Read ქართული ბიბლია, სრული ვერსია Exodus 9 Bible Online

Exodus 9 - ქართული ბიბლია, სრული ვერსია bible

Exodus 9

¹და უთხრა უფალმა მოსეს: „მიდი ფარაონთან და უთხარი, ასე თქვა-თქო უფალმა, ებრაელთა ღმერთმა: ‘გაუშვი ჩემი ხალხი, რათა მემსახუროს.

²თუ უარს იტყვი გაშვებაზე და კვლავ დააკავებ,

³აჰა, უფლის ხელი იქნება შენს საქონელზე, მინდვრად რომ გყავს — ცხენებზე, ვირებზე, აქლემებზე, ძროხაზე, ცხვარზე და თხებზე — გაჩნდება ძალზე მძიმე ჭირი.

⁴განარჩევს უფალი ისრაელიანთა საქონელს და ეგვიპტელთა საქონელს ერთმანეთისგან და არაფერი დაეხოცებათ ისრაელიანთ.’“

⁵და დანიშნა უფალმა ჟამი და თქვა: „ხვალ აღასრულებს ამ საქმეს უფალი ქვეყანაში.“

⁶და აღასრულა უფალმა ეს საქმე მეორე დღეს და გაწყდა ეგვიპტელთა საქონელი, ხოლო ისრაელიანთა საქონელს არც ერთი სული არ დაჰკლებია.

⁷გაგზავნა ფარაონმა შესატყობად და აჰა, არც ერთი სული არ იყო დაღუპული ისრაელის საქონელიდან. გაქვავდა ფარაონის გული და არ გაუშვა ხალხი.

⁸და უთხრა უფალმა მოსეს და აარონს: „აიღეთ სავსე პეშვი ქურის ნაცარი და ცისკენ ააფრქვიოს მოსემ ფარაონის თვალწინ.

⁹და მტვრად მოეფინება იგი მთელს ეგვიპტის ქვეყანას, და გამოაყრის კაცსა და პირუტყვს ჩირქოვანი მუწუკი ეგვიპტის მთელ ქვეყანაზე.“

¹⁰და აიღეს ქურის ნაცარი და წარდგნენ ფარაონის წინაშე და ააფრქვია ის მოსემ ზეცისკენ და გამოაყარა ჩირქოვანი მუწუკი კაცსა და პირუტყვს.

¹¹და ვერ შეძლეს გრძნეულებმა დგომა მოსეს წინაშე გამონაყარის გამო, რადგან გამონაყარი ჰქონდა მათაც და ყოველ ეგვიპტელს.

¹²და გაუსასტიკა უფალმა გული ფარაონს, და არ ისმინა მათი, როგორც ნათქვამი ჰქონდა უფალს მოსესთვის.

¹³და უთხრა უფალმა მოსეს: „ადექი დილაადრიანად, წარუდექი ფარაონს და უთხარი, ასე ამბობს-თქო უფალი, ებრაელთა ღმერთი: ‘გაუშვი ჩემი ხალხი, რათა მემსახუროს.

¹⁴თორემ ამჯერად ყოველგვარ სენს შევყრი შენს გულს, შენს მსახურებს და შენს ხალხს, რათა იცოდეთ, რომ არავინ არის ჩემი სწორი მთელს ქვეყანაზე,

¹⁵რადგან, ახლა რომ მომეღერებინა ჩემი ხელი, ხომ მოგსრავდით შენ და შენს ხალხს შავი ჭირით, და წარიხოცებოდით ამ ქვეყნიდან,

¹⁶მაგრამ იმისათვის დაგარჩინე, რომ გაჩვენო ჩემი ძალა, რომ ემცნოს ჩემი სახელი მთელ ქვეყანას.

¹⁷აქამდე აბუჩად იგდებ ჩემს ერს და არ უშვებ მათ.

