Read ქართული ბიბლია, სრული ვერსია Job 9 Bible Online

Job 9 - ქართული ბიბლია, სრული ვერსია bible

Job 9

¹მაშინ მიუგო იობმა და თქვა:

²„ჭეშმარიტად ვიცი, რომ ასეა, როგორ გამართლდება კაცი ღმერთის წინაშე?

³ვინმემ ღმერთთან კამათი რომ მოინდომოს, ათასში ერთზეც ვერ გასცემს პასუხს.

⁴გულით ბრძენია და ძალით ძლიერი, ვინ გაჯიუტებია მას და გადარჩენილა?

⁵მთებს ისე უცვლის ადგილს, რომ მათ არც იციან. იგი ამხობს მათ თავისი რისხვით,

⁶ატორტმანებს დედამიწას თავისი ადგილიდან და მისი სვეტები ირყევიან.

⁷უბრძანებს მზეს და არ აღმოხდება, და ვარსკვლავებს ასვამს ბეჭედს.

⁸მარტო თვითონ ჭიმავს ზეცას და ზღვის ტალღებზე დადის.

⁹იგია შემოქმედი დიდი დათვისა, ორიონისა, ხომლისა და სამხრეთის პალატებისა.

¹⁰იგი ქმნის გამოუკვლეველ დიდებულებას და ურიცხვ საკვირველებას.

¹¹აჰა, გადაივლის ჩემს თავზე და ვერ დავინახავ, ჩაივლის და ვერ აღვიქვამ მას.

¹²აჰა, გაიტაცებს და ვინ არის დამკავებელი? ვინ ეტყვის: რას აკეთებ?

¹³ღმერთი არ შეაბრუნებს თავის რისხვას, რაჰაბის შემწენი მის ქვეშ დაემხობიან.

¹⁴როგორ უნდა შევეპასუხო მას, როგორ შევარჩიო ჩემი სიტყვები?

¹⁵მართალიც რომ ვიყო, ვერ შევეპასუხები, ჩემს მსაჯულს შევევედრები.

¹⁶მისთვის რომ მომეხმო და პასუხი გაეცა, არ დავიჯერებდი, რომ მან ისმინა ჩემი ხმა.

¹⁷გრიგალივით მლეწავს და უმიზეზოდ მიმრავლებს ჭრილობებს.

¹⁸სულს არ მათქმევინებს, მავსებს სიმწარით.

¹⁹თუ საქმე ძალაშია, აჰა, ის ძლიერია, და თუ საქმე სამართალშია, ვინ მოჰკითხავს მას პასუხს?

²⁰მართალიც რომ ვიყო, ჩემივე პირი გამამტყუნებს, უმწიკვლოც რომ ვიყო, მაინც ბრალს დამდებს.

²¹უდანაშაულო ვარ, მაგრამ არად ვაგდებ ჩემს თავს: სიცოცხლე მომძულდა.

²²სულერთია; ამიტომ ვამბობ: უდანაშაულოსა და დამნაშავეს ერთნაირად ანადგურებს იგი.

²³როდესაც მისი მათრახი უეცრად კლავს, იგი დასცინის უბრალოთა განსაცდელს.

²⁴დედამიწა ურჯულოთა ხელშია, ის თვალს უხვევს მის მსაჯულებს. თუ ის არა, მაშ ვინ?

²⁵ჩემი დღეები მალემსრბოლზე უსწრაფესია, მიექანებიან, სიკეთეს ვერ ხედავენ.

²⁶მიჰქრიან ლერწმის ნავებივით, ორბივით, თავის მსხვერპლს რომ აცხრება.

²⁷თუ ვიტყვი: ‘დავივიწყებ ჩემს ჩივილს, მოვეშვები პირქუშობას და გავმხნევდები,’

²⁸მაშინებს ყველა ჩემი სატკივარი, ვიცი, რომ არ გამამართლებ.

²⁹მე გავმტყუნდები! ამაოდ რად უნდა გავისარჯო?

³⁰თუნდაც თოვლის წყლით განვიბანო თავი, და აბრეშუმზე შევიწმინდო ხელები,

³¹მაინც წუმპეში ჩამძირავ და ჩემსავე სამოსს შევზიზღდები.

³²რადგან ის ჩემსავით ადამიანი კი არ არის, რომ პასუხი გავცე და სამსჯავროში ერთად წავიდეთ.

³³არ არსებობს ჩვენს შორის შუამავალი, რომ ორივეს დაგვადოს ხელი.

³⁴თუ განმარიდებდა ჩემგან თავის კვერთხს, და მისი შიში არ შემაძრწუნებდა,

³⁵მაშინ ვილაპარაკებდი და არ შემეშინდებოდა, რადგან მე ასეთი არა ვარ ჩემში.