Read ქართული ბიბლია, სრული ვერსია Exodus 6 Bible Online

Exodus 6 - ქართული ბიბლია, სრული ვერსია bible

Exodus 6

¹უთხრა უფალმა მოსეს: „ახლა იხილავ, რასაც დავმართებ ფარაონს, რადგან მაგარი ხელი აიძულებს მას გაუშვას ებრაელები და მაგარი ხელი აიძულებს მას გაყაროს ისინი თავისი ქვეყნიდან.“

²და ელაპარაკა ღმერთი მოსეს და უთხრა: „მე ვარ უფალი!

³მე გამოვეცხადე აბრაამს, ისააკს და იაკობს ყოვლადძლიერ ღმერთად, ხოლო ჩემი სახელი — უფალი — არ გამიმხელია მათთვის.

⁴და დავუდე აღთქმა, რომ მივცემდი მათ ქანაანის ქვეყანას, სადაც ხიზნობდნენ ისინი.

⁵და მე ვისმინე კვნესა ისრაელიანთა, რომელნიც ეგვიპტელებს მონობაში ჰყავთ, და გავიხსენე ჩემი აღთქმა.

⁶ამიტომ ამცნე ისრაელიანთ: მე ვარ უფალი, მე გამოგიხსნით ეგვიპტელთა უღლიდან, და გაგათავისუფლებთ მათი მონობისგან. მე გიხსნით მოღერებული მკლავით და დიდი სასჯელების ძალით.

⁷მიგიღებთ ჩემს ხალხად და მე ვიქნები თქვენი ღმერთი, და გაიგებთ, რომ მე ვარ უფალი, თქვენი ღმერთი, თქვენი დამხსნელი ეგვიპტის უღლიდან.

⁸მე მიგიყვანთ ქვეყანაში, რომელიც ფიცით აღვუთქვი აბრაამს, ისააკს და იაკობს. და ახლა თქვენ გაძლევთ მას დასამკვიდრებლად. მე ვარ უფალი.“

⁹ასე ელაპარაკა მოსე ისრაელის ძეთ, მაგრამ მათ არ მოუსმინეს სულმოკლეობისა და მძიმე მონობის გამო.

¹⁰და უთხრა უფალმა მოსეს:

¹¹„მიდი, ელაპარაკე ფარაონს, ეგვიპტის მეფეს, რომ გაუშვას ისრაელიანები თავისი ქვეყნიდან.“

¹²ხოლო მოსემ უპასუხა უფალს: „აჰა, მე ისრაელის ძეთ არ მომისმინეს და რას მომისმენს მე ფარაონი, მე ხომ ენაბრგვილი ვარ?“

¹³და ელაპარაკა უფალი მოსეს და აარონს და უბრძანა მათ ისრაელიანთათვის და ფარაონისათვის, ეგვიპტის მეფისათვის, რომ გაეშვა ისრაელიანები ეგვიპტის ქვეყნიდან.

¹⁴ესენი არიან მთავრები თავ-თავიანთი მამის სახლებისა: ძენი რეუბენისა, ისრაელის პირმშოსი: ენოქი და ფალუ, ხეცრონი და ქარმი. ესაა რეუბენის საგვარეულო.

¹⁵ძენი სიმეონისა: იემუელი, იამინი, ოჰადი, იაქინი, ცოხარი, და შაული, ძე ქანაანელი ქალისა. ესაა სიმეონის საგვარეულო.

¹⁶ესენია ლევის ძეთა სახელები თაობების მიხედვით: გერშონი, კოჰათი და მერარი. იცოცხლა ლევიმ 137 წელი.

¹⁷ძენი გერშონისა: ლიბნი და შიმეყი, თავ-თავიანთი საგვარეულოებით.

¹⁸ძენი კოჰათისა: ყამრამი, იცჰარი, ხებრონი და ყუზიელი. და იცოცხლა კოჰათმა 133 წელი.

¹⁹ძენი მერარისა: მახლი და მუში. ესენია საგვარეულოები ლევისა მათი თაობების მიხედვით.

²⁰მოიყვანა ყამრამმა ცოლად იოქებედი, თავისი მამიდა. და მან უშვა აარონი და მოსე. და იცოცხლა ყამრამმა 137 წელი.

²¹ძენი იცჰარისა: კორახი, ნეფეგი და ზიქრი.

²²ძენი ყუზიელისა: მიშაელი, ელცაფანი და სითრი.

²³მოიყვანა აარონმა ცოლად ელიშებაყი, ასული ყამინადაბისა, ნახშონის და; და მან უშვა მას ნადაბი, აბიჰუ, ელეაზარი და ითამარი.

²⁴ძენი კორახისა: ასირი, ელკანა და აბიასაფი. ესენია კორახის საგვარეულოები.

²⁵ელეაზარმა, აარონის ძემ, ცოლად მოიყვანა ფუტიელის ასულთაგანი და მან უშვა მას ფინეხასი. ესენია ლევიანთა მთავრები თავ-თავიანთი საგვარეულოებით.

²⁶ეს ის აარონი და მოსეა, რომელთაც უთხრა უფალმა: „გაიყვანეთ ისრაელიანები ეგვიპტის ქვეყნიდან მწყობრად.“

²⁷ესენი ელაპარაკებოდნენ ფარაონს, ეგვიპტის მეფეს, რომ გაეყვანათ ისრაელიანები ეგვიპტიდან, — ესენი იყვნენ მოსე და აარონი.

²⁸იმ დღეს, როცა უფალი ელაპარაკებოდა მოსეს ეგვიპტის ქვეყანაში,

²⁹უთხრა მას: „მე ვარ უფალი! უთხარი ფარაონს, ეგვიპტის მეფეს, ყველაფერი, რასაც მე გეუბნები.“

³⁰და თქვა მოსემ უფლის წინაშე: „აჰა, მე ენაბრგვილი ვარ, და როგორ მომისმენს მე ფარაონი?“