Read ქართული ბიბლია, სრული ვერსია Psalms 28 Bible Online

Psalms 28 - ქართული ბიბლია, სრული ვერსია bible

Psalms 28

¹ფსალმუნი დავითისა. უძღვენით უფალს, ღვთის შვილებო, უძღვენით უფალს ძალა და დიდება.

²უძღვენით უფალს მისი სახელის დიდება; თაყვანი ეცით უფალს წმიდა ბრწყინვალებით.

³ხმა უფლისა წყლებზე, დიდების ღმერთმა დაიგრგვინა; უფლის ხმა მრავალ წყალზე.

⁴ხმა უფლისა ძლიერია, ხმა უფლისა ბრწყინვალეა.

⁵ხმა უფლისა ამსხვრევს კედრებს; ამსხვრევს ლიბანის კედრებს უფალი.

⁶ათამაშებს ლიბანს ხბოსავით, და სირიონს — მარტორქის შვილივით.

⁷ხმა უფლისა გაჰკვეთს ცეცხლის ალს.

⁸ხმა უფლისა არყევს უდაბნოს; არყევს უფალი კადეშის უდაბნოს.

⁹ხმა უფლისა ამშობიარებს ირმებს; აშიშვლებს ტყეებს; და მის ტაძარში ყოველივე ღაღადებს: დიდება!

¹⁰უფალი ზის წარღვნაზე, ზის უფალი ხელმწიფედ უკუნისამდე.

¹¹დაე უფალმა უბოძოს ძალა თავის ხალხს! აკურთხოს უფალმა თავისი ხალხი მშვიდობით!