Read ქართული ბიბლია, სრული ვერსია Psalms 29 Bible Online

Psalms 29 - ქართული ბიბლია, სრული ვერსია bible

Psalms 29

¹ფსალმუნი. ქება ტაძრის განახლებისა. დავითისა.

²განგადიდებ შენ, უფალო, რადგან მიხსენი და არ გაახარე ჩემზე მტრები.

³უფალო, ღმერთო ჩემო, მოგიხმე და შენ განმკურნე მე.

⁴უფალო, შენ ამოიყვანე ჩემი სული ჯოჯოხეთიდან, გამაცოცხლე, რომ საფლავში არ ჩავსულიყავ.

⁵უგალობეთ უფალს, მისო წმიდებო, ადიდეთ ხსენება მისი სიწმიდისა.

⁶რადგან წამიერია რისხვა მისი, ხოლო გულმოწყალება — მთელი სიცოცხლე; თუ ღამით გლოვა დაისადგურებს — ცისკრის ჟამს მხიარულება მოვა.

⁷და ვთქვი მე ჩემი ნეტარების ჟამს: არ დავეცემი უკუნისამდე.

⁸შენი სურვილით, უფალო, დამადგინე მთასავით მკვიდრად; დაფარე შენი სახე და — შევძრწუნდი.

⁹შენ მოგიხმე, უფალო, და ჩემს მეუფეს შევევედრე:

¹⁰რა სარგებლობა იქნება ჩემს სისხლში, როდესაც საფლავში ჩავალ? განა მტვერი შეგასხამს ხოტბას? განა შენს ჭეშმარიტებას განაცხადებს?

¹¹უფალო, მომისმინე და შემიწყალე, იყავი შემწე ჩემი.

¹²შენ ჩემი წუხილი როკვად მიქციე, ძაძა გამხადე და სიხარულით შემომსარტყლე.

¹³ამისათვის გიგალობებს სული ჩემი და არ დადუმდება. უფალო, ღმერთო ჩემო, შენ გადიდებ უკუნისამდე!