფერხული ჩააბეს მის სადიდებლად. აიღო ივდითმა რტოები და ჩამოურიგა მასთან მყოფ ქალებს.

¹³ზეთისხილის გვირგვინებით შეიმკეს შუბლი მანაც და მასთან მყოფთაც; როკვით მიდიოდა იგი მთელი ხალხის წინაშე და წინ მიუძღოდა ქალებს; ხოლო კაცები თავზე გვირგვინებითა და ბაგეზე საგალობლებით მიაცილებდნენ.

¹⁴და წამოიწყო ივდითმა ისრაელის ძეთა წინაშე სამადლობელი სიმღერა და მთელი ერი აჰყვა მას.