¹⁸აჰა, დავუშენ ხვალ ამ დროს ძალზე ძლიერ სეტყვას, რომლის მსგავსიც არ ყოფილა ეგვიპტეში აქამდე დღიდან მისი დაფუძნებისა.’“

¹⁹ახლა კი გაგზავნე და შეკრიბე შენი ჯოგი და ყველაფერი, რაც მინდვრადა გყავს. ყოველი ადამიანი და პირუტყვი, რომელიც გარეთ დარჩება და ჭერს არ შეეფარება, დაისეტყვება და მოისპობა.

²⁰და ვინც შეუშინდა უფლის სიტყვას ფარაონის მსახურთაგან, ჭერქვეშ შეაფარა თავისი მსახურები და პირუტყვი;

²¹ხოლო ვინც არად ჩააგდო უფლის სიტყვა, მინდორში დატოვა თავისი მსახურები და საქონელი.

²²და უთხრა უფალმა მოსეს: „ცისკენ მიაღერე ხელი და დაისეტყვება მთელი ეგვიპტე — ადამიანები, პირუტყვი და ბალახი ველისა ეგვიპტის ქვეყანაში.“

²³და მიაღერა მოსემ ცისკენ თავისი კვერთხი და გამოსცა უფალმა გრგვინვა და სეტყვა, და წამოვიდა ცეცხლი ქვეყანაზე და დასეტყვა უფალმა ეგვიპტის ქვეყანა.

²⁴მოდიოდა სეტყვა და ცეცხლი გიზგიზებდა მასში, ძალზე ძლიერი იყო სეტყვა, მისი მსგავსი არ ყოფილა ეგვიპტელთა მთელ ქვეყანაში, იმ დღიდან, რაც იქ ხალხი დასახლდა.

²⁵და გაანადგურა სეტყვამ ეგვიპტის მთელ ქვეყანაზე ყველაფერი, რაც კი გარეთ დარჩა, ადამიანიდან პირუტყვამდე. ბალახი ველისა გაანადგურა სეტყვამ, და ყოველი ხეც ველისა დალეწა.

²⁶მხოლოდ გოშენის ქვეყანა, სადაც ისრაელიანები იყვნენ, არ დაისეტყვა.

²⁷და გაგზავნა ფარაონმა და უხმო მოსეს და აარონს, და უთხრა: „შევცდი ამჯერად. უფალი მართალია, მე და ჩემი ხალხი კი — დამნაშავენი.

²⁸შეევედრეთ უფალს და დაცხრეს ღვთის გრგვინვა და სეტყვა, და გაგიშვებთ, მეტს აღარ დაგაყოვნებთ.“

²⁹უთხრა მას მოსემ: „ქალაქიდან გასვლისას გავიწვდი ხელებს უფლისაკენ, გრგვინვა დაცხრება და სეტყვა აღარ იქნება, რათა გაიგო, რომ უფლისაა ქვეყანა.

³⁰მაგრამ შენ და შენს მსახურებს, ვიცი, ჯერაც არ შეგეშინდებათ უფალი ღმერთისა.“

³¹სელი და ქერი განადგურდა, რადგან ქერი ამოთავთავებული იყო, სელი კი ყვაოდა.

³²ხოლო ხორბალი და ასლი არ განადგურდა, რადგან გვიანებია ისინი.

³³და გავიდა მოსე ფარაონისგან ქალაქგარეთ, და გაიწოდა ხელები უფლისაკენ. გრგვინვა და სეტყვა შეწყდა და წვიმა აღარ იღვრებოდა მიწაზე.

³⁴და დაინახა ფარაონმა, რომ შეწყდა წვიმა და სეტყვა, და გრგვინვა, და კვლავ შესცოდა. და გაიქვავეს გული მან და მისმა მსახურებმა.

³⁵გასასტიკდა გული ფარაონისა და არ გაუშვა ისრაელიანები, როგორც ნათქვამი ჰქონდა უფალს მოსეს პირით.