Read ქართული ბიბლია, სრული ვერსია Psalms 107 Bible Online

Psalms 107 - ქართული ბიბლია, სრული ვერსია bible

Psalms 107

¹გალობა. ფსალმუნი. დავითისა.

²მზად არის ჩემი გული, ღმერთო, მსურს გაქო და გიგალობო; გამოიღვიძე, სულო ჩემო!

³გამოიღვიძე, ჩანგო და ქნარო! გამოვაღვიძებ ცისკარს!

⁴გადიდებ, უფალო, ხალხებს შორის, გიგალობებ ერებს შორის,

⁵რადგან ზეცაზე დიდია წყალობა შენი და ღრუბლებამდეა ჭეშმარიტება შენი.

⁶ამაღლდი ცათა ზემოთ, ღმერთო, მთელ ქვეყნიერებას გასწვდეს შენი დიდება!

⁷რათა გადარჩნენ საყვარელნი შენნი; მიხსენ შენი მარჯვენით და მიპასუხე!

⁸ღმერთმა თქვა თავის სწმიდეში: ვიზეიმებ! გავანაწილებ შექემს და სუქოთის დაბლობს გავზომავ.

⁹ჩემია გალაადი, ჩემია მანაშე, ეფრემი ჩაჩქანია ჩემი თავისა, იუდა — კვერთხი ჩემი.

¹⁰მოაბი ავზია ჩემი განსაბანი, ედომს მისწვდებიან ხამლნი ჩემნი, ფილისტიმს დავკივლებ.

¹¹ვინ შემიყვანს გამაგრებულ ქალაქში? ვინ წამიძღვება ედომისაკენ?

¹²ნუთუ შენ არა, ღმერთო, ნუთუ მიგვატოვე და აღარ გამოხვალ ჩვენს მხედრობასთან?

¹³მოგვეც შეწევნა გასაჭირში, რადგან ამაოა შველა კაცთაგან!

¹⁴ღმერთით შევქმნით ლაშქარს, ის დათრგუნავს ჩვენს მტრებს.