Read ქართული ბიბლია, სრული ვერსია Psalms 139 Bible Online

Psalms 139 - ქართული ბიბლია, სრული ვერსია bible

Psalms 139

¹გუნდის ლოტბარს. ფსალმუნი დავითისა.

²მიხსენ, უფალო, ბოროტი ადამიანისაგან, მოძალადე კაცისაგან დამიფარე!

³რადგან ბოროტებას იზრახავენ ისინი გულში და ყოველდღე საომრად ემზადებიან.

⁴გველივით მოილესეს ენები, ასპიტის შხამია მათ ბაგეებს ქვეშ.

⁵დამიცავი, უფალო, ბოროტთა ხელისაგან, მოძალადე კაცთაგან დამიფარე, რომელთაც განიზრახეს ჩემი ნაბიჯების დაბრკოლება!

⁶გამიმზადეს ამპარტავნებმა მახე და საბელი, ბადე განართხეს გზაზე, ხაფანგი დამიგეს. —

⁷ვუთხარი უფალს: „ჩემი ღმერთი ხარ; ისმინე, უფალო, ხმა ჩემი ვედრებისა!“

⁸უფალო, ღმერთო ჩემო, ძალავ ჩემი ხსნისა! შენ დაიფარე ჩემი თავი ბრძოლის დღეს!

⁹ნუ აღასრულებ, უფალო, ბოროტის გულისწადილს, მის ბოროტ ზრახვას ნუ მისცემ გზას,

¹⁰დაფაროს ჩემს გარემომცველთა თავი მათ ბაგეთა ბოროტებამ;

¹¹გავარვარებული ნაკვერჩხლები დაეფრქვეთ თავზე, ჩაინთქნენ ისინი ღრმა ორმოში, რომ ვეღარ წამოდგნენ!

¹²ავსიტყვა კაცი ნუ გაძლებს ქვეყანაზე, მოძალადე კაცი ბოროტებამ მოინადიროს ძირს დასაცემად!

¹³ვიცი, რომ განიკითხავს უფალი გლახაკს და მისცემს სამართალს უპოვართ.

¹⁴ხოლო მართალნი მადლს შესწირავენ შენს სახელს, და წრფელნი დამკვიდრდებიან შენს წინაშე.