Read ქართული ბიბლია, სრული ვერსია Psalms 101 Bible Online

Psalms 101 - ქართული ბიბლია, სრული ვერსია bible

Psalms 101

¹ლოცვა გლახაკისა, ოდეს იტანჯება და უფლის წინაშე გადმოღვრის თავის გულისნადებს.

²უფალო, ისმინე ჩემი ლოცვა, და ჩემი ღაღადისი მოვიდეს შენთან!

³ნუ დაფარავ შენს სახეს ჩემგან ჩემი გაჭირვების ჟამს, მომაპყარ ყური; ოდეს მოგიხმობ, მსწრაფლ მიპასუხე!

⁴რადგან გაქრნენ კვამლივით ჩემი დღენი და ჩემი ძვლები ვარვარებს, როგორც კოცონი.

⁵ბალახივით დაჭკნა და გახმა ჩემი გული, მავიწყდება ჩემი პურის ჭამა.

⁶ჩემი კვნესის ხმისაგან ხორცს მიჰკვრია ჩემი ძვლები.

⁷დავემსგავსე უდაბნოს ფრინველს, გავხდი ვითარცა ბუკიოტი ნანგრევებში.

⁸ძილი გამიტყდა და ვზივარ, ვითარცა ეული ჩიტი სახურავზე.

⁹ყოველდღე მლანძღავენ ჩემი მტრები, ჩემი განმაქიქებლები საწყევლად იყენებენ ჩემს სახელს;

¹⁰რადგან პურივით ვჭამდი ნაცარს და ჩემს სასმელს ცრემლით ვაზავებდი

¹¹შენი რისხვისა და გულისწყრომის გამო; რადგან ამიყვანე და დამანარცხე.

¹²ჩემი დღეები გადახრილი ჩრდილივითაა და ბალახივით ვხმები.

¹³შენი არსება კი, უფალო, საუკუნოა, შენი ხსენება — თაობიდან თაობამდე.

¹⁴შენ აღსდგები და შეიწყალებ სიონს, რადგან ჟამია შეწყალებისა. აჰა, მოვიდა აღთქმული ჟამი!

¹⁵რადგან უყვართ შენს მსახურთ მისი ქვები და მისი მიწა ენანებათ.

¹⁶შეეშინდებათ ერებს უფლის სახელისა და ამა ქვეყნის ყველა მეფეს შენი დიდების.

¹⁷როდესაც აღაშენებს უფალი სიონს, გამოცხადდება თვისი დიდებით;

¹⁸მოხედავს გულმოდრეკილთა ლოცვას და არ უკუაგდებს მათ ვედრებას.

¹⁹დაიწერება ეს მომავალი თაობისათვის, და ხალხი, რომელიც დაიბადება, ადიდებს უფალს.

²⁰რადგან მან გადმოიხედა თავისი წმიდა სიმაღლიდან, მოიხილა უფალმა ზეციდან ქვეყანა,

²¹რათა შეესმინა პატიმრის კვნესა, გაეთავისუფლებინა სიკვდილის ძენი.

²²რათა აუწყონ სიონს უფლის სახელი და ქება მისი იერუსალიმს,

²³როცა შეგროვდებიან ხალხები ერთად და სამეფონი უფლის მსახურებისთვის.

²⁴გაასავათა მან გზაში ჩემი ძალა, შეამცირა ჩემი დღენი.

²⁵ვეტყვი: ღმერთო ჩემო! ნუ მომტაცებ ჩემი დღეების ნახევარს! თაობიდან თაობამდეა შენი წლები.

²⁶ძველთაგან დააფუძნე დედამიწა, და შენს ხელთა ქმნილებაა ზეცა.

²⁷ისინი გარდავლენ, შენ კი იქნები; ყველანი ტანსაცმელივით დაძველდებიან, სამოსელივით გამოიცვლი მათ და გაქრებიან.

²⁸შენ კი იგივე ხარ, და შენი წლები არ დაილევა!

²⁹იცხოვრებენ უსაფრთხოდ შენს მსახურთა ძენი და შთამომავალი მათი დამკვიდრდება შენს წინაშე.