Read ქართული ბიბლია, სრული ვერსია Psalms 143 Bible Online

Psalms 143 - ქართული ბიბლია, სრული ვერსია bible

Psalms 143

¹დავითისა. კურთხეულ არს უფალი, კლდე ჩემი, რომელიც ასწავლის ჩემს ხელებს ბრძოლას, ჩემს თითებს — ომს.

²მწყალობელო ჩემო და სიმაგრევ ჩემო, მცველო ჩემო და მხსნელო ჩემო; ჩემი ფარი ხარ, რომელიც მიფარავს, მიმორჩილებს ჩემს ხალხს.

³უფალო, რა არის კაცი, რომ გახსოვს იგი, ძე ადამისა, რომ რაიმედ მიიჩნევ?

⁴ადამიანი ჰგავს ამოსუნთქვას, მისი დღეები — ვითარცა ჩრდილი გარდასული.

⁵უფალო, მოდრიკე ცანი შენნი და გადმოდი! შეეხე მთებს, რომ აკვამლდნენ!

⁶გამოაელვე ელვანი და გაფანტე ისინი, გამოუშვი ისარნი შენნი და თავზარი დაეცი მათ!

⁷გამოიწოდე შენი ხელი მაღლიდან; მიხსენ და გადამარჩინე მრავალ წყალთაგან, უცხო ტომთა ხელთაგან,

⁸რომელთა ბაგენი ტყუილს ამბობენ და რომელთა მარჯვენა სიცრუის მარჯვენაა.

⁹ღმერთო, ახალ გალობას გიგალობებ შენ. ათსიმიან ჩანგზე გიგალობებ,

¹⁰შენა ხარ მეფეთათვის ძლევის მიმნიჭებელი, შენ იხსნი დავითს, შენს მსახურს. მიხსენ მე მსახვრალი მახვილისაგან.

¹¹გადამარჩინე უცხოთესლთა ხელიდან, რომელთა ბაგენი ტყუილს ამბობენ და რომელთა მარჯვენა სიცრუის მარჯვენაა.

¹²დაე ჩვენი ძენი ნერგებივით იყვნენ სიჭაბუკეში; იყვნენ ჩვენი ასულნი, ვითარცა სასახლის მშვენივრად თლილი სვეტები.

¹³ჩვენი ბეღლები სავსე იყოს მოსავლით; ჩვენი ცხვრები ათასობდნენ და 10 ათასობდნენ ჩვენს საძოვრებზე.

¹⁴ჩვენი ხარები დატვირთულნი იყვნენ, არ იყოს არც ზარალი და არც დანაკლისი და არც გოდება ჩვენს ქუჩებში!

¹⁵ნეტარ არს ხალხი, რომელიც ასეა ნაკურთხი! ნეტარ არს ხალხი, რომლის ღმერთიც უფალია!