Read ქართული ბიბლია, სრული ვერსია Psalms 138 Bible Online

Psalms 138 - ქართული ბიბლია, სრული ვერსია bible

Psalms 138

¹გუნდის ლოტბარს. დავითის ფსალმუნი. უფალო, შენ გამომცადე და შემიცან მე.

²შენთვის ცნობილია, როდის ვჯდები და როდის ვდგები; შეიცნობ ჩემს ზრახვებს შორიდან.

³ჩემს სვლასა და ჩემს წოლას შენ განსაზღვრავ, და ყველა ჩემი გზა შენ გამოიკვლიე.

⁴თუნდაც ჯერ არ იყოს სიტყვა ჩემს ენაზე, შენ უკვე იცი, უფალო, სრულად.

⁵უკნიდან და წინიდან გარემომიცავი და დადე ჩემზე ხელი შენი.

⁶მაოცებს — როგორ შემიცან ასე; მაღალია, ვერ შევწვდები ამას.

⁷საით წაუვალ შენს სულს და შენს სახეს სად გავექცევი?

⁸ზეცაში თუ ავალ, შენ იქა ხარ, ქვესკნელში ჩავალ — იქაც ხარ შენ!

⁹ფრთებიც რომ გამოვისხა განთიადისა, დავსახლდე ზღვის კიდეზე,

¹⁰იქაც შენი ხელი წამიძღვება და შემივრდომებს მარჯვენა შენი!

¹¹თუ ვიტყვი: ვაი თუ ბნელმა დამფაროს, — ღამეც კი სინათლედ გადაიქცევა ჩემს ირგვლივ.

¹²სიბნელეც არაა წყვდიადი შენთვის, და ღამე დღესავით განათდება; რადგან სიბნელეც სინათლეა შენთვის!

¹³რადგან შენ დაბადე თირკმელნი ჩემნი, შენ გამომძერწე დედის წიაღში.

¹⁴გადიდებ, რადგან საოცრებით შემქმენი; საკვირველია საქმენი შენნი! კარგად ვიცი ეს მე.

¹⁵არ დაფარულა ჩემი ძვლები შენგან, როცა ჩავისახე იდუმალებაში, შევნივთდი მიწის წიაღში.

¹⁶ჩემი ჩანასახი იხილეს შენმა თვალებმა და შენს წიგნში ჩაწერილი იყო ჩემი მომავალი დღეები, როცა ჯერ არ იყო არც ერთი მათგანი.

¹⁷რაოდენ ძვირფასია შენი ზრახვანი ჩემთვის, ღმერთო! რაოდენ დიდია მათი რიცხვი!

¹⁸თუ დავთვლი, ქვიშაზე უმრავლესია; გავიღვიძებ და, ისევ შენთან ვარ!

¹⁹ნეტამც მოსრავდე, ღმერთო, ბოროტს! ნეტავ გამშორდნენ სისხლისმსმელები!

²⁰ავს რომ ამბობენ შენზე და ბოროტად სარგებლობენ შენი სახელით.

²¹განა არ უნდა მოვიძულო, უფალო, შენი მოძულენი, და შენს მოდავეებს არ უნდა ვედაო?

²²სრული სიძულვილით მოვიძულე ისინი, და მტრებად მექცნენ მე.

²³გამომცადე, ღმერთო, და შეიცან ჩემი გული; შემამოწმე და შეიცან ჩემი აზრები.

²⁴იხილე, ბოროტების გზაზე ხომ არ ვდგავარ, და წამიძეხი მარადიულ გზაზე!